شقة رقم ٧

الفصل الثامن والثلاثون

[ هننصب تاني؟ ]

_______

- اهيء اهيء اهيء انا اتقرطست اوي يا إبني، ابوك أتحط في الكيس و اتقفل عليه ، شويه شويه و هلاقي نفسي في المِقّله جنب اللب و السوداني عند الراجل بيقرطسني معاهم عاااااااااا اهيء اهيء اهيء

والد مينجي قاعد حاطط ايده على وشه و بيعيط و ينوح و ينف و يتف في المناديل الي ماسكهاله مينجي الي قاعد جنبه على الكنبه في بيتهم و بيواسي فيه بقاله ساعه..

مينجي صعبان عليه ابوه ف كان بيربت على كتفه بمواساه : خلاص يا بابا بقى متعملش في نفس كده

والده نف في المنديل و رماه بعيد عنه مكمل بكائه قائلاً : معملش بس نفسي ايه ده انا اخدت بالكرباك السوداني على قفايا من غير احم ولا دستور، دول ٣٠ مليون جنيه!!! و الكارثة الأكبر ان الواطي مضاني عل عقد تنازل على كل املاكي في الشركة علشان هو عارف اني مش هراجع وراه وانا مرجعتش و مضيت و كل حاجة راحت خلاص راحت و هنبقى في الشارع!!!

مينجي تعكرت ملامحه للأسى اكتر قائلاً : متقولش كده بس يا بابا اكيد في حل!

والد مينجي : حل؟!! الحل عند أم حل، مفيش حل خلاص انا بضيع لا انا ضعت خلاص ضعت خلااصصصــ..

شرق في صياحه فـ قعد يكح وبعدين رجع يعيط تاني : اهيء اهيء اهيء أنا اتغفّلت اوي

كمل عياط و نواح بينما مينجي صاح بأعلى صوت عنده : يااا عثممنناااننن، انت يا زفت يالي اسمك عثمان!! يا عثثممماااااننن!

ظهر واحد من مكان ما في الشقة تحس انه جرسون في نفسه حاطط فوطه تلميع على كتفه وشبشب حمام على بدله رخيصه ولافف رقبته بـ كوفيه في الصيف : أمرك يا سيد المعلمين

مينجي اكمل صياح : ساااعه! ساعه علشان تدخل!!
هرش في دماغه وقال مبرراً : معلش اصلي بغلي المياه على نار

سخر مينجي : ليه هتسلخ نفسك!
ابتسم بوسع وقال : لا بعمل اندومي هييههيهيهي

رمقه مينجي بالجنب بسخط ثم اشارله بأيده : طب روح هات مياه للحج يلا بسرعه

سأله : مياه سقعه ولا سخنه؟؟

مينجي : عاديه، فاتره يعني
عثمان : فاتره ولا متغديه هاهاهاها

مينجي نزل جاب فرده الشبشب بتاعه حدفه عليه وصاح وهو بيشاورله : غور يلا وهات مياه على طول من غير هبل!!

ضرب التحيه العسكرية بدون مبرر : اوكيه يا باشا

التفت و مشي فـ مينجي زفر و شوّح بأيده بيتمتم : تتك نيله غبي، انا معرفش مين بس الحيوان اللي جابه عندنا ده!

أوقف والده البكاء و فجأه نزل على وشه بقلم ثلاثي الأبعاد طرقع وشه : انا الحيوان الي جابه عندنا يا كلب ها يا كلب!!