💎مكتملة💎
❌حصرية على الواتباد❌
قصة رمضانية 🌙🕌 تحمل في طياتها عبر وكلام موزون .. كيخلي السامع يتنغم والراوي يفكر..😍
العنوان:#قرية_النساء💃
للكاتبة: #سلوى_العلوي ✍️
⚜️🏰⚜️
حجايتنا كتهدر على زمان غير زمانا وناس غير ناسنا نبداوها باسم الله ونصليو...
#سلوى_العلوي ✍️ 🕌#قرية_النساء 🕌 البارت 54 👑 مشارف النهاية 🥀 شحال من مرة كانقولو الدنيا عطاتنا بالضهر .. لكن هاديك كاتكون غير عقبة كانفوتوها باش نلقاو واقع حسن .. مكاين لاش نكتاءبو ونتشاءمو وديما نسبقو الحاجة الخايبة على الزوينة .. "تفاءلوا بالخير تجدوه" ديما نفكرو فالزوين عاد الخايب .. ديما نقولو ان شاء الله خير عاد نفكرو فالشر .. ديما نواسيو راسنا قبل مايواسينا واحد آخر .. هادو من سيمات الصبر .. نحمدو الله على المرة ونفرحو للحلوة .. نشوفو اليوم وآش صاري اليوم قبل مانشوفو اش غايصرى غدا .. هادي هي الدنيا وهادي هي الحياة .. كانقولو حتى زين ماخطاتو لولة .. اوى حتى عيشة ماخطاوها مشاكل ... تسمعات غوتة فأرجاء المكان غوتة لي رجعات الدم لوجهو .. داك الصوت لي عمرو ينساه .. النهار اللول لي سمعو تفتن بيه وصابو سهام العشق قلبو .. حتى ولات كل نبضة كاتنبض بإسمها هي .. وكل ثانية بلا بيها دهر من الزمان.. وكل حرف من إسمها شعر من أشعار عنترة بن شداد .. واخا الدنيا كولها تحاربو هو غايحارب غير على قبلها .. سيليا: بهاء الدييينن عنداااك ما استوعب معنى الكلمات حتى استوعب الصوت لي سمع دار على أساس يشوفها هي لكن شاف سيف جاي جيهتو بالدعقة وبالتلفة هرب وجهو فآخر لحظة وكولشي كايدوز قدام عينو بسرعة مهولة بقا كايهرب راسو ويحاول يستوعب آش واقع بضبط حتى جبد سيفو وبدا يتحارب .. باغي يفهم وماباغيش .. باغي يتيق الفكرة لي جاتو لبالو للحظة وماباغيش بهاء الدين: دربال ماللك واش حماقيتي دربال: آه حمااققييتتت صاافيي تصطييت اليوم نقتلك قبل مانموت أنا عمري فنى على ود هاد اللحظة واخا نموت غانموت مرتاح بقى بهاء الدين كايتحارب معاه والرجال لي كانو مع دربال ومع بهاء الدين على أساس حرس كايتحاربو مع فخر الدين وسيليا وحراس القصر لي جابو معاهوم .. كانو كايتقاتلو كأنه آخر يوم فحياتهوم إما يعيشو كاملين أو يموتو كاملين .. حتال واحد اللحظة لمحات سيليا شخص من مور بهاء الدين باغي يطعنو وهو كايتحارب مع دربال ومافاهمش آش واقع مشات بالخف خلات فخر الدين يحميها باش تتسلت وصلات فآخر لحظة دفعات سيف الشخص لي كان مخبي وجهو وحاولات تحيد لتامو حتى كاتلقاها مرا 😳 ..... فلاش 🔙 نرجعو شوية للور قبل يوم ...سيليا بقات كاتخمم فشنو دير واش تمشي ولا تبقى .. عقلها كايقول حاجة وقلبها كايقول حاجة تانية قررات تسيفط بعض الحراس يمشيو للطريق بين بلاد الشمال وبلاد الشرفة الى لقاو بهاء الدين يحميوه والى مالقاوهش يرجعو وهي فالصباح غاتشد الطريق تتبعهوم ... حيت كيمما كان الحال ماتقدرش تمشي بوحدها وعرفات من إيمان بلي بهاء الدين سيفط مرسول لفخر لي أكيد غايكون جاي فالطريق .. من الأفضل تتسناه حتى يوصل حيت هاد الساعة هو الوحيد لي تايقة فيه...فاتت ديك الليللة على أبطالنا بحال مئة عام .. بهاء الدين ناعس فالخلا كايرتاحو باش لغد ليه يكملو طريقهوم لبلاد الشرفة .. وسيليا لي هازة سلهامو منعساه حداها وكاتبكي .. كيما كان الحال هادا راجلها .. قطعة من روحها .. لي ماعارفاش حالتو دابا كيف دايرة .. ماعارفاش واش وصلو ليه ولا .. واش واقعاليه شي حاجة ولا راه سالم .. الجفون حلفات ماتسد .. والليل غادرهم وجا الصباح وهوما على حالهم .. مع شروق أشعة الشمس وصل فخر الدين للقصر وهو بحال الرمانة لمغمضة .. مشا بعدا عند إيمان يشوفها (راها مراتو زعمة البنات 😂🙄) تلقاتلو بالأحضان والدموع مالية عينها مور ماترومانساو مزيان عاد سولها على آش واقع فخر الدين: شنو الأخبار ؟ بهاء باقي مارجع إيمان:(مسحات دموعها) حبيبي شووف هادشي لي غانقولك دابا بغيتك تشد فراسك باش تسمعو فخر الدين:(مشا بالو مع بهاء الدين ولا سيليا واحد فيهوم تكون واقعالو شي حاجة قرن حجبانو دغيا) شنووو شننووو واقع ؟ إيمان: سيليا رجعات 😳 فخر الدين:شنوو كيفااشش؟ 😳 إيمان:هي رجعات وبهاء غبر ليه الأثر 😳 فخر الدين: حبيبة واش عارفة شكاتقولي .. انا بانليي حماقيتي مور ماتخطفات سيليا سيليا:(كانت جايا موراه) ماتسطاتش أنا رجعت وبهاء مازال وهو دابا فخطر فخر الدين:(تلفت ليها مصدوم) مرات خويا (شاف فالضرابي ويديها لمجروحين وقرن حجبانو) شنوو دارووولك ؟ سيليا: ماشي وقتو دابا .. بهاء الدين راه فخطر والمشكل أن لي مشكل عليه خطر قريب ليه فخر الدين: كيفاش سيليا: لي كايدلو دوك المكائد كاملين هو دربال وهو لي خطفني فخر الدين:(مصدوم لسانو تعقد ماعارف مايقول وكايحاول يدخلها لدماغو باش لعل وعسى يفهم ) ك ك كيفاش دربال .. لكن دربال مشى مع بهاء الدين كي دار خطفك .. ولكن علاش أصلا .. كيفاش ؟؟ سيليا: فخر الدين غيير تهدن دابا هادشي كامل غانفهموه من بعد دابا زيد نشدو الطريق خاصنا نلحقوه دابااا جراتو دغيا ووصات إيمان تخلي عينها على كولشي ومشاو ... نهاية الفلاش 🔙 بنات فنضركم علاش دربال كايدير هادشي كامل؟ وشكون ديك المرا لي معاوناه فخططو أو بالأحرى محرضاه؟ هادشي لي غانعرفوه فالأجزاء المقبلة من قصتنا #قرية_النساء💃 بهاء الدين و دربال 👇
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
