بعد خلعتنا دي بقيت بعاين ليه جوا عيونو و مادة ليه ايدي عشان يديني القروش
و هو لسا بعاين لي و مخلوع..
انا:هي هي لو سمحت عاوز حاجة؟
-بنبرة حادة:موية
انا:مديت ليه الموية.. عاوز اشيلا كدا قمت رجعتها قلت ليه :القروش!
-دفعت!
انا:لا والله م اديتني كنت سرحان و انا نبهتك قلت ليك عاوز شنو
-يعني كذابة و لسانك طويل؟ 😒
رزعت الموية في المصطبة الفاصلة بيناتنا:نعم ياخوي؟كذابة؟ انت بتتكلم معاي انا؟
-و هو في زول غيرك؟ و شيلي مويتك و القروش زاتو م عاوزة
طلعت ليه برة عديل و قلت ليه لا لا انت عاوزة ليك طلعة عديل
و هو مكتف ايدو و بسمعني بكورك:انت بجد تستاهل الكلام القلتو ليك بالصباح بس عشان انا جوا المدرسة و ممكن يطردوني ححترم نفسي
قاطعني طوالي و قلي:يعني انتي معترفة بأنك يعني معليش على الكلمة قليلة ادب
انا:انا؟
نفسي لممن قااممم شلت الموية و رميتا ليه وقلت ليه:اعتبر قروشا اتدفعت😒
طوالي سمعتا صوت من ورا :اوووى يوسف طارق والله نورت المدرسة ياخ
يوسف:استاذ نور الدين والله ليك وحشة ياخ
و انا لسا واقفة قدامو قام المدير عاين لي و عاين ليه :في مشكلة أو حاجة؟
يوسف:لا لا ابدا والله
انا:لا في ي استاذ
نور الدين:خير ي بتي
عاينت لي يوسف و لقيتو بعاين لي بي كل برود و سخافةةةة:قلت ليه و انا لسا كنت بعاين لي المدير:لا خلاص ماف شي
دخلت لي اريج و انا زهجانة و صارة وشي
اريج:اجش ماالك يبت ومالك بتكوركي في الولد كدا؟ عاد لكن سمح سماحة كمان بتعرفيه
انا:اريج احسن ليك اتلمي😒براي م ناقصاك انا
اريج:هي ي بت روقي كدي
انا:انا لازم اشوف لي شغل فوق د ي اريج لازم
اريج:بجد قبل م المدرسة تخلص
انا:و حسا د القاهو من وين
اريج:انتي عاوزة تشتغلي شنو بظبط يعني
انا:اي شي ي اريج انشاءالله في مطعم انضف في كوافير في اي حتة اللهم القا لي شغل
اريج:خلاص يبت ولا يهمك بكرة دي بشوف مرت عمي عندها كوافير اشوف ليك اي شغلة تطلعي بي حاجة كويسة كدا
انا:اي عليك الله ي اريج شفتي اعمل اي شي م حنك لو عاوزني امسح الحمام بمسحو
اريج:اي الليلة دي بشوفا و بكلمك
انا:شكرا ي اريج نهائي م حنسا وقفاتك معاي😔
اريج:هوي م تخليني الطشك كف من متين بيناتنا شكرا م تزعليني
انا:😂بحبك واللهه اها الجرس ضرب حسا بجو ملمومين فوق راسنا قومي
-في جانب تاني-
حسن:و بس و شوية تشطيبات عاوزنكم تعملوها اها د كلو يكلفنا كم
يوسف و هو بولع في سجارتو و اتكل على ضهرو في الكرسي و عيونو في عيون حسن :والله القروش دي م مهما عندنا.. اهم شي نكسب محبة الزبون ولا شنو؟
حسن:والله وشك وش خير
يوسف:حبيبي والله.. حناخد في الشغل د يعني انتو عاوزين تشطيبات و تغير واجهة المدرسة خالص مع ديكورات جديدة لي الفصول و مكاتب الأستاذة يعني قول كدا حوالي تسعمية الف و دا طبعا مع الخصم !
حسن:نعم؟
يوسف:تمنمية و خمسين و م حنقص ولا مليم
حسن:خليهم تمنمية
يوسف:ابقا شكرا انشاءالله تلقو ناس احسن مننا اتشرفنا..
