عسى يفتديك لسان شاعرك و حصانه

البارت ١

لا انا من عربهم ولا هو من عربنا
و جمعنا عشق اخلف قوانين عربنا ..
-
في بداية شهر رمضان تحديدًا يوم ١ رمضان في حلول الساعه ٢ الظهر طلع من عند شبك النياق و يمسح عرق جبينه و هو يسمع أصوات الضحك و الإزعاج ترجع للمزرعه من جديد ، و عرف ان عيال عتيق اكتملو كلهم و جو ، و عرف ان مترك و اهله اللي كانو اخر ناس يجون للمزرعة بمناسبة رمضان عشان يقضونه بين أجدادهم قاطع تفكيره صوت اللي تناديه: خلف
يمشي يتوجه لها و يسمع الحسّ و يتوقى خطاه عشان لايطيح ، كان يشوف لكن الرؤية معدومه و مايشوف إلا الغباش حاول يتبع خطاه لين وصل عند شباك المطبخ المربع الوسيع بدون حدايد ، تقدّم و أعطته صينية اللي فيها تمر قليل و نطقت : أمسك ياولدي هذي ودها عند الرجال و علّم عمك أبو بندر قله زوجتك ناديه تقول مافيه تمر و هذا اخر شيء جبته معاي
خلف: يامرحبا ياعمه انتم متى جيتو؟
ابتسمت ناديه: قبل ساعه، و الله يهدي جدتك معصبه علينا عشاننا ماجينا بدري
خلف : و متى تبيكم تجون اكيد اول يوم رمضان
ناديه : لا هم يبغون نجي قبل رمضان ب اسابيع تخبر رديس انت
ضحك خلف و شال الصحن اللي فيه تمر قليل و توجه لمشب الرجال و دخل و تقدم له فيحان : ارحب ارررحب
و اخذ منه صينية التمر و سلم عليه و هو يحضنه ، ابتسم خلف : وراه ماتعلمونا بجيتكم
ضحك فيحان : حبينا نسوي مفاجأه
رد عارف : مفاجعة قصدك ، جدتك رديس تبيك انت و اخوك تبي تحاسبكم على هالتأخير
تأفف فيحان و التفت لأبوه مترك : يبه تكفى تصرف مع أمك لا تخليها تربطني بالنخله نفس هذيك المرة كلنا نتأخر و فيحان اللي ياكلها
ضحك مترك : تستاهل لو علقتك بالمروحه بعد، محد أخرنا الا أنت
خلف قام يسلم على مترك و ولدة بندر ، و جلس و هو يناظر للإرض و يحس الرؤيه شوي و شوي تتعدّل لكن لازال الغباش موجود ، سأله مترك : بشرنا ياخلف ياولدي البصر هو رجع؟
خلف : لا بالله ياعم الرؤية مغبشه
التفت بدر ابو وعد لما سمعه و قال : يعني تشوف ؟
خلف هز رأسه بالنفي : لا بالله ما أشوف
التفت وافيّ ابو عارف لأبو وعد بدر و هو يحدّه بنظراته ، تنهد بدر و سكت
دخل عليهم سعود و هو يقول : فيحان وينه
فيحان : سم
سعود : جدتي بتفدع فيك صار لها ساعه ترسلنا نناديك وراك ماترد انت؟
مترك مسك فيحان مع اذنه و سحبه لين طلعه
تقدم سعود و هو يجلس عندهم
• عند الحريم
كانت جالسه بينهم و ترتب ملابسها بالدولاب و جمبها البنات اللي يوزعون أغراضهم بالدواليب ، كانت الغرفه هذي لـ خمس بنات اللي هم وعد و سلطانه و بدريه و كادي و أثير
نطقت بدريه : وعد انتم من متى هنا؟
وعد : من قبل يومين
بدريه : ابوك منتظم بزيادة
سلطانه : اي واضح منتظم نسيتي ان اخوه وافيّ جاي قبل أسبوع
ضحكت وعد : اما سلطانه انتم مسنترين هنا من اسبوع؟
تنهدت سلطانه : يشيخه خليها على ربك
قاطعهم الصراخ اللي برا و فزّو و هم يوقفون عند شباك المقلط لان محد يقدر يشوفهم و هم يراقبون ، وقفو الأربعة و يبعدون الستاره عن الشباك و يشوفون فيحان اللي ماسكته رديس و تضربه بعصا المكنسه و يتلاقط انفاسه و هو ينط و يقول : ياجده اخر مره ياجده مهب انا والله ذي بدريه النسره
ضحكت وعد و التفتت لبدريه اللي جمبها : نكبك
عقدت حاجبها بدريه : انا بنت ابوووي ، فيحاانووه
و طلعت من عندهم و هي تروح عند جدتها ، فزّت وعد : امسكي المجنونه بتدبغها رديس معه
ضحكت سلطانه : حيلهم بينهم ربي قردها ب احفاد مهبّل
