عسى يفتديك لسان شاعرك و حصانه

بارت ١٢

ماتردد فيحان بإنه يتقدم لأحد الطاولات و ياكل من ورق العنب ، ناظره خلف و التفت لعارف و قال : ابو محمد ، شف الحمار
التفت عارف له و قال : فضحنا مايقدر يصبر دقيقه
خلف تقدم لعند فيحان و خلفه عارف و هو يمسك فيحان اللي ياكل و يقوله : مشفوح انت مشفوح ؟ تونا مفطرين ياحمار
فيحان و هو ياكل ورق العنب : مر على الفطور ساعتين و انهضم ببطوننا و انت تقولي تونا مفطرين ياعمي طيير
تنهد خلف و هو يمسك فيحان لايكمل اكل و فيحان يدفه يبعده و بالغلط دف صحن البوفيه اللي كان زجاج ، و طاح انكسر و انكب منه ورق العنب ، شهق عارف و ناظر لفيحان و ارتبكو الثلاثه لما شافو الحضور كلهم يلتفتون لهم و لوجودهم الغريب بوسط الحفل فجأه ، و لفيحان اللي كمل ياكل ورقتين العنب اللي بيده مو مبالي بالانظار اللي عليه ، توتر خلف و هو يقول : ولعنه
تقدم لهم رجال لابس بشت و هو يلتفت للحضور و يبتسم لهم بمعنى حصل خير كملو و توجه للثلاثه اللي واقفين و كل شخص يقول للثاني رقعها
تقدّم الرجال و قال : من انتم ؟
بلع ريقه خلف و تقدم : رجال عيال رجال
الرجال : و نعم بس من انتم عياله و من اللي عزمكم ؟
فيحان ناظره و قال : انت صاحب العرس ؟
الرجال : انا المعرس
تقدم فيحان بيسلم عليه و قال : مبروك منك العيال و منها المال
بلع ريقه خلف بـ توتر من غباء و هبد فيحان و همس : منه المال الله يلعنك المااال
عقد حاجبه الرجال بـ عصبيه و فيحان ارتبك : اااقصد منك المال و منها العيال
تقدم عارف : اعذرنا يارجال
المعرس بـ حدّه : سؤالي انت وياه من اللي دعاكم لهالعرس ؟
رد عليه فيحان بـ ربكه و بدون تفكير : حنا حنا رقاصات
خلف همس بـ ضحكه : تعقب
كتم عارف ضحكته و قال بـ ترقيع : يقصد حنا نلعب نعرف نلعب و نعطي الحفل جو
عقد حاجبه المعرس منهم و قال : اي الحقوني ادخلو هناك خل اشوف مهاراتكم
و مشى و هم وراه و تورط خلف و هو يقول لهم : الله ينكبكم يا الرقاصات
عارف : ورع اعقب
خلف : مو ذنبي ذنب الدلخ اللي وراك
فيحان قال : شفيها ؟ خل نرقص
خلف : ااببو محمممد
عارف : ابن ابووي ابنه اعقب ، مانت ولد عمي ولا أعرفك اعقب اعقب
تقدم الرجال و قال : هذي الساحه لكم و ان كان تبون اشغل لكم شيء معين متعودين عليه علموني و يالله وروني شغلكم ان كانكم صادقين
تقدم فيحان لـ الدي جي و هو يقوله اكتب ريمكس طرب
عقد حاجبه الدي جي من طلبه و تنهد المعرس : اكتب اكتب
و تقدم المعرس عند الدي جي و همس له : هذولا جايين من الديره خلني اشوف وش اخرتها معهم
بلع ريقه خلف و هو يهمس لعارف : الله يلعنه فضحنا
عارف ضحك و قال : هذولا عيال عمنا جايين من الديره
شغّل الدي جي اغنية "لمن كحلتي العيون مافكرتي بقليبي" و تقدم فيحان اللي بدأ يتوسط الحفل و يهزّ كتفه و هو يناظر لهم ، استغربو الحضور و التفت عارف لما حس ان فيحان حطهم بالأمر الواقع و مافيه مفر و تشجع و التفت لخلف و نطق : اسمع .. امش
خلف : اعقب انت وياه تبي اتمرقص معه؟