قام على حيلو و مشا على ناحية الباب
حسن:تمنمية و خمسين
يوسف اتلفت عليه و ابتسم بسمة خفيفة كدا و قليه:بكرة انشاءالله حنجي نشيل مقياسات
حسن:تمام
طلع من الباب طوالي لقاه نور الدين و قليه :اها؟
يوسف:من بكرة حنبدا الشغل
نور الدين :انت عارف الناس ديل ليهم زمن بفتشو و هم عاوزين بي الرخيص المشكلة
يوسف:و المشكلة ماف شي بي الرخيص الزمن د
نور الدين:صدقت والله
يوسف:ابقا طل علينا يعمي
نور الدين:انشاءالله بجيكم انا و المدام
يوسف:يلا تسلم
-في جانب تاني-
حسن:الو
سعيد:اها عملت شنو؟
حسن:ظبط الأمور و حيجو من بكرة يشتغلو
سعيد:بتتفق من غير م تكلمني؟ و بي كم اتفقت معاه
حسن:والله ي استاذ انت عارف نحن فتشنا السودان كلو و ما قبلو نهائي لانو عرضنا عليهم سعر قليل و انت زي م عارف حال الدنيا...
سعيد:حسن حسن
حسن:ايوا
سعيد:اتفقت معاهم بي كم؟
حسن:850 الف
سعيد:ليه د كلو؟ مش قلت ليك اكتر من ستمية نحن م دايرين؟
حسن:كدي روق نحن اي زول يجينا بقولو لينا 2 مليون عديل و د ارخص واحد جانا! دايرني افوتو؟
سعيد:تاني انا م بخليك تشتغل محلي نهائي معسلامة
حسن:الغي الشغل؟
سعيد:لا... وقفل التلفون
في جانب تاني-
يوسف نازل من السلالم و اتجه على ناحية البوفيه طلع قروشو و قال لو سمحتي
اريج:ايوا اتفضل
يوسف:اديني موية و بيبسي
و طبعا انا بحمر ليه و هو ولا شغال بي دمو يلطش
اريج: اتفضل
يوسف:شكرا
اريج:لو سمحت لو سمحت
يوسف :اها؟
اريج:الباقي
يوسف:خليه معاك... و اتلفت و مشا
اريح:وااااايييي ي شجن الولد سمح سمح سمح سمح شفتي عيونو العسلية دي تسو كدي وووبن علي😭
شجن:هي ها م للدرجة دي انتي كمان
اريج:ببت الولد مافيه غلطة عاد قربت اقوليه اديني رقمك🤣
شجن:امشي قومي شوفي البت دي عاوزة شنو و نقطينا بسكاتك🌚
اريج:هي انتي بتعرفيه من وين
شجن:م شفتي بصباح قرب يطقشني قلي انو م شايفة قدامك و م بعرف شنو و انا كنت طالعة من شكلة مع معز و شفتي أخلاقي في نخرتي بس قلت ليه ي باطل و خسارة الشنب فيك ي زولة رجع بي عربيتو و قلي لو رديت علي دابي ببقا باطل شفتي و فحط
اريج:اللللليلة كذذابة والله عاد اصلي م بصدق قلتي ليه باطل؟
شجن:ي بت قلت ليكي يادوب طالعة من شكلة مع معز و أخلاقي كانت ضيقة 🤣🤣
اريج:اها خلاص تاني م بتتلاقو احمدي ربك
شجن:لكن غاظني كيف يعني يقول لي اديتك قروش؟ حرامية مثلا
اريج:خلاص ي بت اقفلي الموضوع د😂تاني لسانك الأطول منك د امسكيه
شجن:ياخ عليك الله انسينا
-في جانب تاني-
نون:جماعة قومو يوسف وصل اي زول يمشي محلو حسا بهيج فينا.. جا يوسف داخل و قال:ماشاءالله عاملين فيها بتشتغلو
نون:يوسف
يوسف:يوسف؟
نون:ي ود م تعمل فيها مهم
يوسف:نون انا كم مرة اكلمك انو في الشغل اتعاملي معاي كانك م بتعرفيني؟؟
نون:خلاص ي مدير ي مهم انت
يوسف:ايوا اها
نون:عاوزة اجازة تلاتة ايام
يوسف:اعملي لي قهوة و تعالي لي المكتب
نون و هي بطنطن:انا قريت معمار عشان اجي اعمل ليك قهوة
يوسف قبل و قليها:عادي لو م عاجبك قدمي استقالتك ولا شنو؟ القهوة م تختي فيها سكر.. دخل و قفل باب مكتبو
نون:انا اعمل لي مديركم د شنو ااا؟ كرهني زاتو العيشة 😭
سجود:انتي حتقدمي استقالتك.؟
نون:ي الله عاينو دي بتقول في شنو و انا بقول في شنو😭
نون:ابراهيم لو يوسف م وافق عليك الله كلمو لي انت اقرب زول ليه هنا
ابراهيم:كويس لكن اعملي لي معاه قهوة
نون:مافي فايدة فيكم انتو والله 😭
عملت القهوة سريع سريع و دخلت ليه و يوسف و هو بقلب في الورق أشر على الطربيزة نظام ختيها ختتا و بقت واقفة غمض عيونو و فتحا تاني و قفل الورق و ربع يديينو و قليها :ايوة عاوزة شنو
نون:عاوزة حاجات كتير
يوسف:نعم؟
نون:لا لا لا م قصدي والله بس يعني عاوزة اجازة تلاتة ايام
يوسف: ليه انشاءالله؟
نون:صحبتي غيداء مش بتعرفا؟ عرسا و لازم احضر و كدا و انت زي م عارف تجهيزات البنات و..
