جنة ،،،،سلام

الحلقة -29-

جنة ،،،،سلام
بقلم/فراقد حسن علي
،،،،،،،،،،،،،،،،،،،،
البارت-29-

جنات/دك تلفون سلام ،،رفع التلفون مقابيل وجهه وبقى يباوع على الرقم

سلام/أكضبي وردي على ألاتصال

جنات/منو المتصل

سلام/هاي رحاب بنت عمي شاهين

جنات/أنطيني خطيه اكيد علمودي متصله

-أخذت التلفون من أيده وجاوبت على الاتصال ،،

-ومثل ماتوقعت خطيه تسال عن أحوالي

-وتتطمن عني وعن الجنين وخاف بعد عندي نزيف

-واذا أخذج علاجي بصوره صحيحه وبنتظام

-ورادت رقمي الخاص لان تستحي تتصل على سلام

-عاد سلمت عليها وتشكرت منها وكتلها هسه اتصل عليج من رقمي

-عاد سديت الخط ،،وأخذت رقمها من جهاز سلامي وسجلته بجهازي ودكيت عليها

-هي سجلت رقمي ،وأني سجلت رقمها

سلام/اكول ما نمشي شوي لبيت عماد دأنشوف شكو ماكو غادي

جنات /اي بس أبدل

-كمت بدلت برمودتي ولبست دشداشه لونها غامق ماعندي دشداشه سوده ولبست ربطه سوده وعبايه

-هااا عيوني نمشي كملت

سلام/اي ماعندي شي ،،يالله

-اكول ابدل دشداشه لو أظل بالتراكسود

جنات/كلشي عليك حلوا

-بس تراكسود أحسلك شو الجو بي بروده

-اريد أسماء تجي تساعدني نطلع الملابس الشتويه

سلام/هاي هي نظل بالتراكسود

جنات/المسافه قريبه بس ميقبل أمشي ،،رحنه بالسياره

-دخلنه لبيت عماد وهووسه ،جهال شيماء،،وجهال أسماء ،،
وجهال علاء،،وجهال قتيبه ،،وانوب جايين عايله اخوه ماهر

-سلمت على ام رونق زوجه ماهر ،،بس قلبي مارتاحلها
من رحت عليهم للطارميه حسيتها نظراتها مو قانونيه

-التمينه كلنه بالهول ،،علاء وسلام وقتيبه وقصي وماهر بجهه كاعدين

واحنه النسوان بجهه ،،والجهال تلعب وتكمز،،
والحجيه متمدده على القنفه

-شوي وأندكت الباب وابراهيم وحليمه وام عماد وراشد

ما شاء الله الجمعة الزينه ،،صدك هوووسه ،

اسماء والهام يطفرن ويظيفن الصغير قبل الجبير ،،كلش حبابات وخوش نسوان

الحجيه كعدت على حيلها وكعدت بصفها أم عماد ،،واني كعدت بالكاع يم رجليهن