DI SCAMMA BWOY: A Jamaican Love Story

CHAPTER 43

Five days later....
March 13

DEE'S POV

Mi did in a deep sleep until mi hear di baby start mek some noise.

"Waaii..." di baby start cry.

Mi open mi eye and look pon her lay down beside mi. Mi slowly raise up and tek her inna mi hands. Mi tek mi likkle time tek out mi breast because dem di tender bad and mi nipple dem did sore.

Mi put di nipple a her mouth and she latch on to it wid har gum.

"Mhmm." Mi moan inna pain.

She start suck and mi hiss inna pain.

"Babes yuh good?" Badz ask mi him voice hoarse.

"Yeah... juss a feed di baby." Mi respond and him get up from off di bed.

Mi hear him footsteps a walk roun di room until mi see the light turn on.

Mi look pon him thru di mosquita net as him walk back come a di bed.

Him come back beside mi and lay down a look pon mi a feed di baby.

Mi rest mi head pon di headboard as think.

Mi naa lie dah baby yah keep mi up every night and as early as morning light she wake. Everytime mi waa sleep she wake and lawd mi tired.

Mi juss glad mi have Badz fi help wid her wen him deh yah because him all a open waa new lounge inna St. Ann and him aguh go weh lata afta mi come from six day clinic wid di baby.

Mi no know how some girl do it by demself because mi know mi couldnt dweet alone.

"Yuh tired babes?" Badz voice draw mi outa mi thoughts.

Mi open mi eye and look pon him.

"You a one sumady weh nuh fi ask mi dat. Look how much time mi wake from night fi feed har. She greedy nuh rass and she a stress mi out." Mi complain as mi tek up mi phone fi check di time fi see seh a 3:07.

"If mi did have breast mi coulda help yuh feed har but mi nuh have none." Badz seh as him touch up him nipple pon him flat chest and laugh.

"U gweh yaa cause you is a a whole clown." Mi seh and laugh out.

"But yuh can ask di nurse dem if she can get feeding because a three more month yuh have before yuh haffi guh back a work nuh true?" Badz ask mi

"Yeah. Wen mi go inna di morning mi ask di nurse." Mi seh and look down pon Devonae fi see har a sleep.

She stop suck now so mi tek mi time and ease mi nipple out har mouth.

Badz tek har outa mi hand and put her pon di bed beside him.

Mi tek up one a har clean baby rag and wipe off mi nipple before mi put in back mi breast.

"Guh turn off back di light and mek mi guh sleep yaa man." Mi seh to Badz and him do just dat.

Mi lay back down and doze off same time.

《🦋💜🦋》

Mi just aguh walk outa di clinic fi go meet Badz outside. Devonae did a sleep and she juss get juck.

Mi know she aguh have fever and aguh bawly bawly lata but mi juss aguh brace miself fi it cause mi know mi naa get no rest.

There is no rest fi di wikid. Mi subconcious laugh.

Shut up yuh bombo. Who wikid? Mi kiss mi teeth and tek out mi umbrella fi walk guh towards Badz car.

Mi open it and a walk guh same time mi see waa girl weh mi know weh used to guh Steths. She did olda dan mi but mi har did a good fren. We did lose contact wen she leff skl.