يوسف:نون م تكتري كلامك خلاص انا حديك اجازة انا م عندي مشكلة لكن عندنا شغل نحن و انتي نزلتي معانا ترينينغ ولو فاتك الكلام د م حتستفيدي شي صح؟
نون:اي
يوسف:لكن يعني على كيفك لو عاوزة تمشي امشي انتي المضررة
نون:حمشي
ضحك و قليها:ماشي ي ستي تاني عاوزة شنو
نون:تعبت و انا بعمل القهوة كل يوم😭
يوسف:اها
نون:انا شايفة انو نجيب وحدة تنضف لينا و تعمل لينا القهوة و الشاي و كدا في طابقنا بس
يوسف:طيب بشوف انتي زاتك شوفي لينا وحدة
نون:كويس شكرا ي يوسف😭
يوسف:يلا اقفلي الباب وراك لو جا اي زول م تدخليه فاهمة
نون:كوييس في حاجة تانية
يوسف:نون اطلعي برة
نون:خلاص خلاص م تكورك طالعة 🌚
-في جانب تاني-
و اخيرا نهاية اليوم و زي كل مرة قفلنا البوفيه و طلعنا انا و اريج اول م مرقت من باب المدرسة القا معز واقف عاينت ليه بي طرف عيني
اريج:د مش معز؟
انا:ياهو سي زفت
جا علي و مسكني من يدي و قلي:شجن
انا:ي الله انا من شجن الما عندك غيرا دي 😒
معز:اركبي اوصلك
انا:ي ود انت مريض؟ ي ود م تطلع من حياتي و تخليني فحالي
معز:م تخليني اعيد الكلمة مرتين اركبي العربية
انا:حركبا لكن م خوفا منك عشان الشمس +م عندي قروش مواصلات بس م اكتر
معز:طيب خلي الكلام الكتير و اركبي
انا:يلا ي اريج نوصلك في طريقنا
اريج:لا لا لا انا بمشي بي طريقتي
انا:يبت هي ادخلي ساي اركبي عويرة دي
ركبنا و بقينا ساكتين قام معز قال:فكرتي في الموضوع القلتو ليك?
ضحكت ضحكة سخرية كدا و قلت :سبحان الله
معز:قلتي شنو!
انا:بزكر ربنا م ازكرو؟
معز مسك يدي شديد و ضغط عليها :شايف لسانك طول.
شجن:و حيطول زيادة لو مديت ايدك علي تاني
معز:لكن بعرف اادبك ي شجن
انا:حتعمل شنو يعني؟ ي ود انا م شايفاك اصلا انت م واحد من الرجال ولا من النسوان زاتو انت بنسبة لي ولا شي يعني اعمل العاوز تعملو حبيبي انا
معز:اصبري ي بت الكلب كان م رميتك انتي و امك في الشوارع
انا:سيرة امي دي م تجيبا في لسانك ي باطل
بقا بتكلم براه و بقول :اصبري انا عارف حعمل فيك شنو
المهم وصلنا اريج و وصلني البيت و رزعت الباب في وشو قربت اكسر باب العربية دخلت بيتنا لقيت امي منتظراني بي الغدا
قعدنا و اتونسنا كدا و اتغدينا و عملنا كباية شاي احمر زي كل مرة و ديك ي الونسة فجأة تلفون امي ضرب
#يتبع .
