عسى يفتديك لسان شاعرك و حصانه

بارت ١٧

تعدّو المزرعه و هم يمشون بالطريق ، فيحان : اي سوق تبين ياجده ؟
إرديس : السوق اللي هنا عند المزارع
فزّت أبتهاج و التفتت للبنات ، همزت سلطانه على كتف إبتهاج و تقولها : اص لا تفضحينا
فيحان : الجديد ؟
هزت رأسها إرديس و نطق فيحان : حلو اجل بنزلكم فرفرو و بنروح حنا نتسوق
التفتت إرديس : الا يا الرخمه ، تتركنا بالسوق لحالنا و تروح تتهيت ؟
بلع ريقه فيحان بـ فشله : لا ياجده ، ماحنا بعيدين حولكم
إرديس : واحد منكم يجي معنا محرم
فيحان : محرم ليه وين انتم رايحين ترا السوق عند خشمي
إرديس ضربت كتفه : ورا ماتسد حلقك انت ؟
سكت فيحان بـ فشله : سمي
ضحكت بدريه بصوت عالي و ماقدرت تكتم ضحكتها و قرصتها وعد اللي تضحك بصمت مع ابتهاج و سلطانه ، بلع ريقه فيحان و هو يناظر لبدريه بطرف عينه و يقول : اي اضحكي اضحكي
التفتت له إرديس و أعطته نظره ، التفت لها و هو ينطق : وشو ياجدتي تسمعينها تتشمت علي؟
إرديس : انكتم
فيحان سكت و كمل يسوق ، إرديس التفتت لبدريه : انكتمي معه لانزلك انتي و اخوك بالطريق
بدريه : سمي ياجده
فيحان فتح شباكه و ناظر ب مراية السياره انعكاس لخلف و عارف اللي راكبين الحوض و من لما ناظرهم بدأ خلف يأشر له بـ اصابعه الخنصر و البنصر و الوسطى و يثني السبابه و الابهام و يهدده و يقوله : أصبر أصبر
ضحك فيحان من تهديداتهم و مشى بسرعه و مسك بريك و هو يناظرهم و هم يترفسون بنص الحوض و يطيحون ، ضحك فيحان بصوت عالي و إرديس من نتعّة السياره و نطقت : يامال الليّه يا الموذي انت صاحي انت ؟
بلع ريقه فيحان و هو كاتم ضحكته و يناظر لأشكالهم و رجول عارف اللي واضحين له ، كتم ضحكته و كمل يسوق
خلف لما نتعت السياره تمسّك بـ عارف و سحبه و عارف طاح على ظهره و رجوله ارتفعو فوق ، نطق خلف بـ عصبيه : ولعننننه
عارف عدّل جلسته و تجوّد بالسياره و صرخ : فييحاااان
خلف تمسّك بالسياره و هو يطلع رأسه و يمد يديه و يهدد فيحان ب الاشاره و بكل مره يقرّب نفسه لين وصل الشباك اللي بالسيار و لكن مثبّت يده اليمين و جسمه بالحوض
البنات من صرخ عارف التفتو لورا و انخرشت وعد لما التفتت و شافت خلف اللي نص جسمه بجهة شباكها و يهدد فيحان ، بلعت ريقها وهي تناظره و كتمت ضحكتها بإستغراب ، كان معصب و شاد حيله لكنها كانت تضحك بـ خفوت ، التفت خلف لشباك السياره مع اليسار اللي قاعده فيه وعد و لاحظ أن الشباك عليه حمايه مايمدي يشوف اللي داخل ، بلع ريقه لما تذكر ان البنات جالسين هنا و رجع يجلس و من الشبّاك الخلفي للسياره اللي يطل على الحوض لاحظ اللي قاعده عند الشباك اللي بالسيار و لافه تناظر للشباك اللي بيسارها
عقد حاجبه و هو يفكر مين هي و لو كانت وعد شافته و هو متقدّم عند الشباك يهدد فيحان ؟ تنهد و هو يلتفت لعارف : اقسم بالله ان اقلب السياره على راس ولد عمك
عارف : اقلبها و لو تبي ادفنه تحتها راضي
تأفف خلف و هو يرجع أنظاره للي جالسه عند الشباك ، و رجع يجلس و يسند ظهره و يفكر لو هي كيف كان شكله و هو يهدد فيحان بـ عصبيه
بلع ريقه و قال : الله يفشله شكلي بايخ كني ورع و طاشيني بالحوض
ضحك عارف : الورع ارحم كننا عماله الله يقلعه
وصلو لعند الاسواق اللي مُنيره لمباتها بكل مكان و بكل مكان فيه دكّان فاتح و فيه بسطات بالطريق ، ابتسم فيحان : ذا هو ياجده ؟
إرديس : ايه ذا وقف وقف فالمواقف ذي
وقف فيحان و تقدم له عسكري عند شباك السياره : هذي مواقف خاصه لأصحاب الشغل و اللي عندهم أعمال
فيحان التفت لخلف و عارف اللي واقفين بالحوض و نطق : انا راعي شغل و انا كافل هذول و هذول عمالي
