💜💜
Preeti Naman ke saath mandir aayi hui thi. Aaj Naman ke audhe ki vajah se pehli baar usne mandir me bhagwan ke darshan bina kisi rok tok ke itne najdik se kiye the. Vo khush thi. Bhagwan ke samne apne haath jod aankhe band kar usne unse prathna ki. Pooja ache se hone ke baad dono bahar aaye. To driver ne jaldi se un dono ke liye car ka door open kiya.
Naman Preeti ko saath le kar car me betha tha.
Ki tabhi Preeti ne usase pucha : Aap to bhagwan ko nahi maante. Fir kyu yaha aaye?
Preeti ki baat sun Naman ne aage bethe driver ko mirror me dekh dheere se kaha : Par ab manane laga hu. Tumhe acha nahi laga yaha aakar.
Preeti ne apna sar hilaate hue kaha ; Nahi. Mujhe to bahot acha laga. Main to kab se yaha aana chah rahi thi.
Itna keh kar vo ab bahar dekhne lagi thi. Ki tabhi uski nazar paani puri ke stall par gayi.
To usne chote bachhe ki tarah khush ho kar Naman se kaha : Please gaadi rokne ko kahiye.
Naman ne uski baat sun naa samjhi me usase pucha : Kya?
Preeti ne ab uski taraf mud kar khush hote hue kaha : Aa.. mujhe paani puri khaani hai.
Preeti ki baat sun driver ne Naman se pucha : Sir. Gaadi side me lagaau.
Naman ne mana karte hue kaha ; Nahi.
Naman ke naa kehne par Preeti ke hotho ki muskurahat dheere dheere chali gayi. Vahi use dekh Naman ne kaha : Preeti. Main koi aam aadmi nahi hu. Is shehar ka A.C.P hu. Kisi ne dekh liya to kya sochenge mere baare me.!
Naman ki baat sun naa jaane aaj Preeti me pehle ki tarah himmat aa gayi. Usne use dekhte hue kaha : Kya sochenge. Yahi ki A.C.P sahab apni biwi ko pani puri khilaane laaye hai. Isme jada sochne wali kya baat hai. Kya aap bhi. A.C.P ho kar bhi kitne fattu hai.
Preeti ki baat sun aage bethe driver ki dabi si hasi chhut gayi to, Naman ne ye dekh thode gusse me Preeti ko dekhte hue kaha : Kya kaha? Aur vaise bhi ye koi time hai ye sab chize khaane ka. Abhi lunch time hai. Hum ghar jaa kar lunch karenge.
Naman ki baat sun Preeti ne muh fer liya. Use gussa aa raha tha. Sach to ye tha ye food craving thi jo ki pregnancy me hona aam baat thi. Par ye A.C.P sahab kaha samjhne wale the. Unhe to bas gundo ke mijaaz hi samajh aate the.
Dono kuch hi der me ghar pohche to Naman ki maa ne dono ko aate dekh pucha : Kar aaye darshan. Hume pehle bataya hota to hum bhi chalte.
Naman : Koi baat nahi maa. Main aap ko fir kabhi le chalunga.
Itna keh kar vo ab room me chala gaya. Vahi Preeti bhi idhar udhar dekh ab room me jaane ko hui thi ki Hema ji ne use rokte hue kaha : Ab tum kaha chal di pati ke peeche peeche. Idhar aao aur ye juice pilo.
Preeti ne unke haath me aaj fir anaar ka juice dekha. To uska man kharab ho gaya. Ye unka ab har roj ka tha. Vo use kabhi orange juice to kabhi koi vegetable juice pilaane ki koshish karti rehti thi.
Preeti ne naa nukur kar unhe rokna chaha par vo uski ek sunane ko taiyaar nahi thi. Is vajah se man maar kar usne vo juice pi liya. Aur agale hi pal vo apne muh par haath rakh jaldi se apne room ki taraf bhaag gayi.
Use is tarah se jaate dekh Naina ne apni Maa se pucha : Ise kya hua?
Hema ji : Aaj kal ke bachho se thik se khaaya piya bhi nahi jaata. Aur tum. Tum kab hume khushkhabri sunaane wali ho.
Naina ne apni maa ki sun jaldi se kaha : Kya maa. Aap bhi shuru ho jaati hai. Abhi meri umar hi kya hai. Bhai ki to umar ho gayi hai. Unhe bachhe ho jaane chahiye. Par main to abhi young hu. Aur abhi 2 saal tak hum bachho ke baare me nahi sochne wale.
