ရုန်းထွက်၍မရသော[ ဘာသာပြန်]

အပိုင်း (၃) Unicode

မူရင်းရေးသားသူ - အီရွန်

ဘာသာပြန်သူ - Penny

 အပိုင်း - ၃

ဒီလိုအခြေအနေရဲ့ ရလဒ်အနေနဲ့ အယ်(လ်)ဖာ နဲ့ အိုမီဂါတွေက ဘီတာတွေထက် လူဦးရေနည်းပေမဲ့ အယ်(လ်)ဖာတွေကတော့ ဦးစားပေးဆက်ဆံခံရပြီး အိုမီဂါတွေကတော့ အနှိမ်ခံရကြပါတယ်။

ဒါပေမဲ့ အိုမီဂါတွေက လုံးဝအသုံးမကျနေတာမျိုးတော့လည်း မဟုတ်ပါဘူး-- အိုမီဂါတွေကမှပဲ မျိုးရိုးမြင့် အယ်(လ်)ဖာမျိုးကို မွေးဖွားပေးနိုင်စွမ်းရှိတာပါ။

အစွန်းရောက် ဥပမာအနေနဲ့ ပြောရရင် လူကုန်ကူးမှုကို တားမြစ်ထားပါတယ်ဆိုတဲ့ အဲရိစ် အင်ပါယာအတွင်းမှာ အခုချိန်ထိ ဆက်လက်ကျန်ရှိနေတဲ့ တစ်ခုတည်းသော လူကုန်ကူးမှုကတော့ အိုမီဂါဈေးကွက်ပဲ ဖြစ်ပါတယ်။

တခြားနည်းနဲ့ပြောရရင် မျိုးရိုးမြင့် အယ်(လ်)ဖာတစ်ယောက်ကို အမွေဆက်ခံသူအဖြစ် မွေးဖွားပေးစေဖို့ အိုမီဂါတွေကို မယားငယ် ဒါမှမဟုတ် မျိုးစေ့လက်ခံသူအဖြစ် အသုံးချကြတယ်လို့ မကြာခဏပြောလေ့ရှိကြပါတယ်။

အဆင့်အနိမ့်ဆုံး အဆက်ဆံခံရတဲ့ အိုမီဂါတွေကို လိုချင်တဲ့ နေရာတွေကတော့ အများကြီးပါပဲ။ ဒါပေမဲ့ သူတို့တွေကတော့ အယ်(လ်)ဖာတွေ ပြုသမျှနုတာကိုခံရင်း၊ ဘီတာတွေ အထင်သေးတာကို အလေ့ဖြစ်ရင်းနဲ့ အလုပ်ရှုပ်နေကြလွန်းလို့ သူတို့ရဲ့ အမှန်စင်စစ် တန်ဖိုးကို မသိကြပါဘူး။

အဲဒါကြောင့် ကျွန်မအမေနဲ့ ကျွန်မက တခြားသူတွေနဲ့ဝေးရာ တောတောင်တွေထဲမှာ နှစ်ယောက်တည်း နေခဲ့ကြတယ်။ ဘာလို့လဲဆိုတော့ ကျွန်မအမေက အိုမီဂါ ဖြစ်ပြီး ကျွန်မကလည်း သူ့နည်းတူ အိုမီဂါဖြစ်နေလို့ပါပဲ။

ကျွန်မက အမေ့လို ချိုမြိန်တဲ့ ပန်းရနံ့ရှိတဲ့ မျိုးရိုးမြင့်အိုမီဂါ မဟုတ်ဘဲ မိုးကျအပြီးရတဲ့ တောရိုင်း ပန်းမြက်အနံ့ရှိတဲ့ အားနွဲ့ပြီး မျိုးရိုးငုပ်နေတဲ့ အိုမီဂါဖြစ်ပါတယ်။ ဒါပေမဲ့လည်း အိုမီဂါကတော့ အိုမီဂါပါပဲ။