ချစ်သောမဟာမောရိယ[Completed]

အခန်း[၈]

ညချမ်းအချိန်ဆုမွန်မီးအိမ်မျှောခြင်းနှင့်သူစိမ်းမိန်းကလေးနှင့်တွေ့ဆုံခြင်း

ရက်အတော်ကြာ ခရီးနှင်လာခဲ့ပြီး ဟွားစစ် သည် ပဉ္စဒီပဏီ ငါးပြည်ထောင်စုထဲမှ မဟာမောရိယနွယ်ဝင်တို့ ထီးနန်းစိုက်ရာ ဥတ္တရဂန္တပြည်နယ်၏ ကျေးရွာကလေးတစ်ရွာသို့ ရောက်လာခဲ့သည်။

တစ်ရွာလုံးသည် ယမုံနာမြစ်ကမ်းဘေးရှိ မြေသြဇာကောင်းမွန်သော လယ်ယာမြေများတွင် စိုက်ပျိုးမွေးမြူရေးလုပ်ကာ အသက်မွေးကြသည့် လယ်သမားရွာကလေးဖြစ်သည်။ ရွာကလေး၏ အနောက်ဘက်တွင် ဂန္တမာလာတောင်တန်းကြီးက မြင့်မြင့်သွန်းသွန်း ကာဆီးထားသည်။

ညနေဆည်းဆာချိန်တွင် နေမင်းသည် အနောက်မိုးကုပ်စက်ဝိုင်းဆီသို့ မဝင်ပဲ ထိုတောင်တန်းများအောက် နစ်မြှုပ်သွားသကဲ့သို့မြင်ရသည်။ ချိုးငှက်နှင့် ဘုတ်ငှက်များ၏ တွန်ကျူးသံကို ကြားရသည်။

ဟွားစစ်သည် အနှီလယ်သမားရွာငယ်လေးကို သဘောကျလှသဖြင့် ခေတ္တတည်းခိုရန် ရွာဦးရှိ ဧည့်ရိပ်သာဆီသို့ လှမ်းလာခဲ့သည်။ ဧည့်ရိပ်သာမှာ ခပ်နိမ့်နိမ့်လေးတည်ဆောက်ထားကာ မျက်စောင်းထိုး အနေအထားတွင် ညောင်ပင်ကြီးတစ်ပင်ရှိသည်။ ညောင်ပင်ကြီးမှာ နှစ်ပေါင်းရာချီရှိခဲ့သော အပင်ကြီးဖြစ်၍ ၎င်း၏ အမြစ်များမှာ မြေသားအပြင်ဘက်သို့ ထီးထီး ပေါ်ထွက်နေသည်။ ခပ်ဝိုင်းဝိုင်းသဏ္ဌာန်ရှိ ညောင်ရွက်များမှာ စိမ်းစိုနေကာ နေရာတော်တော်များများကို အရိပ်ရစေသည်။ ၎င်း၏ ပင်စည်တွင် လူအများနားနေရန် ကွပ်ပျစ်ကလေးတစ်ခု တည်ဆောက်ထားပြီး ထိုအနီးတွင် မောရိယန် ကလေးငယ်များ ဆော့ကစားနေကြသည်။

ဧည့်ရိပ်သာထဲတွင် တရေးတမော အိပ်စက်အနားယူပြီး ဟွားစစ်နိုးထလာသည့် အချိန်တွင် ရွာသူရွာသားများက စားစရာ သောက်စရာများ လာပို့ပေးထားကြသည်ကိုတွေ့ရသည်။ မြေအိုးဖြင့် ချက်ထားသော ပူပူနွေးနွေး ထမင်းတစ်အိုးနှင့် အသားများ အသီးအရွက်များကို ရောကျိုထားသော ဟင်းတစ်ခွက်၊ နွားနို့ကတစ်ခွက်ဖြစ်သည်။ ဟွားစစ်သည် အစားအသောက်လာပို့ပေးသူများကို လှိုက်လှိုက်လှဲလှဲ ကျေးဇူးတင်ရင်း ဆာလောင်နေသည့် ဝမ်းဗိုက်ကို ဖြည့်ရသည်။ စားသောက်ပြီးသောအခါ အညောင်းပြေ အညာပြေရွာလမ်းမထဲသို့ လမ်းလျှောက်ထွက်ခဲ့သည်။ ထူးဆန်းသည်မှာ တစ်ရွာလုံးရှိလူများသည် ရွာပြင်ဘက်သို့ တဖွဲဖွဲ သွားနေကြသည်။ သို့နှင့်သူသည် မောရိယန် ဘာသာစကားဖြင့် အနီးမှတွေ့သော လူတစ်စုအား မေးမြန်းကြည့်မိသည်။