عقد حاجبه العسكري و التفت لعارف و خلف اللي يناظرونه و نطق : انت كفيلهم ؟ هذول عمالك ؟
هز رأسه فيحان
خلف مسك على قبضة يده و همس : اخو العيااال
عارف : وش قال ؟ وش قال ؟
خلف : اذا نزلت و فرشته بالشارع بعلمك
نزل خلف ، و مشى العسكري من عند فيحان و هو شاك به ، تقدم خلف و هو يفتح الباب على فيحان و يمسكه مع ياقة ثوبه : عمالك حنا يا ورع ؟
فيحان : اذكر الله
إرديس تناظرهم بـ صمت ، و البنات يتهامسون بينهم بـ هدوء و كاتمين ضحكتهم ، التفت خلف لإرديس و ترك فيحان : الحشيمه لام ظافر ولا انت لي معك تفاهم ثاني
إرديس : انطم انت وياه
بلع ريقه خلف بـ فشيله : افا ياجده
ضحك فيحان بـ صمت و بدريه و وعد ضحكو بصوت عالي
و سلطانه قرصت وعد و همست : فشلتوه اص
وعد و هي تمسك ضحكتها : ماقدرت
إرديس : اص و انزلن انتن الحقني و انتم وراهن يالله
خلف عقد حاجبه بإستغراب و سكت بفشيله لما شافها هي و اللي جمبها يضحكون و التفت لها لما فتحت بابها و نزلت ، صد بإنظاره و مشى بيمر من عندها يرجع عند الحوض ، و هو ماشي نزلت و تناظر له و هو يناظر بطرف عينه ، عرف إنها هي وعد من قميصها اللي طلع و هي نازله ، بلع ريقه بـ فشيله و مسك عارف و هو يشد على يده : يارب الارض تبلعني
عارف : وش بك
بلع ريقه خلف : العجيّز أخلاقها قافله
ضحك عارف : قمعتك ؟
خلف : اص بعدين اقولك ، صرنا نكته يضحكون البنات علينا و السبب السمرمدي كفيلنا
عارف : وشهو قايل؟
خلف : قايل للعسكري اننا عماله و كافلنا
عارف : انا راضي اكون عامل و شغاله بعد لكن مايكفلني فيحان
رفع انظاره خلف للبنات اللي صارو ورا إرديس واقفين و نطق: امش
عارف : ندبغ المروح الكفيل ؟
خلف : بعدين نتفاهم معه لاحقين ، العجيز تبينا نمشي يالثلاثه معهم
عارف همس: مشينا
خلف : امش شف السلتوح سبقنا مسوي انا الرجال
عارف : اي شاف بنات عمي معهم قال خل استعرض عضلاتي بس ماعليك ان ماعلقته بطرف الحوض بالرجعه مابكون انا عارف و بقول ذا عنزنا بنذبحها ليلة العيد
ضحك خلف و هو يضرب كتف عارف و يمشي معه و تقدمو جنب فيحان اللي جمبه إرديس و وراه البنات ، كانت يمين فيحان إرديس و يساره خلف و عارف ، دخلت إرديس محل و نطقت : تبون اغراضكم من هنا ؟
هزت رأسها وعد بـ لا ، تنهدت إرديس : خلص روحو مع فيحان ولا مع خلف او عارف و تقضو اللي تبون و واحد يبقى معي
عارف : بجي معك ياجده
تقدم عارف عندها و دخل مع جدته المحل ، فيحان التفت لبدريه : بدريه
تقدمت عنده و راحو على طرف : وش تبي ؟
فيحان : امسكي ذي فلوس ، ولا لا مابعطيك انتي بتخلصينها
التفت يأشر لابتهاج و تقدمت له ، بدريه : عطني الفلوس شقالولك انا فيحان ابلفها ؟
فيحان : اص ولا كلمه ابوي قال خذ كل الفلوس و عطهم ربع
ابتهاج : مستعده احلف انك خراط
فيحان : اعقبي مابي احلف بس ذا هرج ابوي
بدريه : اخلص كم عطاك
فيحان : خمس ميه
بدريه شهقت : عطني اربع ميه و تقاسم الميه انت و ابتهاج
ابتهاج : حلوه ذي انتي وياه ، اصلا انا اكبركم المفروض كلهم لي متأكده انا ان ابوي قال ذي لابتهاج بس انت حاشر نفسك
فيحان : خفي علينا يالدلوعه ، لايكثر هرجك انتي وياها عشره لك و عشره لها و الباقي لي
ابتهاج مسكته مع كتفه : طلع الفلوس لاخليك فضيحه بهالسوق
نزّل يدها فيحان و هو يعدّل وقفته
بدريه رفعت اكمامها : خليه علي بسوي فيه ماسويت ب سارا
ابتهاج ضحكت : خساره ليت شعره طويل نعلقه بالمحل بدال الالعاب المعلقه
فيحان ناظر لبدريه : اخخو بدرييه غطي اكواعك فضحتينا
نزلت اكمامها بدريه : اخلص هات الفلوس
