ဟူဒီအဖြူနှင့် တီရှပ်လက်ရှည်အဖြူကို လက်တစ်ဖက်စီ၌ကိုင်လျက် သေချာကြည့်ပြီးနောက် တီရှပ်လက်ရှည်ကို ဘီဒိုထဲပြန်ထားလိုက်သည်။တစ်မနက်လုံး အဖြူရောင်အဝတ်အထည်များသာ ရှိနေသော အဝတ်ဘီဒိုကို ဖွင့်လိုက်ပိတ်လိုက်၊တစ်ထည်ပြီးတစ်ထည် ထုတ်ကြည့်လိုက် ပြန်သွင်းလိုက်လုပ်နေသည်မှာ ချစ်သူနှင့် ပထမဆုံးဒိတ်ကို သွားရမည့် မိန်းမငယ်လေးလို။မှန်ကိုအချိန်ကြာကြာ ဟိုလှည့်သည်လှည့်နှင့် ကြည့်နေမိသောအခါ မှန်မှတစ်ဆင့်မြင်နေရသော တိမ်ယံသည် မျက်မှောင်ကြုံ့လျက် သူ့အား စိုက်ကြည့်နေသည်ကို တွေ့လိုက်ရသည်။
"ဟီး...ငါဒီနေ့အစ်ကိုမာန်နဲ့ချိန်းထားလို့လေ။မင်းရောလိုက်ခဲ့မလား။အစ်ကိုမာန်က ပန်းတွေအများကြီးရှိတဲ့နေရာ ခေါ်သွားမယ်တဲ့''
"သူခေါ်တိုင်း လိုက်စရာလား။ငါစိတ်ပါရင် ငါ့ဟာငါသွားမယ်။မင်းသာ မြန်မြန်သွားပြီး မြန်မြန်ပြန်လာ။အပြင်ထွက်လေ့မရှိလို့ တစ်ခါတစ်ခါထွက်ပြီးတိုင်း သေမတတ်ပင်ပန်းနေပြီးတော့''
"အင်းပါ။ငါ အဲ့ဒီ့တစ်နေရာထဲသွားပြီး ပြန်လာခဲ့မယ်။ကတိ..ကတိ''
တိမ်ယံသည် ခွန်းမြတ်စံအား စိုက်ကြည့်နေရာမှ ရုတ်တရက်ဆန်စွာပင် ဝတ်ထားသောတီရှပ်အမည်းကို ချွတ်ချလိုက်သည်။ထို့နောက် ခွန်းမြတ်စံကို ကျောပေးရပ်လိုက်သောအခါ ကျယ်ပြန့်သော တိမ်ယံ၏ နောက်ကျောပြင်တွင် ငှက်တောင်ပံပုံစံအမည်းရောင်တက်တူးက နေရာအပြည့်ယူထားသည်ကို တွေ့လိုက်ရသည်။
"လှလိုက်တာ တိမ်ယံရာ။ဘယ်တုန်းက ထိုးလိုက်တာလဲ''
"မင်းက ငှက်တွေအကြောင်းအမြဲပြောနေပြီး အတောင်ပံလိုချင်တယ်ပဲဖြစ်နေတော့ ငါလည်းထိုးလိုက်တာ။မင်းကြိုက်တာမှန်သမျှ ငါကြိုက်တယ်လေ''
ခွန်းမြတ်စံသည် မြင်နေရသော ကျောပြင်ကျယ်ကြီးထံ ပါးအပ်လိုက်ပြီး တိမ်ယံ၏ ခါးကို လက်သွယ်သွယ်များဖြင့် ခပ်ဖွဖွဖက်ထားလိုက်သည်။
"မင်းလို သူငယ်ချင်းမျိုးရတာ ငါ့အတွက်တော့ တကယ့်ကို ကံကောင်းမှုကြီးပဲ သိလား''
YOU ARE READING
ငှက်ဖြစ်ချင်တယ် (completed)
Romance(Unicode+Zawgyi) ခွန်းမြတ်စံသာ လှောင်အိမ်ထဲမှငှက်ကလေးတစ်ကောင်ဆိုလျှင် တိမ်ယံမိုးသည် ငှက်ကလေးမသေရုံအစာကျွေးပေးသူနှင့်တူပြီး ရဲမာန်ကမူ လှောင်အိမ်တံခါးကိုဖွင့်ပေးနိုင်သည့် သော့တစ်ချောင်းနှင့် တူပေသည်။ ခြန္းျမတ္စံသာ ေလွာင္အိမ္ထဲမွငွက္ကေလးတစ္ေကာင္ဆိုလွ...
