ဗီလိန်ကငါ့ကိုအရမ်းချစ်တယ်(Arc 5 to 8)

Arc 5.3(1)

unicode

အပိုင်း(၁၀၃)(လက်စားချေနေသောဆရာတူညီလေး၏ ဖိအားပေးအချစ် ၃.၁)

ဖွင့်ပြောခံရသောထိုနေ့မှစ၍ သူ့အပေါ်ထားသော မူလဇာတ်ကောင်၏သဘောထားက ရုတ်တရက်ပြောင်းလဲသွားသည်။ လန်ယွမ်အား စတင်လှောင်ပြောင်ခဲ့ပြီး နောက်ဆုံးတွင်မူ အသေးအဖွဲ့ကိစ္စလေးကို အပြစ်ရှာကာ ဂိုဏ်းမှနှင်ထုတ်ခဲ့သည်။

လန်ယွမ်က မထွက်သွားချင်သဖြင့် မူလဇာတ်ကောင်၏ရှေ့တွင် ဒူးထောက်တောင်းပန်ခဲ့သည်။

မမျှော်လင့်ထားဘဲ မူလဇာတ်ကောင်သည် လန်ယွမ်၏နှလုံးနေရာသို့ လက်ထဲမှဓားနှင့် ရက်စက်စွာထိုးသွင်းလိုက်သည်။ အကယ်၍ ထိုနေရာ၌ရှိနေသည့် အခြားလူများသာ မကူညီပါက လန်ယွမ်သည် ပွဲချင်းပြီးသေဆုံးရလိမ့်မည်။

၁၀နှစ်မက သက်တမ်းရှိခဲ့သောချစ်ခြင်းအတွက် သူတို့ရရှိခဲ့သည်က ဤသို့သောကံကြမ္မာမှလွဲ၍ တပါးမရှိခဲ့ပေ။

လန်ယွမ်သည် ချက်ချင်းပင်စိတ်ပျက်လက်ဖြစ်ကာ လှည့်ထွက်သွားခဲ့သည်။

မူလဇာတ်ကောင်ကမူ ပုံမှန်အတိုင်းပင် ကိုယ်ခံပညာကို ကြိုးစားသင်ယူကာ ဂိုဏ်းခေါင်းဆောင်ဖြစ်လာခဲ့သည်။

လန်ယွမ်ကမူ ဂိုဏ်းမှနှင်ထုတ်ခံရပြီးနောက် မပြိုလဲသွားရုံသာမက ပို၍သန်မာသွားကာ အလွန်အင်အားကြီးသည့် မိစ္ဆာဂိုဏ်းကို ထူထောင်ခဲ့သည်။

အဆုံးသတ်၌ မူလဇာတ်ကောင်သည် ဖမ်းဆီးခံ အကျဉ်းချခံရပြီး ရက်စက်စွာလက်စားချေခံရတော့သည်။

ထိုသို့သောဇာတ်ကြောင်းကိုနားထောင်ရင်း ပိုင်ယွီ အနည်းငယ်မျှခေါင်းကိုက်လာသည်။

လန်ယွမ်၏နှစ်သက်မှုက -၁၀၀%ဖြစ်နေသည်မှာ အံ့သြစရာမရှိတော့ချေ။

ဂိုဏ်းမှနှင်ထုတ်ခံရပြီး ၅နှစ်အတွင်း၌ မည်သို့အချိန်ကုန်ဆုံးခဲ့သည်ကို သူမသိခဲ့ရပေ။

ထိုအချိန်၌ လန်ယွမ်၏အသံက ပိုင်ယွီ၏နားထဲသို့ တိုးဝင်လာသည်။

"ဆရာတူအစ်ကို နိုးနေရဲ့သားနဲ့ ဘာလို့မျက်စိမဖွင့်တာလဲ"

ပိုင်ယွီ၏မျက်ခွံများက ချက်ချင်းလှုပ်မိလာသော်လဲ ဘာမှမပြောခဲ့ပေ။