فيحان : خلاص بعطيكم اياهم لابو وجيهكم مدري من طالعين عليه يعني حرفيا بهالعيله محد ماخذ جينات الحلاوه و الجمال و الكمال و الرجولة الا فيحان الباقين شكلهم طالعين على ارديس
ضحكت بدريه و هي تضربه مع كتفه : ياحيوان جدتتك
ناظرها فيحان : يعنني جدتك و انتي ممردغه وجهها بالكمون
ضحكت إبتهاج : الله لايلعنك امش بس
فيحان : اشترو اللي تبون و حطوه عند المحاسب بدفعه انا
مشو و تقدم فيحان عند خلف اللي واقف لحاله و مسواكه بـ فمه ، نطق خلف : تعلله ؟ كان طولت شوي بعد
فيحان : لاحوول انت شعرفك هذي أمور عائليه قاعدين نتقاسم ورث ابوي
خلف : كم ؟
فيحان : عطاني تقريبا مليار قال كله لك و ربعه لخواتك تعرف عاد انا كريم ف قلت بعطيه كله خواتي
خلف : شرايك تنطم ؟ و تعدي الليله على خير لابيع أعضائك و اكسب مليار المليار
فيحان : عجيب ! عمرك تسمع ب عامل يبيع أعضاء كفيله ؟
خلف تقدم لفيحان و هو يمسكه مع ياقة ثوبه : اقسم بالله ياف..
التفت للبنات اللي واقفين ينتظرونهم يخلصون هواشهم و تركه و نطق : عشان اللي ورانا بسكت
بدريه همست لوعد لما خلف ترك فيحان : اف ليته دبغه
وعد ضحكت بـ خفوت : اص
ابتهاج تقدمت : مطولين ؟
التفت خلف لفيحان و سكت ، فيحان التفت لها يعطيها نظره و نطق : امشو امشو ، وين السوق اللي تبونه ؟
نطقت ابتهاج : اتوقع اسمه سوق مساعد
عقدت حاجبها سلطانه و همست لوعد : اهبي وشلون عرفت اسمه؟
وعد : انا شفتها تسولف مع ام غازي ، شكلها سحبت كل معلوماته
رجعت ابتهاج عندهم و مسكتها سلطانه و همست : بنت
التفتت ابتهاج و هي تقول : نعم
سلطانه همست : يالمقروده من وين عرفتي اسمه ؟
إبتهاج : ترا انا ابتهاج بنت مترك على فكرة
سلطانه ضربت كتفها : الله يكفينا شر بنت مترك
تقدم فيحان لين وصل للمحل و شاف اللي واقف قدامه و عنده زحمه ، عقد حاجبه بإستغراب و نطق : ذا هو ؟ زحمه وش يبيع كل الحريم عنده
ابتهاج تحاول تناظره بين الزحمه لكن ماقدرت و نطقت : نبي ندخل جوا بالمحل
نطق فيحان : صاحيه انتي ؟ وين تروحين زحمه
بلعت ريقها ابتهاج : تمام بنروح نتشرى اغراض و اذا فضى نرجع له
تنهد فيحان و قال : يالله فيه سوق واحد هندي جمبه منتف مافيه احد شكله مطفر امشو
التفتو خلف و فيحان و مشو دخلو المحل و وراهم البنات الأربعة ، تقدم خلف و هو يناظر الاغراض بإستغراب و التفت للبنات اللي وراهم و ابتعد عن طريقهم و نطق : مرو قدامنا تشرو و حنا بنحتريكم هنا
دخلو البنات بالمحل اللي كان تقريبا مساحته كبيره شوي و مشى فيحان و خلف عند البنات و بعيدين عنهم شوي لكنهم تحت أنظارهم و يشوفونهم مشى خلف بـ طريقه يتمشى بأنحاء المحل و يشوف الغرض ، كان فيه رفّ كبير يفصل بين البضاعات و كان واقف عند هالرّف يناظر الاغراض اللي فيه ، و كانو البنات واقفين عند الرف بالجهه الثانيه و رفع رأسه خلف لما سمعهم يقولون : ابتهاج معك فلوس صح ؟
ابتهاج : ايه معي عطاني ابوي انا و بدريه
التفتت سلطانه لوعد : و انتي ياوعد ؟
تنهدت وعد : انتو تدرون إنه مو داري عن روحتي معكم ولو درا مابيخليني عشان كذا ماقلت له ولا اخذت منه فلوس ولا ابي اخذ
تنهدت سلطانه : الله يهديك
وعد نطقت : معي شوية فلوس تكفيني مابي اشتري كثير اصلا
ابتهاج: حلو امشو اجل
بلع ريقه لما سمعهم جايين له و بسرعه مشى من مكانه و توجه عند فيحان اللي واقف عند المحاسب و ياكل من حلاه و يقول : والله ياصديق هذا محل يحتاج شوي شغل
العامل : وشو يحتاج؟
فيحان : يعني يحتاج رجل اعمال مثلي ، تدري كم بحسابي ؟
هز رأسه العامل بالنفي ، نطق فيحان : سبعين الف ترليون مـ..
