ဥက္ကဌက 'gay' နေတယ်တဲ့

~13~

Unicode

VIPဆေးရုံခန်းတွင်းရှိ ဆိုဖာပေါ်တွင် ထိုင်လျက် ဖုန်းကြည့်ရင်း ရယ်မောနေသော သွင်ယသော်နိုင်အား မြူမင်းနားမလည်နိုင်ဖြစ်နေရတော့သည်။ ဗီဒီယိုကြည့်နေပုံရသော သွင်ယသော်နိုင်မှာ ဘာကြောင့်မှန်းမသိ ပြုံးစိစဖြစ်နေတော့သည်။

"သွင်ယသော်နိုင်....သွင်ယသော်နိုင်..."

"ဟီးးးးဟိ....အယ်! ဗျာ ဗျာ....."

မြူမင်းခေါ်တော့လည်း ခေါင်းလေးစောင်းကာ လှည့်ကြည့်လာပါ၏။ သည်လိုဆိုတော့လည်း ထိုကောင်းလေးမှာချစ်စရာပင်။ မျက်မှန်ဝိုင်းလေးအောက်မှ မျက်ဝန်းဝိုင်းကလေးများမှာ အကြည့်မခွာချင်စရာ ဖြစ်နေပါ၏။

"ဘာတွေကြည့်နေတာလဲ....ကိုယ်လည်း ပျင်းတယ်လေ သွင်ယသော်နိုင်... အတူတူကြည့်ရအောင်..."

ဥက္ကဌ၏ ထိုစကားကြောင့် ပျော်သွားမိသည်မှာ မြောက်တက်သွားမတတ်ပင်။ အစကတော့ ဥက္ကဌကိုပါ bl seriesတွေ ပြဖို့ အစီအစဥ်ရှိပါသော်လည်း မှန်းချက်နဲ့ နှမ်းထွက်မကိုက်လျှင် အလုပ်ထုတ်ခံရကိန်းရှိသည်လေ။ ဒါကြောင့်မို့ ကိုယ့်ဘာသာ ငြိမ်ငြိမ်ကလေး ထိုင်ကြည့်နေခြင်း။ သည်လို ဥက္ကဌကိုယ်တိုင် အတူကြည့်မယ်ဆိုပြီး ပြောလာလေတော့ သူ့အတွက် ပိုအဆင်ပြေသည်။ အစကတည်းက ပြချင်နေသူမို့ ဇက်ခနဲ မတ်တပ်ရပ်မိသွားသည်။

"ဒါပေါ့ ဒါပေါ့ ပြရမှာပေါ့....."

ချက်ချင်းကြီး ဇက်ခနဲ ထကာ သူ့အနားရောက်လာသော သွင်ယသော်နိုင်ကြောင့် သူ့မယ် လန့်လန့်ဖြန့်ဖြန့်။ သည်ငဂျစ်ကလေးက လုပ်လိုက်ရင် အလန့်တကြားရယ်လေ။ လူနာကုတင်ဘေးထိုင်ခုံတွင် ဝင်ထိုင်ရင်း သူကြည့်နေသော ဇာတ်ကားအား ပြရန် ကြိုးစားလာတော့သည်။

"သည်ကားက အတော်ကောင်းတာ ဥက္ကဌရဲ့....ကျွန်တော်ဆို ကြည့်တာ သုံးခေါက်တောင်​ရှိပြီ...အလွတ်တွေတောင်ရလို့....ဟဲဟဲ...."

မျက်မှန်ကလေးပင့်တင်ကာ တဟီးဟီးရယ်နေလေသော ထိုကောင်လေးမှာ ရယ်လိုက်လျှင် မျက်ဝန်းများ ပိတ်ကျသွားတတ်လေသည်။ ထိုကောင်လေးမှာ ကလေးလေးများလို ဝမ်းသာအားရစွာဖြင့် သူ့အား ဇာတ်ကားပြရန် ပြင်နေတော့သည်။ မြူမင်း၏ အမြဲတစေ အလုပ်လုပ်နေရသည့် ဦးနှောက်မှာ ချက်ခနဲဆိုသလို အကြံဉာဏ်တစ်ခု ထုတ်လွှင့်လိုက်သည်မို့ သူ့မျက်နှာ ပြုံးတုံးတုံးဖြစ်သွားတော့သည်။