ငရဲမှလာသောသူ
The Man from Hell
Author Autumn Wind 123
ဘာသာပြန် Han Shin
စာစဉ် 37 Chapter (553) ငါ့ဆရာဦးလေးကို မင်း မြင်လိုက်လား
တစ်လကြာပြီးနောက် အင်မော်တယ်နယ်မြေ၌ ထူးဆန်းသော ဖြစ်ရပ်တစ်ခု ဖြစ်ပွားခဲ့သည်။ ဂြိုဟ်သေများ တစ်လုံးပြီးတစ်လုံး အစအနမကျန်အောင် တစ်နည်းနည်းဖြင့် ပျောက်ကွယ် သွားကြသည်။
ထိုဂြိုဟ်များ၊ ကျောက်တုံးများ၊ ဂြိုဟ်၏အဆီအနှစ်များ၊ ဆွေးမြည့်နေသော သစ်သားများနှင့် အပျက်အစီးများသည် ကြောက်မက်ဖွယ်ကောင်းသော တစ်စုံတစ်ရာ၏ ဝါးမျိုခြင်း ခံလိုက်ရပုံ ပေါ်သည်။
ဘာဆိုဘာမှ မကျန်ခဲ့ချေ၊ အစအနလေး တစ်ချို့တောင်မှ မကျန်ရစ်ခဲ့ချေ။ထိုအဖြစ်အပျက်က အင်မော်တယ်နယ်မြေအား အကြီးအကျယ် ထိတ်လန့်သွားစေခဲ့သည်။
ဤအဖြစ်အပျက်ကို စုံစမ်းရန်အတွက် သိုင်းပညာရှင်များ တစ်ယောက်ပြီးတစ်ယောက် စေလွှတ်ခဲ့သည်။
သို့သော် မည်သူမျှ မသိလိုက်သည့်အချက်မှာ ကြောက်မက်ဖွယ်ကောင်းသော နဂါးနက်တစ်ကောင်က ဂြိုဟ်များကြားထဲတွင် လျင်မြန်စွာ သွားလာလျက် ရှိနေခြင်းပင်။
၎င်း၏အလျင်သည် လျှပ်စီးကဲ့သို့ လျင်မြန်လှပြီး လျပ်တစ်ပြက်အတွင်းမှာပင် ဂြိုဟ်ပေါင်းများစွာကို ဖြတ်ကျော်ပြီးသွားလေသည်။
ထိုဧရာမနဂါးကြီး၏ ဦးခေါင်းထက်၌ ယဲ့ဖန်သည် တင်ပုလ္လင်ချိတ်၍ လိုက်ပါလာသည်။ လက်သီးဆုပ်အရွယ် ပုရွက်ဆိတ်တစ်ကောင်က သူ့လက်ဖဝါးပေါ်၌ တွားသွားလျက် ရှိသည်။ ထိုအကောင်သည်ကား ပုရွက်ဆိတ်လေးပင်။
ယခုအချိန်၌ ပုရွက်ဆိတ်လေး၏ တောင်ပံတစ်စုံသည် လျှပ်စီးနှင့် ဆင်တူနေပြီး အချိန်မရွေး လျပ်ကူးသွားလိမ့်မည်ဟု ထင်မှတ်ရသည်။ သူသည် မျက်လုံးမှိတ်ထားသော်လည်း ထိတ်လန့်ဖွယ် ဖိအားက လူတိုင်းအား ခေါင်းမွေးထောင်သွားစေသည်။ ဤသို့ သေးငယ်သော ခန္ဓာကိုယ်လေး၌ မဖော်ပြတတ်လောက်အောင် များပြားသည့် အရှိန်အဝါတစ်ခု ရှိနေသည်ဟု ထင်မှတ်ရသည်။
“တစ်လအတွင်း ငါ ဂြိုဟ်သေ ၆၇ လုံးကို စုပ်ယူသုံးစွဲခဲ့ပြီးပြီ။ ပုရွက်ဆိတ်လေးနဲ့ ပုရွက်ဆိတ်အုံလည်း အတော်လေး သင်ယူလေ့လာပြီးတဲ့ပုံပဲ”