ماكمل كلامه لانه شرق بـ اللي بفمه و وقف يكح و يمسك صدره ، عطاه العامل الماء و تقدم خلف عنده و نطق خلف : من الكذبه شرقت
لما هدا فيحان وقف و هو يتنفس و يناظر العامل و ينطق : و قالو ان الحسد مرض خبيث
عقد حاجبه العامل : وشو هذا كلام ؟
خلف : ماعليك منه ياصديق ، هذا مو إنسان
رفع حاجبه العامل : وسو هدا ؟
خلف : هذا سلقه
وسع عيونه فيحان و ناظره : اعقب لاتقتل هيبتي
العامل نطق : وشو سلقه ؟
خلف ضحك : صديق انت مافي معلوم ، هذا سلقه يعني سيم سيم كلب بس العّن من الكلب
العامل : اها هدا كلب يعني
فيحان : اخخخو بدريه اعقب ، صديق ترا اقدر اسجنك ب ثروتي تراني ورثت من ابوي سبعين مليون و سب...
قاطعه خلف و هو يمسكه مع كتفه و يسحبه : امش الله لايبارك بك فضحتنا ثروتي و ثروتي و انت رايح تتمرقص بعرس عشان تاخذ الف ريال يالرقاصه
ضحك فيحان : يعني كل ماتخطيت تذكرني
خلف : المفروض ماتنساها رايحين نتسربت بفلوس الرجال و حنا ماخذينها من رقصنا ياسووواد وجيهنا
تقدمو عند البنات اللي يتشرون و نطق فيحان : خلصتو ؟
بدريه : اذلف للحين
فيحان شد على عيونه و هو يناظرها و يهددها بنظراته ، ما اهتمت بدريه و كملت تتشرى و التفت فيحان لخلف : تراها تخاف مني
خلف : اي واضح
فيحان : بس انا حنون
خلف : لايكثر امش
وقفو خلف و فيحان عندهم و هم يتشرون ، التفت خلف يدورها من بين البنات و مالقاها ، كان يعرفها من نعالها و قميصها اللي يبين له طرفه ، بلع ريقه و هو يتلفت يمين و يسار و مشى من عندهم لين دخل على رُكن كله العاب بأحجام كبيره لقاها فيه ، التفتت له و هو واقف يناظرها و نطقت : خلف ؟
هز رأسه و نطقت : الحمدلله جيت لإني ضعت
ابتسم خلف و تقدم عندها و هي واقفه عند لعبّة دُب كبيره لونها أبيض و ماسكه بيدها السعر حق الدُب ، و نزلت السعر من جا خلف عندها و نطقت بـ توتر : يلا مشينا
خلف : وش جايبك عند العاب الورعان ؟
بلعت ريقها : ضعت و مريت من عنده اشوف
سكت خلف لما حس إنها تكذب عليه و مشى بجمبها و تقدّم قدامها لما شاف فيحان و بدريه جايينه ، بدريه : وعد اخيرا تعالي تعالي فيه مفارش تجنننن احس حلوه نحطها بدال مفرش العجيز اللي خمج
كتم خلف ضحكته و فيحان نطق : اهرجي بشويش فضحتينا
تقدمت بدريه عند وعد اللي تناظرها من ورا الغشوه الشفافه و تقول : اي اي حلو
استغربت بدريه : بك شيء ؟
وعد هزت رأسها بـ لا و نطقت : وريني المفارش الباقيه
مسكت بدريه يد وعد و توجهو لركن المفارش..