ထာဝရသူငယ်ချင်း (B.F.F) (Z+U){Completed}

21:Venus(The god of the love❣)

(Unicode)

ပျော်ရွှင်မှု၊ကြည်နှုးမှု ဟူသည် လင်းအံ့ အတွက်တော့ မြူတစ်မှုန်မျှပင် မကျန်တော့ချေ။ အရာရာဟာ အဆုံးသတ်သွားပြီ ဟုသူသိလိုက်သည့် အချိန်ကစ၍ ပျော်ရွှင်မှုတို့သည်လည်း သူ့ဆီမှ ပျောက်ကွယ်သွားကြပြီ။ ရင်ထဲမှ ခံစားရသော ဝေဒနာကို ဖွင့်ပြရန်လည်းမလိုတော့ပြီမို့ သော့ခတ်၍သာ သိမ်းထားလိုက်တော့သည်။

"မောင်လင်းအံ့မင်း နှင့် မချစ်ရိပ်ချို တို့၏ စေ့စပ်ကြောင်းလမ်းပြီးစီးခြင်း.."

သတင်းစာတွင်ပါလာသော စေ့စပ်ကြောင်းလမ်းပြီးစီးခြင်း ကြော်ငြာလေးကို မင်းပြည့်တစ်ယောက် စိတ်ဝင်စားစွာ ဖတ်ကြည့်ပြီးတော့မှ
"သွက်လှချည်လား..ကိုယ့်လူ..ငါ့တောင်အသိမပေးဘူး...စေ့စပ်တာမြန်လိုက်တာ..ဘယ်တော့စားရမှာလဲ..သတ်မှတ်ပြီးပြီလား....."
"နောက်လထဲလို့ပြောတာပဲ....."
စိတ်မပါလက်မပါ ဝတ္တရားကျေဖြေလိုက်သော သူ့ကို မင်းပြည့်က နားမလည်စွာ
"မင်းဟာကလည်း.. မသေမချာနဲ့..ပြီးတော့..ခုချိန်ကမင်းပျော်နေရမယ့်..အချိန်လေ..ဘယ်လိုဖြစ်လို့...မှိုင်တွေငေးငိုင်နေတာလဲ..သတို့သားလောင်းကြီးရ......"

"ပျော်ရမယ်!...ဘာအတွက်ပျော်ရမှာလဲ?..."
"မင်္ဂလာဆောင်ကာနီး..သတို့သားတစ်ယောက်က..ပျော်ရွှင်တက်ကြွနေရမှာပေါ့ကွ...ခုဟာက..အတင်းပေးစားလို့ပဲ..အားနာပါးနာယူရမယ့်..လူကျနေတာပဲ...."
"အဲ့လောက်တောင်..ငါ့ပုံစံက..သိသာနေလား?.."

လင်းအံ့ပြန်မေးလိုက်သော အမေးကြောင့် မင်းပြည့်အတော်လေးပင် စိတ်ပျက်သွားပုံ
"မင်း..ငါ့ကိုအမှန်အတိုင်းပြော..လင်းအံ့... ဒီကိစ္စက မင်းဆန္ဒမပါပဲ...အတင်းစီစဥ်ထားတာလား?..."

မင်းပြည့်သိတော့လည်း သူ့အတွက်မထူးတော့ပြီလေ။ တစ်ဖက်သား မိန်းကလေးလည်း သိက္ခာကျမည့်အဖြစ်မျိုး သူ မဖြစ်စေလို၍ မင်းပြည့်အမေးကို မဖြေတော့ပဲ နေရာမှ ထကာထွက်လာလိုက်တော့သည်။

ဖြစ်နိုင်လျှင် စေ့စပ်ပြီးသည့်နေ့မှစလို့ သူမည်သူတစ်ဦးတစ်ယောက်နှင့်မျှ မျက်နှာချင်းမဆိုင်ချင်​တော့။ ထိုနေ့ကလည်း လူကြီးများကစီစဥ်စရာရှိတာ စီစဥ်ကာ၊ လုပ်သင့်သည့်အလုပ်များကိုလုပ်ပြီး သူကတော့ နေရာတစ်ခုတွင်ပင် မလှုပ်မယှက် မျက်လွှာချကာ ထိုင်နေခဲ့သည်။အားလုံးကို အရှုံးပေးထားသည် မဟုတ်လား။သူ့ဘဝကြီးတစ်ခုလုံးကို သူ မပိုင်တော့ပြီလေ။ပိုင်ချင်စိတ်လည်း မရှိတော့ပေ။