عارف تقدّم : عزز لنا
و تقدم عارف و هو يوقف قدام فيحان و يهزّ كتفه معه و تقدم خلف اللي تركوه لحاله و هو يوقف بينهم و يلف شماغه زي اللثمّه على وجهه و يرقص بجمبهم و يعزز لهم ، تقدمو لهم الحضور لما تحمسو من رقصهم و بدأو يرقصون معهم بـ ضحك و وناسه .. و ابتسم صاحب العرس لانهم فعلا سوو له جو و ماخدعوه
لما وصلت الاغنيه "لف القلب لف ياهي خل دمي ينشف"
بدأ يدور خلف و هو يهز كتفه مع فيحان اللي يهز كتفه معه و يقول : عطططه يووولد عططه
و كملت الاغنيه و هم مشعلينها برقصهم ، انتهت و وقفو و هم يضحكون و قال المعرس : فيه ثانيه كملو كملو
بلع ريقه خلف : انا وجهي احتر من الفشله و هذا يقول ثانيه فلها الاخو
عارف : يرجال ماصدقنا يسكت و يستانس خلونا نكمل
فيحان : شغل شغل يامدييير
و شغل "دبكة"
و ابتسم فيحان و هو يلف لخلف : لعبتتتك
تنهد خلف و هو يقول : تكفى ما اقاوم يا الكلب
عارف شبك يده بخلف و يده الثانيه بفيحان و هو يقول : بدينا
تقدمو بعض الرجال يشبكون يديهم معهم و كان خلف في اخر الصفه اللي كانت مكونه من سبع رجال ، بدأو يدبكون بالخفيف و يمشون بخطى تتبع بعضها لين ضربت الدبكه و زاد الطبل ، طلّع خلف مسبحته و هو يرفعها و يلفها بيديه و ضرب رجله مع الدقّه و بدأ يتقدم عنهم و هو متمسك بيد عارف و يضرب رجوله بالارض و يقعد و يوقف و هو يدبك بـ مهاره أبهرت الناظرين له ، نزل شماغه و رماها على كتوفه و حط العقال على راسه و كمل يدبك بكل حماس و هو منسجم ، تمسك بعارف و بدأ هو وياه يمشون على الدقّه و متمسكين ببعض و واقفين على استقامه وحده و يثنون ظهرهم للخلف و يرجعون يوقفون و يضربون برجلهم الأرض و يتقدم خلف و هو ماسك يد عارف و يكمل يدبك و هو يضرب برجليه الثنتين اللي يسابقهم ببعض الارض و يوقف و يثني ظهره و يرجع يوقف بأستقامه و يدبك معهم على خط مستقيم ، فيحان انسحب لانه مايعرف للدبكه و انسحبو اغلب الرجال معه بعد ماشافو دبك خلف اللي يتفوق عليهم كلهم ، بقو اربعه خلف و عارف و رجالين ، تمسّك خلف بـ يدّ عارف و هو يضرب على الأرض برجله و يقدم رجله الثانيه و هو يلف يصير قدام عارف و هو ماسك يده و يدبك هو وياه على مهل و ببطء لين ضربت الدقه و ضربو الارض معها و دبكو ، انسحبو الرجالين الاثنين و بقى خلف و عارف اللي كملو يدبكون و رفع خلف سبحته فوق و هو يدورها و كمل يدبك بـ مهاره خلت الحضور يوقفون يشوفونه بـ إنبهار
أنتهو و توجه خلف يجلس و يشرب ماء و جمبه عارف و فيحان بعد ما تعبو من الرقص ، تقدّم لهم المعرس و هو يقهويهم و يقول : بيض الله و جيهكم
همس خلف لعارف : على سواد وجيهنا
ضحك عارف بـ صوت خافت و شربو القهوه و اتجهو برا بيطلعون و استوقفهم المعرس اللي تقدم عندهم و مدّ لهم فلوس : ادري والله انها قليله لكن اعذرونا و تستاهلون زود
خلف بـ رفض و صدمه : اخو العيال !
المعرس : وش بك ؟
بلع ريقه خلف و التفت لعارف اللي سحب نفسه من بينهم و فيحان يناظر بـ صدمه ، نطق خلف : لا انـ..
