When Sunshine faded its shine

Chapter 14

Sandaling natahimik si Sunshine at Gasser. Wala namang tumatakbo sa isip ni Sunshine kun'di ang paghihiganti.

"I'm expecting that from you, but you know it's not easy, right? Nag-iisa ka lang kumpara sa mga tauhan ni Senior Rajar," saad ni Gasser nang marinig ang sinabi ni Sunshine.

"Alam ko at kailangan ko ulit ang tulong mo, Gasser."

"What kind of help?"

"Kailangan ko ng mga armas at gamit sa pag-iispiya."

"Hindi ko magagawa ang hiling mo kung walang pahintulot mula sa pinuno."

"Alam kong papayag siya. Mabait siya sa akin dahil hinayaan niya akong umalis sa grupo para makasama ang kapatid ko. Kung gusto niya akong bumalik, babalik ako kapalit ng hinihiling ko."

"Isa ka pa rin sa Baracuda Slayer, Lady Sun. Hindi ka tuluyang inalis sa grupo. Pinagbakasyon ka lang ng pinuno."

Seryosong tumingin si Sunshine kay Gasser. Tinitigan niya ito. Hindi siya nagbawi ng tingin hanggang makita niya ang pagkailang nito.

"Paano mo nalaman? Kilala mo ba ang pinuno ng Baracuda? Ah... bigla kong naalala. Ikaw ang nagpaalam sa kaniya nang aalis ako noon para makasama ang kapatid ko, 'di ba? Nakita mo ba siya sa personal?" sunod-sunod niyang tanong.

Tumikhim naman si Gasser at tila sumusuko sa sunod-sunod na tanong niya.

"Hindi at tigilan mo na ang pagtatanong tungkol sa kaniya."

"Gusto kong makilala ang pinuno, Gasser. Makukuha mo naman ang mga impormasyon niya, 'di ba?"

"Bakit kailangan mo pang makilala ang pinuno, Lady Sun?"

"Gusto kong masiguro na hindi niya ako sasaktan habang ginagawa ko ang bagay na dapat kong gawin."

"Sige. Susubukan ko kung ano ang magagawa ko sa mga bagay na hinihiling mo, pero mag-iingat ka. Delikado ang mga taong kakalabanin mo. Hindi sila magdadalawang isip na patayin ka," pagbabago nito sa usapan.

Ngumisi naman si Sunshine at inalis ang tingin kay Gasser. "Alam ko, pero magsisimula pa lang ako. Hindi lang si Senior Rajar ang sisingilin ko, maging ang mga taong nasa paligid niya. Aalamin ko kung sino ang puno't-dulo ng pagkamatay ni Sonson at isusunod ko naman si Sage."

"Hindi isang normal na nurse si Sage. Baka mahirapan ka sa kaniya. Kung kailangan mo ng tulong, p'wede kong gawin iyon para sa 'yo. Sabihin mo lang."

"Ayokong madamay ka sa problema ko, Gasser. Ako na ang bahalang gumawa ng aks'yon sa bagay na iyon. Gawin mo na lang ang hinihiling ko sa 'yo. Mas kailangan ko ang mga iyon."

"Kung ganoon, aalis na ako. Babalitaan na lang kita kapag handa na ang mga kailangan mo."

Aalis na sana si Gasser nang marinig nito ang tunog ng palapit na sasakyan. Tumigil ito at muling tumingin kay Sunshine.

"Shoot! Nakalimutan kong sabihin, sinusundan din pala ni Mr. Angeles ang sasakyan ng dalawang 'yan kanina. Nauna lang ako, pero mukhang naligaw siya at ngayon lang nakarating dito. Umalis na tayo rito, Baka makita niya ang ginawa mo," saad ni Gasser.

"Hindi ako puwedeng umalis. Kailangan ko siya ngayon."

"Ano'ng plano mo?"

Hindi sumagot si Sunshine. Sa halip, binaril niya ang sarili. Pinadaplis niya ang bala sa tagiliran. Napaluhod siya sa kaniyang ginawa.

"Tsk! Pasaway ka talaga. Dinagdagan mo pa ang mga sugat mo. Ako na lang sana ang gumawa ng paraan kung sasaktan mo rin ang sarili mo." Umiiling na sabi ni Gasser. Kahit ganoon, alam na nito ang plano ni Sunshine. Kinuha ni Gasser ang baril sa dalaga at pinaputukan ang lupa sa unahan ng sasakyan ni Rayder. Mabilis naman nag-preno si Rayder. "Ngayon, iisipin ni Mr. Angeles na ako ang pumatay sa mga 'yan. Good plan, Lady Sun. Sana hindi niya ako makilala. Aalis na ako. Mag-iingat ka," paalam nito bago sumakay sa kotse at pinaharurot iyon paalis.