ရွာပုံစုရှင်ပြုပွဲအတွက် တစ်ပတ်အလိုတွင်
ညောင်ပင်တန်းရွာ ဘုန်းကြီးကျောင်းဝန်းအတွင်း၌
အလှူမဏ္ဍပ်ထိုးနေပြီဖြစ်သည်။
နှီးဖြာပေးသူကပေး၊ တိုင်ထူသူကထူ ၊ ကာလသား
တစ်သိုက် တပ်ညီလက်ညီနှင့် လုပ်အားပေးကြသည်။
မဏ္ဍပ်ထိုးသူတွေကိုကျွေးဖို့ ကောက်ညှင်းပေါင်း
သူကပေါင်းနှင့် ဘုန်းကြီးကျောင်းဝန်းထဲ လုပ်အား
ပေးသူတွေ စည်ကားနေလေတော့သည်။
"အကျွေးမွေးအတွက်ကတော့ မပူနဲ့မောင်ရင်
ရွာလုံးကျွတ် မီးခိုးတိတ်ပဲဟေ့"
မဏ္ဍပ်ထိုးပြီဟေ့ဆိုကတည်းက အကျွေးမွေးပိုင်း
ဧည့်ခံဖို့ကလဲ ပြင်ဆင်နေကြလေပြီ။
အိမ်ထောင်သည်ရွာသူတချို့ ပွဲလာဧည့်ပရိတ်သတ်
တွေကိုဝေဖို့ ဆေးပေါ့လိပ် လိပ်ကြသည်။
ဆေးရိုးစင်းသူကစင်း ၊ ထောင်းသူကထောင်း၊
ဆေးလိပ်လိပ်ရင်း ရုပ်ရှင်အကြောင်း ၊ ဟိုအကြောင်း
သည်အကြောင်းကလဲ ပြောကြသေးသည်။
အပျိုအုပ်စုက ပေါက်ပေါက်ဆုပ်လုံးသည်။
ပေါက်ပေါက်လုံးပြီးနောက် အလှူရပ်အတွင်း မိုးဦး
လေဦးမကျအောင် ရှင်ဥပဂုတ္တမထေမြတ်အား
ဦးဦးဖျားဖျား ပူဇော်ကြသည်။
"သူကြီးသားအဖတော့ ဆိုင်းငှားဖို့မြို့တက်သွားတာ
ရမရတော့မသိ"
"တို့သူကြီးကလဲအေ စောစောကတည်းက ကြိုငှား
ထားမှပေါ့ ၊ အခုက အလှူရာသီဆိုတော့ တော်ကြာ
ငှားမရမှ ကျုပ်တို့ပွဲငတ်ဦးမယ်"
"ဆိုင်းက ငှားထားတာကြာပြီအေ့ ၊ အခုကငွေချေ
ရင်း လိုအပ်တာတွေသွားဝယ်ကြတာ "
"ဒါနဲ့ ကိုကိုမြိုင့်ဆိုင်းကောရလား ၊ မင်းသမီးက
ဝါဝါမြိုင်ဆို သူက အဆိုကောင်း အကကောင်း၊ လူပြတ်တွေကလဲ ရယ်ရသတဲ့ "
"ပြောတတ်ပါဘူးအေ ဘယ်အဖွဲ့ရောက်လာမလဲ"
..........
မိုက်မိုက်တစ်ယောက် အလှူပွဲအကြောင်းပြုပြီး
ညောင်ပင်တန်းရွာကနေ ထနောင်းစုသို့ပင် မပြန်
တော့ချေ။
အလှူကိစ္စနှင့်ပက်သက်ပြီး ငယ်ထွေးနှင့်လဲ
ရင်းနှီးသွားကြပြီး ငယ်ထွေးအိမ်မှာတည်းသည်။
ရှင်လောင်းလှည့်မည့်နေ့က နှစ်ဆန်းတစ်ရက်နေ့
ဖြစ်ပြီး ထိုနေ့ ဆံချကာ နောက်တစ်နေ့မနက်မှ ရှင်မည်ခံ ဖြစ်သည်။
YOU ARE READING
ပုဝါပါးလေး စွန်းမှာဆိုး
Fantasyဤဇာတ်လမ်းတွင် ပါဝင်သည့် နေရာဒေသ များမှာ စာရေးသူ ပုံဖော်ဖန်တီးထားခြင်း သက်သက်သာ ဖြစ်ပါသည်။