قاطعه المعرس : علي الطلاق و هذاني بيوم عرسي ان تاخذونها
تنهد فيحان : يارجال عيّن خير تطلق من ؟ توك توك
و اخد الفلوس فيحان ، التفت خلف له و فيحان أشر لخلف بـ عيونه بـ معنى أسكت ، تنهد خلف : عشانك طلقت بس ، ولا ماحنا جايين عشان فلوس جايين عشان نسفهل
ابتسم المعرس : فامان الله
مشو من عنده و وصلو عند عارف اللي واقف عند البوابه و شافهم و نطق : قولو لي يا دلخ انت وياه انكم سويتوها و اخذتو الفلوس
تنهد خلف : اي حنا دلوخ الرجال بعرسه بيطلق الا و ناخذهم حدّنا حذّنننا
تنهد عارف : و كم ريال ؟
فيحان طلّع الفلوس و يناظر لهم ، خلف لف له و شاف الفلوس و شهق : اببو محمممد ، الف !
التفت عارف : امحق ، هذا و انت نظرك ضعيف شفتها اسرع مني
ارتبك خلف لما استوعب نفسه و ضحك بـ تسليك : ااايه النظر بدا يتعدل الحمدلله
عارف ابتسم : خله يرجع كله بنسويلك عرس نفس ذا
ضحك خلف بـ ربكه ، و نطق فيحان : ياعيال الف ريال مستوعبين انتم؟
خلف : يرجال امش بس بنفر الديره فيها بنتبرا من المزرعه المنتفه
ضحك عارف : بكرا خلوها لاني تليشت والله زين ان وصلت المزرعه
مشو على رجولهم و وصلو المزرعه و دخلو حصلو اعمامهم عند بيت خلف ، التفت عارف لخلف : وش مسوي انت ؟
خلف رفع انظاره لهم و نطق : وش العلم
تقدمو عندهم و شافو بدر و ظافر واقفين و عندهم سيارة ظافر اللي موقفها عند بيت خلف و ينزل منها اغراض ، عقد حاجبه خلف و التفت لعارف اللي زمّ شفايفه بمعنى مايدري عن شيء
تقدمو الثلاثه و شهق فيحان : عمي هذي بطانيتي
ظافر : مابغيتو تجون احتريناكم و تأخرتو و دبرنا الشغله بدالكم
عقد حاجبه خلف : وش شغلته يا عم ؟
بدر تقدم عندهم : من الليله ، سلق الشعيب اللي معك بيرقدون عندك
عارف : و بدون لا تشاورون صاحب البيت ؟
بدر التفت لخلف و هو يتقدم عنده و يمسكه مع كتفه : خلف ولدنا و اكيد مايعترض
تنهد خلف : خذو راحتكم بس ليت بلغتوني عشان ارتب البيت لإنه منحاس
تقدم خلف يدخل بيته ، طلع ظافر اللي وقف عندهم و نطق عارف : يا عم حركتكم ماتصلح والله
بدر التفت يناظره ، كمّل عارف : مهما كان ذا بيت الرجال ابسط حقوقه تستأذنون منه
ظافر : اركد يا عارف ما بيننا ، بعدين قلت لك مشوين تحريناكم تجون ولا جيتو و حنا مستعجلين
فيحان نطق : مستعجلين على وش ؟
تنهد بدر بـ عصبيه : حقق انت وياه !
التفت فيحان بـ ربكه لعمه بدر ، و نطق بدر : انتم يالاربعه من هنا و رايح نومتكم بهالبيت و بدون لا و ليه
و مشى من عندهم متّجه لمشب الرجال و لحقه ظافر ، تقدم عارف لبيت خلف و لحقه فيحان و دخلو عنده و هو جالس على سريره و حاط اكواعه على ركبتيه و يناظر الأرض ، جلس عنده عارف : عمي بدر علامه عليك ؟
تنهد خلف بـ عصبيه و نطق : يعني علامه ؟ خايف على بنته يحسبني ولد كلب و جايبكم عندي يستأمن بكم
عارف : محشوم و انا اخوك ماضنتي هذا تفكيره
خلف : ذا تفكيره و نص ، من اول يوم جا سألني إذا اشوف ولا لا و قعد يحقق و شدّ علي لما عرف اني بديت اشوف
فيحان : ولد ماعليك منه انت تعرف بطبعه و تبي الصدق افضل شيء اننا جينا عندك نونسك و حنا نستانس
التفت خلف لفيحان و ضحك : كلن على همه سرا يا فيحان