နီထွေးနေသော သစ်ရွက်ကလေးများသည် အလင်းကြောက်သည့် ဆောင်းရာသီ ကုန်ဆုံးတော့မည် ဖြစ်ကြောင်း အသိပေးနေသည်။ဟိုးအဝေးတစ်နေရာမှ ဥသြငှက်ငယ်၏ တစ်ကိုယ်တော်ရင်ဖွင့်သံ သဲ့သဲ့ကိုလည်း ကြားနေရသည်။ရေချိုးပြီးခါစ သနပ်ခါးအဖွေးသားနှင့် အရွယ်စုံကလေးများသည် သစ်ပင်များဖြင့် ခြံရံထားသော အတန်အသင့်ကျယ်သည့် မြေနီလမ်းလေးထက်တွင် ထုပ်စည်းထိုးတန်းကစားနေကြသည်။ထိုမြေနီလမ်းလေးထက် အနည်းငယ်မြင့်သော ကုန်းမို့မို့ပေါ်တွင် သစ်သားအိမ်ငယ်လေးတစ်ခု ရှိနေသည်။ခြံစည်းရိုးတောက်လျှောက်တွင် သစ်ခွပန်းရောင်စုံဖြင့် အလှဆင်ထားသော ထိုနှစ်ထပ်အိမ်ကလေးသည် အဝေးကကြည့်လျှင်ပင် တည်ငြိမ်အေးချမ်းသော အသွင်ကိုပေးသည်။
"ပူစူးရေ ဟိုဘက်အိမ် ဘဘကို ဒီသင်္ဘောသီး လေး သွားပေးပေး၊လက်နှစ်ဖက်နဲ့ ရိုရိုသေသေပေးနော်။မေမေ ပေးခိုင်းတယ်လို့ပြော ကြားလား၊ဖြည်းဖြည်းသွား မပြေးနဲ့''
ကလေးအုပ်စုထဲမှ လူကောင်အသေးဆုံး ကောင်လေးသည် သူ့တစ်ဝက်လောက်ရှိသော သင်္ဘောသီးကို မနိုင်မနင်း ပွေ့ကာ ကုန်းမြင့်အိမ်ကလေးဘက်သို့ ခုန်ဆွခုန်ဆွ လျှောက်လာသည်။တစ်ချက် တစ်ချက်ခုန်လိုက်တိုင်း ပြည့်ဖောင်းနေသော ပါးကလေးများက ဂျယ်လီတုံးလေးလို တုန်ခါသွားသည်။
"ဘဘ မေရီး ပေးခိုင်းတာ''
မီးခိုးရောင် သိုးမွှေးအကျီလက်ရှည်ကို ဝတ်ထားသော အဘိုးအိုတစ်ဦးသည် ခြံထဲရှိ နှင်းဆီအဝါနှင့်အဖြူရောစိုက်ထားသော ပန်းအိုးကို ရေလောင်းနေသည်။လူကောင်သေးသလောက် အသံစာသည့် ကလေးလေး၏ မပီကလာပီကလာ အသံစူးစူးကို ကြားလိုက်ရသောအခါ အဘိုးအို၏ လေးကိုင်း သဏ္ဍာန် နှုတ်ခမ်းလေးများ အပေါ်သို့ ကော့ညွတ်သွားသည်။
"ကဲ ဒီမှာ သကြားလုံးတစ်ဆုပ်ယူသွား..သူငယ်ချင်းတွေနဲ့ ခွဲစားနော် ပေါက်စလေး..မေကြီးကို ဘဘက ကျေးဇူးတင်ပါတယ်လို့ ပြောပေးပါဦးကွယ်''
အဘိုးအိုပေးသော သကြားလုံးများကို လက်သေးသေးလေးများနှင့် အကုန်မသယ်နိုင်သောအခါ ကျောပြင်သေးသေးတွင် ချီထားသော စူပါမန်းဝတ်ရုံကို အိတ်လုပ်၍ သိမ်းထည့်လိုက်သည်။သကြားလုံးထုတ်ကို ကြင်ကြင်နာနာ ပွေ့ဖက်ကာ ခြေသလုံးတုတ်တုတ်ကလေးများဖြင့် လုံးနေအောင်ပြေးသွားလေသည်။
YOU ARE READING
ငှက်ဖြစ်ချင်တယ် (completed)
Romance(Unicode+Zawgyi) ခွန်းမြတ်စံသာ လှောင်အိမ်ထဲမှငှက်ကလေးတစ်ကောင်ဆိုလျှင် တိမ်ယံမိုးသည် ငှက်ကလေးမသေရုံအစာကျွေးပေးသူနှင့်တူပြီး ရဲမာန်ကမူ လှောင်အိမ်တံခါးကိုဖွင့်ပေးနိုင်သည့် သော့တစ်ချောင်းနှင့် တူပေသည်။ ခြန္းျမတ္စံသာ ေလွာင္အိမ္ထဲမွငွက္ကေလးတစ္ေကာင္ဆိုလွ...