DI SCAMMA BWOY: A Jamaican Love Story

CHAPTER 46

One month two weeks later...
December 23rd

BADZ POV

A nearly two month now since mi fuck up wid Dacia. Di girl barely look pon mi wen mi come fi look fi Devonae. Mi know a only thru Dev mek she talk to mi.

A dat yuh fi fucking get idiot bwoy. Cyaa keep yuh likkle shrimpy inna yuh pants. Mi subconcious seh.

Yuh wish a did shrimp.

Anyways, tomorrow a Grandmarket and mi know di club and di lounge aguh busy so mi haffi deh there fi monitor dem. Mi decide fi nuh keep nuh party this year, but mi know dem still aguh pack.

Mi deh uppa Dacia madda house a look fi Devonae because mi nuh see her fi bout a week now and mi long fi see mi likkle twin. Mi carry some pampers and feeding fi her because Dacia did seh dem soon done di last time mi come look fi her and mi no waa dem run out pon her.

"Feed her." Mi hear Dacia seh ova mi as she hand mi the baby bokkle full a feeding.

Mi tek the bokkle from her and she turn and walk guh back inna di kitchen.

She did inna dis likkle shorts and waa spagetti strap marina. She juss a tease mi so.

She a show yuh weh yuh cyaa have again. Mi subconcious laugh.

Kmt.

Dawg she not even bat a lash afta yuh. Mi subconcious seh and mi juss shake mi head.

"Daddy baby hungry." Mi smile to Dev as mi play wid her chin.

She smile and mi pull di bokkle and place di nipple a her mouth and she immediately latch on to it.

"A so yuh did hungry man? Yuh mada naa feed yuh?" Mi joke wid di baby.

Mi feed di baby as mi get lost inna mi thoughts.

Yow! Mi miss mi girl G. but mi know mi fuck up real bad dis yah time. Mi shoulda fucking know betta because di last time a couple months it tek before Dacia deh back wid mi. But mi know she naa deh back wid mi.

"Yuh eat?" Mi hear Dacia ask.

Mi smile and shake mi head.

"Mommy cook white rice and curry chicken. Yuh waa some?" She ask and mi nod and smile wid her.

She just walk turn and walk back inna di kitchen.

Dis yah fool yah. Nuh badda get excited now. Mi subconcious seh.

Shut up nuh Dawg.

Mi tek di bokkle outa di baby mouth because she did stop suck it.

"Belly full yah now?" Mi seh and rub her belly.

Mi hold her up and she smile wid mi.

She eva a smile wid yuh and mi nuh see wah she love bout yuh because yuh is a fuck up person. Mi subconcious seh.

She love har daddy. Move and gweh.

Same time Dacia walk in and put down di food and waa bottle a orange juice pon di likkle table infront a mi.

"Thanks." Mi seh and she just nod.

She walk weh go inna her room and mi look pon Dev. Mi put her inna her rocker and tek up di plate a food.

She fi poison yuh. Mi subconcious laugh. Juss poison him. Mi subconcious sing Dexta Daps song.

Mi know Dacia. She nuh suh wikid.