البارت 6
انفتح باب الديوان واجه ابوي صاحني
ابويه
زهره تعاي بويه للغرفه وصيحي امج وحسن
زهره
صار بويه جيتك
رحت صحتلهم واني اترقب عيون ابويه وشفايفه اريد شي يفرحني وياخذني من توقعاتي واوهامي
ابوي
اسمعوني زين اتفقت ويه علي اذا طلگ مرته انطيه زهره مره أله لان هو ما مرتاح ومرته صاحبت مشاكل واليوم اجاني بعد ما طلگ مرته وراحت لهلها وهسه يريدني اوفي بوعدي وازوجه زهره شتگولون انتم والرجال طلع گد حجايته
حسن
بويه مالنا كلام بعد كلامك انت الامر والناهي خلاص حدد وقت وان شاءالله خير الي يريحك سويه وصدگ علي والنعم منه
امي
انه ما موافقه ولا راح اوافق ما ارتاحله هالرجال ادري مالي راي يمكم بس حرام عليكم زهره
ابوي
انتي شعرفتي منه الرجال ما يتعيب وخوش زلمه وكسيب بعد شتردين وراح يگعد بنتج ويه امه واخوانه اثنين واحد متزوج واحد لا وبنتج مربايه تعرف شلون تكسب عيالها
امي
بكيفك بعد الله يستر من الزواجه
حسن
يمه گولي يالله هسه ان شاءالله تحبينه ويصيرلج ابن مو بس نسيب
امي
ان شاءالله اتمنى هالشي
رحت لغرفتي والفرحه اكبر من هالكون فعلا وفى بوعده وطلگ مرته على مودي ربي ديم السعاده عليه وفرحني وريح بالي هيج اندعي ويه الفرحه ثاني يوم طلع علي وشفته من بعيد وگلبي يرف عليه اريد اروح احضنه واشمه اوووف شوكت نتزوج ويصير ألي راح علي واخذ روحي وياه وعقلي وفكري كله بيه اجه ابوي
ابوي
هيله وزهره تعالن
رحنا وكعدنا
اسمعن اتفقت ويه الرجال الخطبه الجمعه بعد اربع ايام واتفقت عالحگ والحاضر والغايب بعد انتن تحضرن وهاي فلوس ختروح للولافه (الحلاقه او صالون ) وتشتريلها نفنوف (فستان) وكملن شغلجن بعد لان الرجال مستعجل ويريد يفرح امه
امي
ان شاءالله نلحگ ما عدنا شي من باجر نعزل البيت علمود الگعده منو راح يجي وياه من اهله
ابوي
امه وخواته اثنين واخوانه وعمامه وان شاءالله ربي يسعدج بويه انتي فقيره وتستاهلين الخير كله
.................................
طلعت من يمهم واني طايره من الفرح خلاص راح اصيرله ويتحقق حلمي اي حلمي جان حلم بالنسبه ألي حلم وردي وهادئ وبريئ رتبته باوهامي وسهر ليلي وراحة بالي اني الي دفعت ثمن هالحلم الي جنت اضنه وردي وهو اسود من ظلام الليل شيخلصها هالايام الطويله ليش ايام الفرح بسرعه تخلص وساعة الانتضار اطول من العمر تحدد موعد الخطبه وانتضرت ساعه ساعه ويوم يوم شگد طويله جانت الايام شوكت تجي الجمعه واشوف علي ويصير حلالي معقوله راح يحبني ويدللني ويريحني واصير هيج مثل خواتي كل وحده بيتها وجهالها كل بنيه تحلم بشخص وتحبه بمخيلتها وتفكر بيه ليل ونهار علي حلمي الوردي وفارس لاحلامي واجت الجمعه كملنا تحضيرات البيت وكلنا مخبوصين خواتي وجهالهم واحنا كلنا فرحانين
