كسرتني امرأه --باللهجه العاميه --

البارت الثامن والعشرون

كسرتني امرأه //
بارت 28
بقلمي انيين 😥
//////////🌷🌷/////////
مرحبا اعزائي القراء الكرام
كثير كالو ليش تقوى انهزمت والي سوته اكبر خطا وليش ما راحت الاهلها واطلكت
انا اكلكم الي يحس بالظلم والي ذاق الظلم راح يشوف الظالم مثل الجيثوم الي يصير على صدره وراح يحس بمرارته
حتى وهو صاحي
تقوى انهزمت لان شافت شنو سووا بابوها وشافت تعذيبه الها وهي زوجته لذلك خافت على ماهر وبنفس الوقت
خافت من أركان يجبرها تبقى ويا رياض الي هو بنظرها مجنون
انتم انطو الأعذار للكل وبعدين هي تصفى
أتمنالكم قراءه ممتعه ##
شكرا الدعواتكن وربي يبعد عنكم كل تعب 💛💙انين الليل 💛💙
////////////🌷🌷🌷/////////////////////

بعد ان كملت تقوى صلاة بالحضره الشريفه طلعت واشترت ريوك وصارت على صفحه تريكت وراحت تمشي
بالسوك وهي منعجبه على نفسها وليش هيج سووت معقوله هيج اتصرفت وبهاي الجرأه
وكان الرد يجيها ==حتى احمي نفسي وماهر من هذا المريض المتسلط
لكن بنفس الوقت تخاف وترجف وهي تتصور يلگاها
صارت تباوع وتشوف المحلات وأهل البساطي يفتحون ويبدون يعرضون بضاعتهم هي جايه سابقا للزياره
بقت تفكر وتگول = شلون اعيش او وين
= انا يمكن غلطت لان عفت اهلي وانهزمت
صارت تبچي وتگول = غصبن عليه هيچ سويت اخاف على ماهر وهذا ما راح ايعوفه
هزت راسها وكالت = خلي ارجع واروح العمي واشتمي على رياض
= اشبيج تقوى عليمن تشتكيين ما شفتي فاتحة ابوج الدنيا الي اجت على مود رياض ولج انتي شتحچيين
= يعني انا هذا هو بعد ما ارجع
= اي ما ارجع خلي احمي اخوي وانا الي الله انا متوكله علي الله كريم
= اهم شي هسه لازم اشوفلي مصدر عيشه اعيش بي
صارت تمشي شافت رجال جبير بيده طاسة ماي ويرش اباب المحل
مبين على وجهه نور وعباده سمعته يكول
- - أصبحنا وأصبح الملك لله يافتاح ياعليم يارزاق يا كريم -لكن كال جمله استوقفتها -
- - اللهم ارحمنا واسترنا وبين عبيدك لا تفضحنا

تقوى من سمعت هاي الجمله بجت وهي تسمع الناس والماره يسلمون علي يكلوله
صبحك الله بالخير حجي عطيه
وثاني يكله صباح الخير أبو صلاح
هي كملت طريقها وانوب رجعت وكفت اباب المحل هو شافها كلها //تفضلي يأبه لان هي لابسه البوشي والجفوف
تقوى بخجل ==صباح الخير حجي
الحاج //صباح الخير تفضلي عمي
تقوى ==عمي انا يتيمه وجايه اريد
هو ما خلاها تكمل مد ايده على جيبه وطلع فلوس هي من شافت كلتله
===لا عمي والله عندي خير من الله
الحجي //ها بابا شتردين بيش اكدر اساعدج
==عمي انا مو منا يتيمه والفلوس الي عندي تقريبا صرفتهن ظل شي بسيط وما عندي أحد قررت اجي اهنا
واسترزق الله
جاوبها /: اي بنتي كلنا رزقنا على الله
==بس عمي أريدك تساعدني اريد اخلي بسطيه بيها ترب وسبح بسطيه زغيره تسد حاجة يومي
الحاج //اي عمي زين تسوين
==حجي انا ما اعرف منين اشتري ما اندل
حجي عطيه //عمي مبين عليج بعدج زغيره ما عندج اهل أقارب ؟
==لا عمي ما عندي جان خال الي واتوفه وبقيت عد ابوي إلى ان اتوفه قبل شهرين واجه ابو الملك راد بيته
حجي عطيه //وين بيتكم
تقوى ==بالديوانيه
حجي عطيه //زين بابا ليش اجيتي المحلي دون عن باقي الناس منو دلاج علي
تقوى بجت وحاولت تكتم عبرتها بس ما كدرت المهم جاوبته ودارت واشرت ==ذاك الي دلاني عليك
هي أشرت ع المرقد الشريف كلتله وهي تبچي
==مريت وسمعت دعائك بالستر هو هذا الي خلاني اطلب منك المساعده
حجي عطيه من سمع كلامها شلون تكسر من البجي راح جابلها كلاص ماي وكلها
اشربيي بابا وصلي على محمد وآل محمد
هي اخذت الكلاص وشربت بعد ان صلت على النبي
حجي عطيه //اسمعي بابا انا راح اساعدج راح ابيعج من محلي بسعر الجمله انوب شويه شويه تندلين منين تتسوكين
وهسه خلي نبدي انطيني ،،، واخذي هذن السبح
بيعي الوحده بالف واخذي هذن الترب بيعي الجيس بالف بس وين تبسطين
تقوى ==والله ما ادري
حجي عطيه دخل للمحل وطلع صندوق زغير مال طماطه فارغ وصينيه فافون وكلها
خلي الصينيه ع الصندوك واعرضي بضاعتج واكعدي اهنا كبال محلي لان تشوفين هاي ا لبساطي لو الأبو المحل
لو يأخذون عليها أجره
اتشكرته ودعتله بطول العمر وخلت الصندوك والصينيه وكعدت على كارتونه وظلت تسفط بالسبح والترب
وحجي عطيه يراقبها خصوصا وأهل المحلات شافو وحده مبسطه كدام محل الحجي هي بقت كاعده واليجي
يسأل لو يريد يشتري اتبيعه ما تطول بالكلام حتى اجه صاحب محل حاول يستدرجها بالكلام بس هي ابد ولا فكت
حلكها ولا جاوبته
حجي عطيه الضحى صاح على ولد وراح اجه الولد بيده صينيه بيها كوب جاي وكيكات اثنين اجه الحجي
وكلها //بابا هاج اتريكي
هي بخجل ردت == والله عمي متريكه
كلها /:مي خالف عوفي البسطيه وتعاي بسد المحل اشربي جاي واكلي
🌷🌷🌷🌷🌷🌷🌷
تقوى
انا كمت ودرت وجهي بسد المحل اكلت نص الكيكه وشربت الجاي ورجعت كعدت وانا نفسي متعجبه على روحي
هاي صدك انا تقوى هيج سويت تقوى الي اخاف لو مجرد ما يباوع لي رياض بعينه والي أصير ارجف لو حجى
وياي أركان ليش هيج سويت ومنو يصدك ومنو يرحم الظهر شفت مكان منعزل وصليت بي وفتحت النقال شفت
رساله من وفي غيرت كل كلامي وقررت اصارح حجي عطيه بكل شي