التفتت وعد و هي تشوف بدريه اللي تقول لرديس : ياجده والله انه يكذب عليك تدرين ان ابوي موصيه من امس يعبي السياره بنزين و الدلخ نسى و مشينا امس و بنشرت السياره بنص الطريق و جلسنا لين المغرب بالطريق لين ساعدنا شخص و رجعنا للبيت و مشينا اليوم
لفت رديس له و هو يحاول يبرر : ابك تعقب والله انها اليوم بالطريق وقفتنا عند البقاله ساعتين عشان تشتري شقليطات
مسكته رديس مع اذنه : انا اعلمك عشان ماتنسى ثاني مرة
و سحبته مع اذنه و هي تربطه بحبل بالنخله اللي برا و تقول : خلك بهالقوايل
فيحان : تكفين جده والله صايم بتكسبين إثم طلعيني من ذا العذاب
مشت و تركته و هو يناديها ، دخلت و هربت بدريه للداخل و نادتها رديس : بديرااان تعالي
بدريه و هي واقفه عند البنات : تكفون تكفون سوو اي شيء لاتربطني معه مااتحمل بدوخ من الشمس تحسبني ضب مثله
ضحكت كادي و قالت : يلا تحملي مايجيك منها
دخلت رديس عليهم و قالت : ماشاءالله مجتمعات تعلله و سوالف؟
و التفتت لبدريه اللي متخبيه ورا سلطانه ، تقدمت عندها و هي تشدها مع اذنها : اطلعي يالنسره اطلعي ، توقفين ابوك عند البقاله عشان وش؟ شقليط ؟
بدريه و هي تمسك شعرها : يا جده تكفين عاقبيني اي عقاب لكن لا تطلعيني مع الضب برا والله ما اتحمل
تركتها رديس و قالت : بتسوين الجريش و بتسوين العدس و بتسوين اللقيمات ، و العصاير كلها عليك ، اليوم كله بشوفك بالمطبخ
بدريه و هي تتحلطم : ياجده ترا لي يدين مو اربع ايادي
التفتت لها رديس : و بتسوين المرقوق بعد ، عشان تعرفين تراددييني مره ثانيه
و طلعت من عندهم ، ضحكت وعد و همست : لو انك طالعه عند الضب برا كان ارحم لك
تأففت بدريه : تعبت منها عالاقل تقدّراننا تو واصلين بعدين حتى على شقليطاتي مناشبتني؟
مشت كادي : انا بروح ارتب لك اغراضك بالدولاب ، و انتي ابدي شغلك بالمطبخ انتبهي تنسين شيء قالته بتفدع بك صدق
بدريه و هي تترجاهم : بنات تكفون تكفففون ساعدوني تدرون اني احوس و ما اعرف اطبخ لا تخلوني أتورط و اسممهم الليله
سلطانه : والله عاد نكبتي نفسك تحملي مايجيك و شدي حيلك و ان كانك تبين تعليمات بكون عندك و اعلمك لكن اني انا اسوي و اشتغل بدالك؟ مستحيل
وعد كانت تتصدد عنها ، تقدمت بدريه عندها : وعوود قلبي وحياتي و عمرري و دنيتي
وعد : وقفي وقفي صدق من قال وقت المصالح تجيك الكلاب مشتاقه ، كلامي زي كلام سلطانه و يلا طبخ طبختيه يالرفله كوليه
بدريه بـ تحلطم : والله اسوي لكم كل شيء تبونه بس وقفو معي متخيلين انها مخليه علي كل هالشغل؟ وش بلحق عليه
تنهدت وعد : طيب خلاص بسوي الجريش و المرقوق و الباقي عليك
كادي : و انا بسوي اللقيمات
سلطانه تنهدت : امرنا لله ، و انا بسوي العدس يعني يالرفله عليك العصير بس
ابتسمت بدريه : ااححبببكم قسم لو تبون عيوني عطيتكم لو تبوني ابيع اعضاء فحفح و اعطيكم فلوسهم ابشرو
سلطانه : اهبي وراك ماقلتي اعضائك نكبتي المسكين اللي يصارع الشمس برا
ضحكو و توجهو المطبخ و بدأو يشتغلون البنات ، دخلت عليهم رديس : اي زين كثرو الفطور اليوم لا تقللون شيء لان ام غازي و ابو غازي يفطرون عندنا
و ناظرت رديس اللي بالمطبخ و اللي كانو وعد و سلطانه و كادي و بدريه و أثير و إبتهاج ، عقدت حاجبها : وين ساره؟
ضحكت وعد بـ خفيف و همست لـ سلطانه اللي جمبها : بتنهار لو سمعتها تناديها ساره
و همست سلطانه لوعد بـ صوت خافت بـ سخريه : ساااررااا
ضحكت وعد بـ خفوت و التفتت تشوف اذا لاحظتهم رديس ولا لا ، و تطمنت لما شافتها تطلع تدور سارا ..