حبيت بدوي

البارت التاسع

تذكر كلام أبوه وحبس دمعته لا تطيح

****فلاش باك****

#مكتوم

طالع اليوم ويا الربع البر كاشتين وأنا احط الغوري على الضو ياني اتصال خبرت ذياب يرد رد ذياب وكان "أبويه"

أبو راكان: الو هلا أبويه مكتوم

ذياب: ياهلا عمي أنا ذياب، مكتوم مشغول الحينه

أبو راكان: خلاص عيل يوم بيفظى خله يتصل

ذياب: ها خلص

مكتوم سحب التلفون: يمسيك بالخير يالغالي

أبو راكان: يمسيك بالنور، أبويه مكتوم جان تقدر اتيي شويه البيت

مكتوم: أفا عليك يلا ياينك الحينه

أبو راكان: الله يرضا عليك.. فمان الله

مكتوم: فمان الكريم

ورحت للبيت عشان أجوف أبويه شو يبا جفتهم فاتحين سكايب ومتصلين على أخوي راكان.. ها الموضوع الي يباني فيه أبوي لالا مستحيل اكيد يباني بشيء اهم

مكتوم: السلام عليكم (وباس راس امه وابوه)

الكل: وعليكم السلام

يلست صوب أبويه: آمــر أبويه زقرتني؟

أبو راكان: هيه أبويه

شوي واجوف أخواني الصغار يايين ويلسوا صوب بعض

أبو راكان: أنا ياعيالي اليوم لامنكم لأني وعيت على شيء، يا عيالي الدنيا فانيه وانا الأكيد بيي اليوم الي بكون فيه تحت التراب

الكل: الله يحفظك.. بعيد الشر.. يومي قبل يومك

أبو راكان: أبا اموت وانا متطمن أن عيالي قد المسؤوليه، عيالي عارفين الصح والغلط عيالي يتعاونون في ما بينهم أنا وصيتي لكم كونوا ويا بعض كونوا سند لبعض، أبويه راكان أنت ريال البيت من بعدي و أنت يا مكتوم أنت نسختي يمع عايلتك كون أنا يا مكتوم وانت يا عمر ارفع راسي عشان يقولون ولد المرحوم مافي احسن عنه هب يقولون امه ما عرفت تربيه من بعد أبوه وانتي يانوف أنتي كوني عون أخوانج كوني امهم أختهم، وانتي يا شما، كوني لهم نعم الأم كوني لهم عوض عني كوني الأم والأبو، محد يعرف متى يومه لكن المفروض نضمن نفسنا وانا الحين ضامننكم (بإبتسامه) يلا كل واحد يروح المكان الي يباه (طلع من جيبه فلوس ووزعهن على عياله ومرته)

مكتوم (باس راس أبوه): يابوي نحن ان شاء الله بنكون قد المسؤوليه، الله يحفظك

أبو راكان: هذا العشم فيكم

مكتوم: عشمك ما يخيب.. اووه الحين الشباب بياكلوني مع السلامه (وطلع)

****نهاية الفلاش باك****