شقة رقم ٧

ماذا لو.. [ يونغي والسنة الجديدة ٢٠٢٢ ]

ماذا لو.. الحلقة ٢٢

- يونغي بيوجه رسالة بمناسبة العام الجديد ٢٠٢٢ -
( الجزء الثاني )

________

" كل عام و انتم في وش بعض يا جماعه و متجمعين على المصايب في الخير ، و بمناسبة أن النهارده آخر يوم في السنه التعيسه دي فـ احب أوجه رسالتي العظيمه ليكم

رسالتي السنادي مش لحد معين، هم خلاص عارفين نفسهم و خدوا كفايتهم من التهزيق السنين الي فاتت، ف نركز بقى على الناس الي مش لاقيين حد ينصحهم و انا جيت العبد لله انصحهم قبل ما يتخزوقوا

مبدأيا كده الي ليه فلوس عند حد أو متداين عن حد ياريت يلحق يسدد الي عليه قبل ما يتجري وراه و يتحلّق عليه من الديّانه زي الفرخه الي واخده انتيبايوتك، آه و الله هيتحلّق عليك و يبقى شكلك زبالة ، بس متقلقش من كتر الجري وراك هتخس فـ هتاخد الفورمه ببلاش وأهي تبقى حاجة عدله طلعت بيها من السنه دي بعد ما خدت على قفاك

بالنسبه بقى للناس الي بتخطط أنها تاكل هيلثي و مش هيلثي وعاملالي فيها مريم نور فـ أحب اطمنكوا ان الصحه هتبقى في النازل و المستشفيات هتقطع نفسها عليكوا من غير حاجة، والتارجت هيجري وراك يلسوعك ، ف مفيش داعي للتعب، كل يلا و عبي الكرش يلا محدش واخد منها حاجة، كل ياض

وأنت يالي عايم في بحر أحلام العصر إلى مغرقاك وفاكر انها في يوم من الأيام ممكن لقدر الله بعيد عن السامعين يعني تتحقق فـ أنت تنساها خالص علشان احنا داخلين على أيام هباب و هتفضل شايل الهم  في نفسك لحد ما تولع و مش هنلاقي طفايه حريق نطفيك بيها و هنفضل والعين أنا و أنت

والبت الي فاكره نفسها هترتبط وعايشالي في أحلامها الورديه، انزلي على أرض الواقع يا بت، هتفضل سينجل لحد آخر السنه ولا حد هيعبر اهلك وهتعنسي جنب امك و تولعي، هتفضلي زي فرده الشراب الي مش لاقيه اختها كده و محدش هيشيل قرفك و يستحمله في الآخر غيرنا احنا

و الي فاكره ان الدنيا هتبقى حب ونيله انتي اخرك تحبي نفسك يا بت محدش هيعبرك، ولو فكرتي ترتبطتي هتبقى علاقه كلها خوازيق، حتى طوب الأرض هيخزوقك معاهم 

بالنسبه بقى للناس إلي عمّاله تاخد اسكرينات بقالها سنتين من على المواقع على أمل أنها تشتريها السنادي فـ ان شاء الله احب اطمنهم ان الفقر هيفضل ملازكم برضو و مش هتعرفوا تشتروا حاجة و بردو هتفضلوا تاخدوا سكرينات و تحوشوها بس ان شاء الله هتبقى سنه سعيده عليكوا

والناس الي فاكره ان هيجيلها فلوس السنادي و دلقوا كل الي في جيبوهم السنه الي فاتت من غير عقل فـ احب اقولكوا انكوا هتشحتوا السنادي و هتشوفوا ايام سوداء و مش هتلاقوا حد يسلفكم لأن الناس كلها هتكون بتشحت اصلاً فـ تلم نفسك انت وصاحبك بقى و تنزل تشحت شحاته جماعيه لعل وعسى تصعبوا على حد فيسلفكم ده لو حصل يعني

بالنسبه بقى للناس الي كانت بتحاول تصفي حساباتها القديمه و تنهي مشاكلها من السنه الي فاتت و تبتدي السنه الجديدة على نظافه، احب اقولكوا السنه الجديده هتيجي و هتبتدي مشاكل جديده انيل وأكبر من المشاكل القديمه، هتلاقوا نفسكوا دخلتوا في ليڤل تاني خالص؛ ليڤل المحاكم و الجلسات والمحضرين و القواضي والهيصه الي مالهاش اخر دي و هتبقى ايام هباب عليك و على الي خلفوك يا حزين فـ نصيحتي ليكوا تبدأوا توكلوا محامين من دلوقتي علشان يلحقوا يخلصلكوا الإجراءات

ورسالتي بقى للناس الي فاكره أن الدنيا هتبقى هشتك بشتك بكره تضحك و تقع على وشك، يالي فاكرها هتبقى شخلعه و مرقعه و قله ادب آمالك راحت لبعيد يا حزين منك ليه و هيبقى فيه بعد الشخلعه لسوعه في فخادكم جامد و هتشوفوا أيام طين و هتقعدوا تنطحوا في بعض و تتعالج يلا أنت و اصحابك على نفقه الدوله من الحزن الي انت فيه

و إلى عنده أمل انها هتكون سنه سعيده عليه احسن من الحزن الي كان عايش فيه فـ احب اقوله انك هتفضل عايش في البؤس الي انت عايش فيه بردو و مفيش حاجة هتغير، كلها أرقام يعني هتفرق ايه بكره من النهاردة كلها أرقام و حروف و البؤس هيزيد هيزيد فـ نصيحتي ليكم كلموا حياتكم عادي لأن كده كده محدش واخد منها حاجة

السنه الي قبل الي فاتت جت كورونا الي يجحمها مطرح ما هي قاعده لحد دلوقتي، و رقدتنا كلنا و عيشتنا في كابوس بسبب واحد الله يجحمه مطرح ما هو قاعد حب يفطر شوربه خفافيش قرفنا و وقف حال الكوكب كله و نيمه من المغرب الله ياخده

فـ رسالتي الأخيره هتكون للأستاذ ده الي ودانا في داهيه و خنقنا في عيشتنا و طهقنا، ياريت لو نفسك تشرب شوربه خفافيش برجل الفرخه تاني ياريت تأجلها شويه علشان إحنا بسببك لحد دلوقتي متشلحين والدنيا في الشلاحات آخر حاجة ولسه، فهي مش ناقصه صدقني هي مش ناقصه

كفايه أن الشتاء السنادي دخل علينا بجنابه هو وعياله التسعه وشكلهم ضلّوا الطريق للقطب الشمالي وجم عندنا احنا مموتينا، و الكلاسين معادتش بتدفي زي زمان ولا نيله و ركبنا بتخبط في بعضها من السقعه و محدش طايق الي جنبه ، فـ اقعد كده جنب أمك و استهدى بالله و اطلب شوربه خضار عاديه أو صوم زي بقيت الناس هيكون افيد لينا و ليك والله 

وبس انا كده خلصت رسالتي للناس بمناسبة السنه الجديدة، و اتمنى اني اكون اديتكوا جرعه تفائل و أمل نبتدي بيها السنه الجديدة على نظافة و فتحت الدنيا في وشكوا، و اشوفكم على خير السنه الجايه على خير اذا متقتلناش بعد كل المصايب دي

و صوتي يا انشراح الي جاي انيل من الي راح، والسلام عليكم ورحمة الله وبركاته "

______

وأنت ايه هي رسالتك للسنة الجديدة ٢٠٢٢ ؟