قرية النساء🕌مكتملة🕌

🕌الجزء 58🕌

#سلوى_العلوي ✍️
🕌#قرية_النساء 🕌
البارت 58 👑
مشارف النهاية 🥀
فاتو يومين .. كانت ثقيلة على قلوب الجميع .. توتر رهيب كيحيط بهاد القصر .. وكأنه من يوم غادرو سلطانو حزن عليه وحلف بلي الداخل ليه يدير حداد رغما عنه ..كانو ساعات في الجحيم بالنسبة للبعض .. وساعات مرات كلمح البصر بالنسبة للبعض الآخر .. لكن المهم أنها دازت وجا اليوم لي غايتحطو فيه النقط على الحروف ..
وصل رحال مخلوع .. قال مع بالو ماستدعاوه إلا وشي حاجة كبيرة واقعة .. وهاد الحاجة خاصو يوجد راسو نفسيا وجسديا ليها .. دخل لقاعة الحكم بعدما استقبلوه الخدم .. لقا لمة عائلية كاملة متكاملة ناقسها حاجة وحدة .. الدفئ .. برود رهيب كان فديك الغرفة ..برود خارج من الأجساد ديال هاد الناس لي كالسين .. وهالة مخيفة عصفات بقلبه بحاللا حس بلي هادشي ماغايدوزش بخير وغايتلقا شي خبر يشل ركابيه .. دور وجهو بحاللا كايحاول يتفحص الوجوه الموجودة حتى لمح داك الوجه .. كيفاش ينسى الوجه المليء بالشر لي عيشو فجحيم .. الوجه لي خلاه يتمنى الموت ومايلقاهاش .. الوجه لي عذبو فحياتو وكوالو قلبو كولشي لاحظ نظراتو المرعبة فداك الجهة وتلفتو يشوفو واش شاف شي جن .. لكن لقاوه كايشوف فأم دربال
بهاء الدين:(وعلى وجهه ابتسامة ساخرة) با كاتعرفها إذا؟
رحال:(دور وجهو لولدو كايحاول يستوعب كلماتو شنو زعما عاوداتلهوم بلي كانت كاتعرفو ) كيفاش ؟
بهاء الدين: راك سمعتيني الواليد كاتعرف هاد المرا ياك ؟
رحال:(بلع الغصة لي جاتو فحلقو باش يقدر يهدر ) ا ا اه  علاش ؟
بهاء الدين:(دار يدو على راسو زعما باه يكون قلبو حجر حتال هاد الدرجة ماقبلش يعتارف بولدو) منين كاتعرفها
رحال:(قرن حجبانو بغضب ماحاملش الموقف ككل ولدو كايهدر معاه بحاللا هو مذنب قدام كاع هاد الناس الكالسين) علاش كاتهدر معايا بهاد الطريقة بحاللا كاتستجوبني ؟
بهاء الدين: حيت أبا بصح كانستجوبك .. منين كاتعرف هاد المرا؟؟
رحال: معرفة قديمة من زمان آش عرفك نتا بيها وآش وصلك لهاد السحارة
المرا:(نقزات من العدم) سحارة .. لاش كاتقلب عليا الجرة جاوب ولدك منين كاتعرفني
رحال:(كان غادي ليها يدفنها حية كونما بهاء الدين منعو) بااا .. جاوب بغييت نففههم حييت بصصح غانحماق .. جاااوبنييي منين كاتعرفها
رحال:(حنحن وقال بضيق) كانت عندي علاقة بيها شحال هادي من عام
كولشي تصدم .. كولشي كان باغيي رحال يقول ماكانعرفهاش يننككر ويكذب لكن هو ماشي من النوع الكداب .. إنسان حقاني ماكايكدبش ..لكن واش إنسان حقاني غايلوح ولدو لي من صلبو ؟؟
بهاء الدين:(بصدمة) هاد المرا هي أم دربال ودربال هو ولدك يعني داكشي لي تقال بصح ... نتا لحتي ولدك؟؟؟؟😳

