ကားဘေးပြတင်းပေါက်မှ လှမ်းမြင်နေရသည့် မြင်ကွင်းများကို ခွန်းမြတ်စံငေးကြည့်နေမိသည်။လယ်ကွင်းတစ်နေရာတွင် ညောင်ပင်ကြီး၏ အရိပ်အောက်၌ တဲအိမ်ကလေးတစ်အိမ်ရှိနေပြီး ထိုညောင်ပင်တွင် နွားကလေးတစ်ကောင်ကို ကြိုးခပ်လျော့လျော့ချည်ထားသည်ကို တွေ့ရသည်။အိမ်ရှေ့ကို တံမြက်စီးသေချာလှဲထားသော ထိုတဲအိမ်လေးသည် တည်ငြိမ်အေးချမ်းသော အသွင်ကိုဆောင်နေသည်။ခွေးကလေးတစ်ကောင်လို အပူအပင်မရှိဝပ်ဝပ်လေးအနားယူနေသော နွားကလေးကိုလည်း ခွန်းမြတ်စံ အားကျသောမျက်လုံးများဖြင့် ကြည့်နေမိပြန်သည်။သို့သော် ခွန်းမြတ်စံ အရင်လို အထီးကျန်မနေတော့ပါ။ ခွန်းမြတ်စံ၏ ပုခုံးကိုမှီ၍ အိပ်ပျော်နေသော တိမ်ယံမိုးသည် ခွန်းမြတ်စံအနား အမြဲရှိနေမည့် ခွန်းမြတ်စံတန်ဖိုးထားရသူဖြစ်သည်။မြင်နေရသော ဆံနွယ်ရှည်များကို ဖိကပ်နမ်းလိုက်ပြီး ကားဘေးဘက်သို့ ပြန်ကြည့်နေလိုက်သည်။
"အင်း....ခွန်းစံ။မရောက်သေးဘူးလား''
"ရောက်ရင်နှိုးမှာပေါ့ကွာ။ဆက်အိပ်..ဆက်အိပ်''
"မင်းလည်း အပြင်ပဲကြည့်မနေနဲ့။မျက်စိညောင်းမယ်''
"အေးပါကွာ''
ခွန်းမြတ်စံ ပြုံးမိသည်။မေမေနှင့်ဖေဖေထံမှမရရှိသော ဂရုစိုက်မှုကို တိမ်ယံက အပြည့်အဝပေးသည်ဟု ခံစားရသောကြောင့်ဖြစ်၏။
မြေပြန့်မှသည် တဖြည်းဖြည်း တောင်တန်းများကို မြင်လာရသည်နှင့်အမျှ မြူခိုးမြူငွေ့များကြား စိမ်းလန်းသော သဘာဝတရားကြီး၏ အေးချမ်းမှုကိုပါ ခံစားလာရသည်။
ပြင်ဦးလွင်.....
ကျောက်တိုင်ထက်တွင် စာလုံးမည်းကြီးဖြင့် ရေးထားပြီး Pyin Oo Lwin ဟူသော စာလုံးကိုမူ စာလုံးမည်းကြီးအောက်တွင် အနီရောင်ဖြင့် ရေးထားသည်ကို တွေ့ရသည်။ဖေဖေသည် သူ၏ဒုတိယဇနီး အကြံပေးချက်အရ ခွန်းမြတ်စံ၏ စိတ်ကြည်လင်စေရန်ဟူသော ရည်ရွယ်ချက်နှင့် ပြင်ဦးလွင်ရှိ အပန်းဖြေအိမ်သို့ လွှတ်လိုက်သည်။ခွန်းမြတ်စံ၏ ခံစားချက်များအစစ်အမှန်များကိုမူ ဖေဖေ နားထောင်ချင်ဟန်မရှိပါချေ။
..............................................................
YOU ARE READING
ငှက်ဖြစ်ချင်တယ် (completed)
Romance(Unicode+Zawgyi) ခွန်းမြတ်စံသာ လှောင်အိမ်ထဲမှငှက်ကလေးတစ်ကောင်ဆိုလျှင် တိမ်ယံမိုးသည် ငှက်ကလေးမသေရုံအစာကျွေးပေးသူနှင့်တူပြီး ရဲမာန်ကမူ လှောင်အိမ်တံခါးကိုဖွင့်ပေးနိုင်သည့် သော့တစ်ချောင်းနှင့် တူပေသည်။ ခြန္းျမတ္စံသာ ေလွာင္အိမ္ထဲမွငွက္ကေလးတစ္ေကာင္ဆိုလွ...