تصويت حبايب كاتبه جديده 😍😍😘
گعدت سويت عشى لابويه وكملت وبعدها تعشينا لوحدنا احنا لان مو دائما ناكل ويه ابويه واخواني ورى شوي سمعت ابويه صاح عليه
ابوي
زهره بويه
زهره
هلا بويه أمرني
ابوي
سمعي بنيتي نضفي المضيف عدل باجر جايني صديج من الولايه يبات يمي نضفيها وبخريها بويه عيب من الزلمه لان اول مره يجينا ويشوف السلف جاي يريد يتعرف على عمامه
زهره
ماشي بويه تدلل هلا بيه هسه انضفها
واسويها الك عروس
ابويه
عفيه بويه بارك الله بيج واريدجن باجر تهتمن بالغدى
زهره
صار بويه
طلعت من ابوي ورحت للمضيف شفت جهال حسن يلعبون بالمساند مالت المضيف وگلابينها بكل مكان صحت عليهم وطلعتهم بره بديت انضف وامسح واكنسها واغني من واني صغيره احبه لهيثم يوسف ودوم اغني باغانيه احب هدوءه وشكله وليل ونهار ادندن بالاغاني مالته كملت تنضيف وبخرتها بعدها طفيت الفحم مالت البخور وطلعت رحت يم البنات شويه سولفنا وضحكنا لساعه تقريبا بعدها رحت نمت لان ورانا گعده من الصبح لان هيج طبعنا من الخمسه نگعد وصدگ گعدنا استلمنا تنضيف البيت وغسلت الحوش الخارجي بيتنا بسيط ما بيه شي يعني اول ما تدخلين حوش مكشوف وبيه ديوان وتواليت بره وبعدها هول بيه غرف وحده لحسن هو وجهاله وحده لخالد وحده لابويه ولامي وحده ألي انه وعلياء وحده محمد وبسام وغرفه الخ مسوينها مخزن مخلين بيها اغراضنا الي منحتاجها وشغلات خاصه بالولاد تخص شغلهم بس اكثر گعدتنا بغرفة امي وابويه الى ان يطردونا المهم غسلت الحوش ودخلت اعجن العجين لان ماكو وكت لازم يختمر ورانا كومه شغل
زهره
يمه راح اعجن صدگ شنو راح تسوين غدى
امي
اي يمه كثري العجينات لان راح يجون ولد عمج يتغدون هنا ويه الزلمه وغدانا صبور ومرگة باميا
زهره
يمه انتم ما تملون من السمج مو البارحه گتيلي دجاج وولد عمي كلما واحد يجيلنا يجون شسالفه ما عدهم بيت
امي
ولج هو اكو احلى من السمج شو انتي متبطره عالنعمه وبعدين غير علمود ضيوف اليوم تردين العالم تاكل وجهنا ولازم يجون ولد عمج غير جاه وجه گدام الغرب
زهره
اروح اعجن احسلي ادري محد يهتم اكلنا لو ما اكلنا واحنا البنات مالنا حقوق عدكم
امي
دروحي كملي شغلج ام الحقوق بس لسانج شطوله
رحت كملت العجين ولكيت علياء تنضف بالغرفه وتبخرها اجيت ونمت عالمندر لان خلصت شغلي وبسمه وشيماء ويه امي لان بالبدايه جان نفر واحد هسه ولد عمي لزگو وصارت ست نفرات الله يستر وين ما يشوفون اكل وعزيمه يجون طايرين اثنين من ولد عمامي ماخذين خواتي الكبار ويردون بعد هم علياء لان يحبها من زمان وكاتل روحه عليها بس انه الحمدلله لا حبيت ولا نحيت المهم خلصنا شغلنا من وكت واجوي خطارنا صبينا الغدى سمج ومركة باميا وتمن وطرشي وخبز حار ولبن وكلشي من خيرات الله وبعدها سوينا چاي وديناه بيد الولد اخواني وگفت بشباك المطبخ اتفرج عليهم وهم يغسلون شفته الرجال الي جاي من الولايه بصراحه لابس افندي وشكله مرتب وحلو ومبين عليه مو من السلف لان اهل السلف كله دشداشه وجماغ بس هذا صدگ حلو
زهره
ولج علياء دباعي هالرجال ولج يخبل چنه هيثم يوسف
علياء
عزى ان شاءالله لا يجي حسن يشوفج والله يموتج
زهره
لج بربج تعالي شوفي يخبل يمه هيج وربي يرزقني بواحد حلو من الولايه واخلص من السلف وبيت عمامي اوووف حلم هذا
علياء
ولج سكتي لا تسمعج امي وصبيلهم دور ثاني چاي لا نحصل حجايه ورزاله
ما تركت الشباك ضلت عيني عليه عجبني وتمنيت اخذ واحد مثله لحد ما شفته فات للديوان رحت صبيتلهم چاي بس بالي وفكري كله يمه يطلع عمره تقريبا ٢٧ سنه بس معقوله ممتزوج اشو مبين عليه مرتب من شكله اووف اروح اكمل غسل مواعين ويه علياء لا تعيط بيه امي
كملنا شغلنا بس تعبنا كلش بعدها ركبت امي تشريب للعشى وشيماء خبزت واني سويت زلاطه ولبن وتمر وحضرنا كلشي وقت المغرب وصبينالهم العشى بعدها كملنا تعشوا وكملوا ورتبنا المطبخ وغسلنا مواعين ورى ساعتين تقريبا اجه حسن
حسن
انطوني فراش للرجال وألي انام بلديوان
شيماء
يااا عود ليش تنام بالديوان خلي بسام لو خالد اله انت
حسن
دنطني فراش للزلمه لا ابتلي بيجن عيب منه نعوفه لوحده فضنها اريد اروح لا ابوي يعيط بينا ولا تگرگن
رحت للمخزن طلعت البطانيات والفرش الجديده الي مخلينها بس للخطار وعطرتها وانطيتها لحسن
اخذ حسن الفراش وراح وتمنيت ياخذني وياه بالفرش حتى اشوفه الهذا الحلو الي اخذ عقلي وطار بيه
لحكايتي بقيه 💕💕
