قرية النساء🕌مكتملة🕌

🕌الجزء 14🕌

#سلوى_العلوي ✍️
🕌#قرية_النساء 🕌
البارت 14👑
في قرية النساء .. الليل ظلام بلا قمرة والنهار ضو بلا شمس .. ماء مالح بلا ملحة كيعمر لوجوه ويحرق لقلوب .. قررات القايدة يزة وقرارها ما فيه رجوع ..
يزة: سمعيني ألويزة تيثريت مشات للقصر غاتبقى تما يعني ماكاين من غيرك يسخنلي كتافي ويقوم مقامي ويسير قريتنا لحبيبة لي نزل عليها نحس إلا كان هادشي من عند الخالق مارحبا بيه ويلا كان من عند العبد الله ياخد الحق
لويزة: آمين أيزة ، ولكن كون غير علمتي الحاكم أحمد إلا جا ومالقاكش آش نقول
يزة: قولي مشيت نقلب على شمس القرية لي غربات وقمرها لي خسف
لويزة: الله يعرضك السلامة وينقي طريقك من الشوك وترجعيلنا نتي ولبنات سالمة غانمة يا ربيي
يزة: آميين ألويزة الله يحفظكوم من كل شر
شدات يزة الطريق على عودها لقبيلة العطارين في بلاد الشمال (هي قبيلة الشيخ قريبة ليهوم بحكم أنهم جايين فحدود البلدان بجوج) طول الطريق وهي مهمومة مغمومة .. ماعندها جهد تتلقى اللومة .. كان عليها تصون قريتها وديير خدمتها على أكمل وجه.. ولكن هي غفلات وفعز غفلتها تغدرات .. بعد ساعات وصلات أخيرا لبلاد الشمال وتوجهات لقبيلة مجاورة لقبيلة العطارين ولي هي قبيلتها .. سنين طويلة دازت ماعتبات هاد العتبة .. وما عرفات آش وقع من بعد غيابها .. خلات كولشي وماولاتش تلفتات .. واش يكونو واليديها مازالين فالحياة ولا مول الأمانة دا أمانتو .. فجأة فكرة أن والديها ماتو ساخطين عليها طيحاتلها الماء في الركابي وخلاتها تولي بلا عقل ..دخلات لقبيلة تا حاجة ماتبدلات كولشي كيما خلاتو توجهات لدارهم دقات مرة وجوج وثلاثة حتى كانت راجعة بحالها فاقدة الأمل حلاتلها عجوز ما قادة حتى تتمشى .. لحظة صمت تكلمو فيها غير العيون .. مشاعر كثييرة توغلات فقلبهوم وغير صوت الشهقات تعالى .. كانت هادي أم يزة تعانقو عناق حار .. عناق ليي سنين وهوما متمنيينو .. سنين وهوما فاقدينو بعد مدة خرج راجل شايب عكازو فيدو وضهرو مايل .. كان جاي يشوف شكون الزاير ماتخيلش تكون بنتو لي تخلى عليها هادي سنين باقا حية وجات تشوفهوم ..
الحاج: بنتي يزة
يزة دارت بالعرض البطيء ومشات طاحت على يديه كاتبوسها وتطلب السماحة وحتى هو كايطلبها منها .. كان مشهد ددرامي بامتياز كايخلي لقلوب تتأثر ...
بعد مرور دقائق دخلو لداخل وبقاو كايسقسيو على الأحوال ويستفسرو من يزة فين كانت كل هاد السنوات .. عاوداتلهوم كولشي من نهار خرجات حتى لهاد النهار لي رجعات
الحاج: إيوا أبنتي ماعندي مانخبي عليك شيخ قبيلة العطارين معروف عليه عيفة الرجال كايتاجر فالعيالات وتا حد ماقادر يوصل للحاكم يخبرو حيت ببساطة كايصفيهالو
يزة: وشنو المعمول أبا راهوم بنياتي لي ماولدتش من كرشي آش ندير ما بيدي حيلة حاسة براسي لأول مرة ضعيفة
الحاجة: الصبر أبنيتي الصبر
يزة : الصبر كايدبر أيما هاد الغلا والنـفاق طـير نـعاسي أللحم الشارف هرس ضراسي السرقه والـكذوب ذوبو نـحاسي ما بقيت عارفة ساسي من راسي
الحاج : يكون خير أبنتي يكون خيير
يزة: ونعم بالله أبابا (مع ترقيق البا)
نمشيو بعجالة نشوفو بهاء الدين فين صد وشنو كادير .. كان واقف بعيد على هو ودربال كايراقبو باب الدار .. آيييه أشرفة تبع يزة يعرفها فين غادة حيت كيما عرف من واحد الحارس سيليا خرجات من القرية (ماقالوش تخطفات) وجا يشوف واش يزة عارفاها فين كاينة قرر يتبعها ما عندو مايخسر كثر من لي خسرو ..
بعد ساعات خرجات يزة ركبات على عودها وشدات الطريق ثاني .. بقا متبعها حتى وصلو لقبيلة ثانية وقدام دار كبيرة وقفات كاتأمل وتحاول تتقدم .. فجأة تحلات الباب ويزة تخبات وحتى بهاء الدين ودربال .. كان الشيخ خارج مع خادم كايدويو وهو معصب ..
الشيخ: كولشي بسبابكووم هاديي همزة ضاعت من يدييناا ونتوومااا كيف الوليات ماقديتو تحضيوها
الخادم: سمحلي أسيدي أنا قست نبضها كان ضعيف ضنيتها كاتموت
الشيخ: والبااببب البااابب لاش يبقى مفتوح
حنى الخادم راسو وزادو هو والشيخ .. بهاء الدين عرف بللي هاد الكلام ماشي عادي وخاصة ملي شاف يزة مشات لعودها كتخلف استنتج بلي هادشي عندو علاقة فحبيبتو .. شنو زعمة تكون تخطفات؟؟ مجرد الفكرة خلعاتو وخلات قلبو تتسارق نبضاتو
بهاء الدين: درباال واقيلة سيليا تخطفات 😡
دربال: وشنو المعمول أمولاي ؟
بهاء الدين: لي فهمت من الكلام أنها فغفلة منهوم هربات (بتاسم حيت فكر بلي هي مرة وقادة وولا جمع الابتسامة وقرن حجبانو) خاصنا نقلبو القبيلة شبر شبر ويلا مالقيناها نشوفو القبيلة لي موراها
دربال: لي درتيها أنا معاك أمولاي ولكن كون غير صيفتي مرسول للقصر يخبرهوم بلي نتا بيخير وعلى خير
بهاء الدين: عندك الحق أدربال زيد نمشيو نكريو مرسول مأمن يوصل الرسالة
مشاو عند سمسار دلهوم على المرسول لي غايوصل رسالة بهاء لقصر الفقهة .. الرسالة كان بهاء كاتب فيها بلي هو في بلاد الشمال بيخير وعلى خير وكايقلب على البنت لي أسراتو من أول نظرة ...
فنظركم البنات واش يزة وبهاء غايلقاو سيليا؟ ولا غير كايكبو الما في الرملة ؟ هادشي لي غانعرفوه فالأجزاء المقبلة من #قرية_النساء💃