THE FIRST TIME WE MET🌊 [COMPLETED]

AT WEDDING DAY_[ Taehyung's POV]

Unicode

ဖြန့်ခင်းထားသည့်ကော်ဇော်နီပေါ်သို့တစ်လှမ်းချင်း လှမ်းလာနေတဲ့သတို့သမီး။ ရုပ်နဲ့တွဲသည့်ခန္ဓာကိုယ်ဟာ ဘုန်းတော်ကြီး၏ဘေး၌ ရှိနေသော်လဲ ထိန်းချုပ်၍မဖြစ်နိုင်တဲ့ နာမ်ဟာဆိုရင်ဖြင့် တစ်ယောက်သောသူလေးဆီကိုသာရောက်နေခဲ့ပါတယ်။ ညာဘက်လက်ကောက်ဝတ်ပေါ်တွင် အကျအန နေရာယူထားသော ခရုလက်ပတ်လေးအားငုံ့ကြည့်မိသည့်အခါ ပြုံးရသေး၏။ ဒီသေးသေးမျှင်မျှင်အကွင်းလေးရဖို့အတွက် ဘယ်လောက်တောင်သူစိတ်ရှည်ခဲ့ရမလဲ။ ပြုလုပ်နေသည့် အရာတစ်ခုထဲပေါ်မှာသာ အာရုံစူးစိုက်တတ်တဲ့ ကောင်ငယ်လေးရဲ့ မျက်ခုံးထူထူတို့ ဘယ်အတိုင်းအတာလောက်များထိ စုကျုံ့နေလိုက်မလဲ။

လှစ်ကနဲပြုံးတတ်သည့်နှုတ်ခမ်းပါးတွေ၊ ကျွန်တော်သိပ်သဘောကျရတဲ့မျက်လုံးနက်နက်လေးတွေ၊ ပါးပေါ်၌တည် ရှိနေပါသောအမာရွတ်ကအစ နှုတ်ခမ်းပါးအောက်ရှိ မှဲ့လေးအဆုံး အကုန်လုံးမြတ်နိုးခဲ့ရတယ်။

ဆွန်းလီ၏ လက်ဖဝါးတစ်ဖက်ကို သူ့အဖေကတင်ပေးလာသည်။ ပြန်လည်ဆုပ်ကိုင်ခဲ့ခြင်းမရှိတဲ့ လက်ဖျားပေါ်မှာ သူမ၏ လက်လေးကပြုတ်ကျမှာစိုးသည့်သဖွယ်ကုပ်တွယ်ထား၏။ လုပ်ရိုးလုပ်စဉ်အတိုင်း ဘုန်းတော်ကြီးရှေ့တော်မှောက် နှစ်ဦးသားမျက်နှာချင်းဆိုင်ကြသည်။
ဇာပုဝါအောက်က သတို့သမီးရဲ့မျက်နှာ ဘယ်ပုံဘယ်သို့ဖြစ်နေမှန်းမသိပါ။ ပြန်တွေးကြည့်တဲ့အခါ ဆွန်းလီကိုခုမှသာမြင်ရခြင်းပင်။ လက်ထပ်ပွဲနေ့မှာ ကိုယ့်သတို့သမီးရဲ့ပုံစံကို ကျမ်းကျိန်ခါနီးမှ သိရတဲ့ သတို့သား။

ရှေ့ဆုံးနားလောက်မှာထိုင်နေသည့် ဖေဖေကမျက်နှာသိပ်မကောင်း။ ဘေးမှာ မေမေနဲ့ အမကပြုံးလျက်ကြည့်နေသည်။ မြင်ကွင်းထဲ သိပ်ကိုကြည်နူးစရာကောင်းတယ်ဟုများထင်နေကြတာလား။ မိဘများ၏နောက်မှာ ထိုင်နေသည်က ယူရှင်း။ ရုတ်တရက်ကြီး လက်ထပ်တော့မည်ဆိုတဲ့အကြောင်းသိသွားခဲ့တုန်းက ဘယ်လိုပြောပြောမယုံခဲ့တဲ့သူ။ လူပျိုကြီးက တစ်ယောက်တည်းကပျာကယာ ဒယ်ဂူဘက်သို့ဆင်းလာခဲ့သည်။ ပွဲမစခင် သူငယ်ချင်းနှစ်ယောက်စကားပြောဖြစ်ကြသေး၏။