رحال: شنووووو ؟ آششش كاتخرربق .. شغانلوح واشمن ولد .. (شاف فالمرا بغضب ) واااش ماباغاش التوبي يا السحارة باقا قاطعة يدك من يد الرحمان الله ياخد فيك الحق
بهاء الدين:(علا صوتو باش باه يسمعو) باااا باراكاااا كولنا كانعرفو نعايرو ونحطو اللومة دابا غاتفهمني كولشي
قاطعو صوت أنثوي داخل مع الباب وبنبرة حزينة كاسية محياه
رمانة : أنا نقولكوم شنو طرا
تلفتولها الحاضرين بذهول .. صدمة مور صدمة تا واحد ماعارف شكون يتيق ولمن يسمع وشكون يتبع .. كلسات رمانة بحاللا كاتستاعد تحكيلهوم حجاية
رمانة: هادي سنين كان رحال ولي عهد بلاد الفقهة .. كان شاب وسيم وأي وحدة تحلم بيه ومنهوم أنا بنت عمو .. كان كولشي كايقول رمانة لرحال ورحال لرمانة حتى كبرنا وبقات الكلمة هي الكلمة وخطبونا لبعضنا البعض في انتظار أن رحال يكمل حفظو للقرآن ويضبط قواعدو وأحكامو .. فهاد الأثناء كانو جواري كيما كاتعرفو فداك الزمان أما دابا مابقيناش كانقبلو بيهوم .. جات جارية زوينة ومقبولة كانت صديقتي ولأول مرة جارية تصاحب أميرة .. ظنيتها ضريفة ونبيهة لكن اكتشفت أنها كانت باغا تقرب لرحال بأي طريقة .. بعد أيام وليت ملاحظة بلي الراجل لي عرفتو سنين بدا كايتقلب عليا مابقاش حامل يقربلي ولا يشد بيدي .. وبالمقابل ولا ديما تابعها بحال المسحور .. فالأول شكيت لكن فالأخير قلت هو إنسان حامل للقران محصن بإيمان ماغاضرو حتى حاجة .. حتى وصل اليوم لي تهز فيه سكوني وراحتي نهار سمعتو كايدوي مع عمي باغي يتزوج بالجارية حورية .. تصدمت وحزنت وطبعا عمي ماوافقش ولا عمرو كان غايوافق على هاد المهزلة ..مشات أيام وجات أيام ..لاحظنا بلي رحال بدا يبعد على طريق الله لا صلاة لا حفظ قرآن حتى انه بعد على عائلتو ولا غير ساهي .. حماتي مسكينة شكات بلي ولدها مسحور لا وتأكدات حيت حالتو ماكاتبشرش بالخير مايمكنش إنسان يتبدل بين ليلة ونهار بلا سبب .. ومن محاسن الصدف الحكيم طوفان كان فالبلاد .. استدعاء عمي وجا مع حط رجلو فباب القصر رجع خطوة لور
طوفان: هاد القصر فيه شر كبير ...
مشينا عند أفضل علماء الدين فالبلاد وقالنا بلي القران هو الحل الوحيد لهادشي أو خاص السحر يتفك .. جبنا هاد السحارة لي قاطعة يدها من يد الرحمان .. وبززنا عليها تفك السحر ..لكن حيت قلبها كحل وعارفة ماغاديش تاخد داكشي لي بغات بقات كاتلعب برحال حتى كان كايتمنى الموت بالألم لي كايجيه .. فاتو أيام وحنا كانرقيوه حتى ولا مزيان والسجن لي كانت فيه خرجناها منو ونفيناها .. رجعات مور سنين طويلة معاها ولد وقالت لرحال هادا ولدك لكن طبعا ماتيقناهاش .. عيات تغوت وتحاول تلصقو فيه بسيف ولكن الامور كانت واضحة الولد صغيرة بزاف على اأنه يكون ولد رحال .. في المقابل بقى فيناومابغيناش نخليوه مع سحارة دير فيه مابغات (شافت فدربال) ولكن الضاهر لي دارت داكشي لي فراسها (وقفات وشافت فولدها) هادشي لي كاين أولدي مازدت مانقصت
كولشي كان كايشوف مذهول من هاد القصة لي ماعرفو واش يتأثرو بيها ولا يبكيو ولا يضحكو ولا مايتيقوهاش فالأصل .. مافاقو غير على صوت ضحك أنثوي عالي تلفتو لقاوها السحارة حورية
حورية :(كاضحك بحال الحمقة) كانن رحاال ديااللي كونما نتييي كون رااحنا عشنا مزياااانين كون ما عمرتيلهوم راسهوم كوراحنا ولدنا وعشنا مع ولادناا نتوووما خليتوني نولي هاككاا ونستاغل ولاد الناس نتووما رديتوني خايبة
بهاء الدين: (شاد فراسو ) يعني دابا دربال ماشي ولدك(شاف فيها)
حورية:(كاتشوف فيه بتمعن) كنتي نتا غاتكون ولدي أنا ماشي ولدها هي 🤣
بقاو غير كايشوفو فيها أكيد حماقت والسحر ديالها هو لي حمقها "لا يفلح الساحر حيث أتى" دربال مسكين بقى مصدوم .. ماعارفش كيفاش عاش حياتو كاملة فكدبة وهو حاقد على شخص ماخلاه مخصوص من تا حاجة عاش فخيرو وحسبو صديقو وهو آش دار .. غدرو وحاول يقتلو ما مرة ما جوج ... حنى راسو وبكى آه بكى ماشي غير المظلوم لي كايبكي حتى الظالم كايبكي .. كايبكي حيت دار حاجة لي كاتعتابر جرم وإثم .. بقى كيردد كلمة وحدة وهو كيبكي "سمحلي" كانت اللوحة محزنة .. مؤلمة .. جارحة .. كانت لوحة فيها أطراف كثيرة .. وتظلمو فيها ناس كثار .. وفالأخير عاناو فيها ناس كثار ...
#قرية_النساء💃