قرية النساء🕌مكتملة🕌

🕌الجزء 27🕌

#سلوى_العلوي ✍️
🕌#قرية_النساء 🕌
البارت 27 👑
قالتلي جدة شحال من فم يهدر بلاما يفهم .. شحال من واحد ظلم بلاما يخمم .. شحال من قلب غارق فالهم بلاما يتكلم وشحال من واحد يضحك وفداخلو يتألم .. هادي كانت حالة أبطال قصتنا كل واحد يا واحد يمكن تخداو قرارات كثيرة جرحات ناس كثيرة لكن كولشي مبسم وراضي فالمكتاب حيت كيما كان الحال المصلحة هي الأساس ... فات شهر وشهر وقعو فيه بزاااف دالأحداث الهلال ولا قمرة والقمرة ولات هلال .. سيليا ولات من عاتق لمخطوبة ودات سيد الرجال .. أحمد آشش غانقول سلطان بلاد الشرفة رد همو لقلبو وطفا نارو فاش شاف ابتسامة بنتو .. أما بهاء كمل شروطو وها هو اليوم كايترسم حاكم على بلاد الفقهة بحضور محبوبتو لي ناوي مور مايتسلم التاج يدير فرح سبعيام تولي مرتو وان شاء الله ام ولادو فالشرع وقدام الناس .. أكيد مافهمتو والو من هاد لكلام إيوا أسيادنا نرجعو شوية للور قبل شهر
فلاش 🔙
أحمد: جمعتكوم اليوم أولا باش نحتافلوو برجوع بنتي الغزالة سيليا وثانيا باش نقول قدام كولشي بللي أنا تاجي حاطو بين يدين بنتي يا إما تقبلو أولا تردو أنا ماغانفرض عليك حتى حاجة فكري وردي علي الخبار
سيليا: عمي نقدرو نتشاركو لكلام أنا وياك بوحدنا
أحمد : أييه أبنتي تفضلي معايا
مشاو سيليا وأحمد لجناحو تكلمو وتناقشو ورجعو شي كايشوف فشي .. شي حشمان وشي زعفان ..
أحمد: بهاء الدين(بهاء الدين شاف فيه) جيب أولدي واليديك وجي خطب لالات لبنات على سنة الله ورسوله
كولشي تصدم ظنو بلي سيليا غاتختار لحكام لكن كل بنت عندها مصيرها كتبولها الله وما تمشي غير فين مشاك الله هي مراة وقادة بقدودها لكن كاتشوف تسلمها للحكام فسنها ماليه لزوم وعمها ماشاء الله قيم بالواجب وشعبو كايحبو ويقدروا هي فكرات بعقلها من ديما كانت حكيمة ورزينة ماكاتاخد القرار حتى تضربلو ألف حساب وماكاتنطق لكلام حتى توزنو بألف مثقال .. بداو التبركات والتهاني وبهاء الدين كايطير فالعالي مامصدقش بلي غاتولي ليه ملكة قلبو لي عشقها من أول نظرة أما سيليا مانقدروش نفسرو مشاعرها فهاد اللحظة حب خوف امتنان حزن ألم شوق
حب كاتشوف بيه الإنسان لي عشقاتو لي شافتو فوق التل أول مرة لي داوات جرحو وسرقات قلبو
خوف من المستقبل من القرار
امتنان لعمها لي تفهمها بصدر رحب لي حط سعادتها فوق مصلحتو هو
حزن حيت غاتفارق عائلتها  كل بنت من دار باها خارجة وكيما كايقولو دار لبنات البارح عامرة وليوم خوات غاتخلي مها قرة عينها غاتخلي نساء قريتها صحاباتها أو نقولو خواتاتها غاتخلي عمها لي فمثابة باها غاتخلي سيليا البنت لعويتقة الصغيورة وغاتولي مرأة مزوجة وهازا مسؤولية كبر منها
ألم ماقدراتش تفسرو علاش قلبها دارها. ولكن أنا نفسرو داك الإحساس لي كايجيك قبل الزواج كايضيق صدرك بلا سبب وكاينزلو دموعك بلا توقف دماغك كاكون خاوي يمكن الضغط النفسي أو تضارب المشاعر هو لي كايخلق فينا هاد الألم
شوق مشتاقة من دابا لحياتها السابقة لي ماعرفاتها واش غاتبدل للأحسن أو للأسوء ما عارفا راسها من رجليها أمها كاتشوف فيها قدامها وهي مشتاقالها من دابا دادها إيمان لي وقفات معاها فمحنتها لويزة وحتى خصاماتها مع وردة لي لمحات دمعة نازلة من عيونها كيفما كان الحال واخا ديما مناكرات لكن كايبقاو خواتات وعاشو مع بعض سنوات كثار
يمكن البنات هاد الجزء من القصة غاندوي فيه على شعور البنت لي كاتخرج من دار باها كولنا بنات منا لي عاشو هاد اللحظة ومنا لي مازال غاتعيشها .. سيليا فهاد اللحظة بالذات تفكرات باها يمكن عمرها شافتو والا عرفاتو لكنها بغاتو من قلبها حساتو فجانبها وكان مرات كثيرة كايزورها فمنامها بلاما تشوف وجهو عرفاتو هو كان كاينصحها واخا غير فالحلم يمكن هادو كانو مجرد خيالات لكن هي كانت كاتزول بيهوم الاشتياق .. تمنات لو فهاد اللحظة بالذات بهاء هدر مع باها وطلب يدها منو وجا وسولها على رأيها وهي حدرات راسها بحشمة وتعالات الزغاريت وباس راسها بحب وقالها "مبروك عليك أبنتي" نزلات دموعها بهستيريا كولشي كايشوف فيها آش صاريلها واش هادي سيليا لي عمرها بكاات ولا نزلات الدمعة حدامن ما كان بهاء تخلع زعما تكون مابغاتش زواجها منو أمها الشخص لوحيد لي فهم مالها مشات ليها وعنقاتها بحنان بحاللا كاتقولها إلى باك مات أنا مازالة فالحياة
نهاية الفلاش 🔙