اني انصدمت ..
وهيه غطت روحها ..
الموقف جان ثواني ..
مو اكثر ..
ماعرف شصار بيه ..استغفر الله احس شفت اختي ..
درت وجهي سديت الباب وطلعت ..
مقابيل الغرفه ع جهه اليسار درج ..
احس شلون واحد ضغطه يصعد .وفجاءة ينزل ..
هجي ..رحت كعدت ..
ع بايه الدرج ..شوية وارتاحيت ..
صعدت ..فوك ..للغرفه القديمه
جان امير كاعد يتصل بلفون ..
طبيت ..كال
خير شبيك ..
ماكو شي ..
بدون حجي جريت فراش وذبيته بلكاع ..
اسمعه يسولف ..وسدة ..
كلي ..شبيك شصار ..
ماكو شي ..اريد اتام ..
ليش متنام جوة ..
معليك انت ..
نزل كعد يمي ع الفراش ..
شكو شصار ..؟متعاركين ..
كتله ويامن ..
وي روايه ..
صفنت عليه شجاوبة هذا !
كتله امير ..لو انت بعمري ..وتزوج روايه ..
عادي تتقبلها ..
سكت ..
كال ..ماعرف ..
كتله عود من تعرف تعال اححي ..
وغطيت راسي ..
كال اوكف اوكف ..
لخاطر اخوي وجهاله عادي اتقبلها ..
كتله مابيها خاطر وربك ..احسها خيانه هاي ..
كال لا يمعود شنو السالفه ..
خوب انه اكثر منك عشت بيناتهم ..
بس الحياه تمشي مدري ليش انت مصعبها ..
كتله دروح خلي انام يلفهيم ..
جاي يتمنطق براسي ..
الحياه تمشي ..
واحنه نطير مو ..
هههه مو صوجك صوجي اني ..
اسالك ..
غطيت راسي ..ضل هوة يدودو .يسولف بحس ناصي ..
هيج هزني لشوك لذيج الايام..
اي جنت جوة البطانيه اسولف ..
ويطرالفجر واحنه نحجي ..
شكد نحجي ومانتعب ..ولا نمل ..
ومرات اغفى ..واكعد واشوف الفون يمي ..
ايام حلوة بيها ذكرى حلوة ..
انكلبت ..وخليت ايدي جوة راسي.
واعاين ع السكف
كتله ربي مو بعيدة جانت ..
جان ..هسة ..فرشة بيضة ..
واخشاب جديدة ..
ومحبوبتي بيها ..
ماريدن ضوة ولا شمعه ..ولا عطر ..
هيه بيها كل هالصفات ..
هناك واكطع فكري ..
واكول كل شي انتهى عليمن انه احرك بروحي.
واضل افكر ..
بس مرات اضحك ع سخريه القدر ..
اني ازوج غصب ..
وريحانه غصب ..
ورواية ..ترضي مجتمع ..
منو المرتاح لعد ؟...
ثاني يوم ..نزلت ..المغسله جوة الدرج ..تصير
امي مدت راسها ..هايمه شو ..فوك نايم ..
كتلها صباح الخير ..
وغسلت
ورحت للهول كعدت ..
دك جوالي ..
اباوع ..اهلنا من الناصريه ..
جاوبت ..
ياهلا ..ابن عمي شلونك ..
وسلم عليه ..
امر كول ..
كال..كرار ابن فلان ..تعرفه
شبي ..
اطوع وياكم ..
كتله مو هذا الي ابو شهيد بسبايكر ..
كال ي هوة ..
وين متعرف مكانه ..
كال تابع ..للولاء .......كتائب ......تكريت ..
اها ..
شكد عمرة ..
16
كمت ..كتله جذب ..
والله شبيك ..
ترة اني ماذكرة .يمكن شايفه وي ابو الله يرحمه مرة .مرتين ..
طبعا ابو كرار ..عمام والدي ..استشهد بمذبحه سبايكر .
اخ سبايكر ..
احس بعدها ..ماشفنه راحه ..ابد ..
الاف الشباب ..وينهم ..
منهم الي نقتل ..
ومنهم الي انفقد ..
الى متى ...؟
ناخذ الثار ..
اكثر شي يوجع من يبيعك ابن بلدك ...
ماعرف شنو الي صار بعد السقوط
النفوس تغيرت ؟
لو دنيتنا الي تغيرت ؟
عبالك بغابه وواحد يريد ينهش لحم الثاني ..
عبالك علينه لعنه ..
لعنه الدم ..
دم يسيل من كل صوب ..
رجعت ..
كتله والله سهله وقريب عليه تدلل ..هسة اخوانه..
ميقصرون وياه ..
وشنو الي تريدة مني اني حاضر احاول اوصل اله ..
كلي ..قصي هذا الجبير ..وباقي خوانه صغار ..
اذا وياك عينك عليه.فدوة ..
كتله عيوني ..الك ..تدلل شوف اخابر منو من ربعنه ..
واشوف وضعه شنو ..وارجعه الكم ..
كال ياريت والله ..ابو شيبه امه تصير بنت خالتي ..
كتله شنو مراضيه فهمني ..
كال لا مو هيج بس اخاف عليه ..
سهله خويه تدلل ..
تقريبا ..العشيرة كلها مجندة بين حشدوجيش ..
كل واحد بينه من جهه ..يقاتل ..
والله متاكد ..
لو ينطوها ..للنسوان ..
فنسوانه اول الناس تتحشد ..ودافع عن وطن ..
