(Uni)
"ဟာ....ငါတယ်ချောသကိုး"
မှန်ကိုကြည့်ရင်း ခေါင်းလိမ်းဆီလိမ်းကျံထားသောဆံပင်အား ဘီးဖြင့်သပ်တင်ကာ ချမ်းမြေ့ရေရွတ်လိုက်သည်။ ပြုံးဖြီးနေသည့်မျက်နှာကြီးမှာလည်းကျေနပ်မှုများအပြည့်ပင်။
စတစ်လက်ရှည် ကြက်သွေးရောင် နှင့် ယောပုဆိုးအနက်ရောင်မှာ မဖြူမညိုအသားရေရှိသော ချမ်းမြေ့ကိုယ်ပေါ်တွင်ပနံသင့်စွာရှိနေသည်။ ရှည်လျားသည့်အရပ်မှာလည်း ပုဆိုး၀တ်လိုက်မှပင် ပိုရှည်လာသယောင်ရှိကာ အချိုးစားကျသည့်ခန္ဓာကိုယ်နှင့်ချမ်းမြေ့မှာ ယောကျာ်းတစ်ယောက်၏ ချောမောခန့်ညားမှုအပေါင်း ခညောင်းလျှက်ရှိနေသည်။
တစ်ကိုယ်လုံးလှည့်၍မှန်ကိုစိတ်ကြိုက် ကြည့်ပြီးမှ အိမ်ပြင်သို့ထွက်လာခဲ့တော့သည်။ အိမ်ရှေ့ကွပ်ပစ်တွင်တော့ ဟန်ငြိမ်းနဲ့ မိရွှန်းမှာ အဆင်သင့်စောင့်လျှက်သား။ ဟန်ငြိမ်းမှာ အသားညိုသည့်အလျောက် ၀တ်ထားသည်က စတစ်အပြာနုနှင့်ပုဆိုးအပြာရင့်ပင်။ ချမ်းမြေ့မှာရယ်ချင်စိတ်ပင်ဖြစ်မိသွားသည်။ ဒီကောင် ကိုယ်နှင့်မလိုက်တာတွေအတော်၀တ်သည်ပင်။
သူငယ်ချင်းမ မိရွှန်းသည်တော့ ဗေဒါရောင် ပိုးပြောင်၀မ်းဆက်ကလေးနဲ့ ဖြစ်သည်။ အသားဖြူသည့် မိရွှန်းနဲ့အမှန်ပင်လိုက်သည်။ အင်္ကျီမှာရင်ဖုံး ခါးတင်လေးဖြစ်သဖြင့် သေးသွယ်သောခါးကလေးမှာ ပေါ်လွင်စွာပင်။ ပုခုံးအောက်ရောက်ရုံသာရှိသော ဆံပင်များကို ကျစ်ဆံမီးနှစ်ဖက်ခွဲ၍ ကျစ်ထားကာ ပါးမှာလည်း သနပ်ခါးများလိမ်းထားသေးသည်မှာ မသိလျှင်တကယ့်ရွာသူလေးလိုပင်။ ခုလိုကျတော့လည်း သူ့သူငယ်ချင်းမလေးမှာ ချစ်စရာလေးပင်ဟုချမ်းမြေ့တွေးမိသည်။
အိမ်ထဲထွက်လာသည့်ချမ်းမြေ့ကိုမြင်သည်နှင့် မိရွှန်းမမျက်နှာမှာစူပုပ်သွားကာ ခနဲ့တော့သည်။
"ကြာလိုက်တာဟယ်....မသိရင် သူပဲမင်္ဂလာဆောင်မယ့်အတိုင်း"
"အေးလေ....မလှတဲ့ရုပ်များ ပြင်နေသေး"
ဟန်ငြိမ်းကလည်း ၀င်ဖဲ့ပြန်သည်။ ဒီနှစ်ယောက်ကား ချမ်းမြေ့အားနှိပ်ကွပ်ဖို့ဆိုရင် အမြဲအတိုင်ဖောက်ညီနေတော့သည်။
YOU ARE READING
"အကြင်နာပိုပါသည် မောင့်ဟန်ချီ"(Completed)
Short Story"မောင့်နာမည် ချမ်းမြေ့မောင်ပါ ဟန်ချီရဲ့စိတ်ရောကိုယ်ရောနှစ်ပါးစလုံးကိုရွှင်လန်းချမ်းမြေ့စေမယ့်ချမ်းမြေ့မောင်ပါခင်ဗျာ... ဟဲဟဲ" //ချမ်းမြေ့မောင် "ဒီမျက်နှာရူးကတော့လား...." //လှမျက်ဟန်ချီ (ကျေးလက်ဟာသလေးပါနော်။ ပေါ့ပေါ့ပါးပါးလေးပါပဲ။ကျွန်တော့်ရဲ့ပထမဆုံး...
