البارت 7
ومره اجانا علي بليل وكال اريد اسبح تعبان گمت حضرت الحمام ومن داخلي الخاولي كمشني من ايدي وبده يبوسني معود عوفني اهلي منا گوه طلعت من يمه بس گلبي دگاته اقوى من الطبل حيل خفت لا اهلي يشوفونه طلع من الحمام ورحت يمه بالديوان
علي
زهره ميصير لازم نختلي لوحدنا لازم نتعرف على بعض اكثر ما عدنا خصوصيه بالبيت
زهره
شأسوي يا علي يعني شلون والله استحي من اهلي انت مدشوفهم
علي
اي ادري بس ميصير هيج كلما اگعد يمج لو ابوج لو اخوانج يمنا ميصير اريد اسولف وياج نريد نتعرف على بعض نريد نحجي بخصوصيه ونتغازل
زهره
ما بقى شي ان شاءالله على زواجنا وراح تشبع مني وتمل ميخالف تحملني شوي
علي
لو امل من الدنيا كولها ما امل منج انتي روحي بس اهم شي من نتزوج تديرين بالج على اهلي هم كلشي عندي
زهره
لا تخاف اهلك هم اهلي ومراح افرق بينهم صدگني
علي
عفيه عليج طليقتي جان دوبها ودوب اهلي متحبهم وتكره امي وطلگتها لهذا السبب جانت اذا اجوي خواتي تدخل لغرفتها وتسد الباب حتى سلام ما تسلم عليهم ولا تطبخ ولا تنضف كله هن خواتي خطيه
زهره
عجيب ليش هيج ماكو احلى من لمة الاهل ان شاءالله راح تكون راضي عليه وربي يقدرني واسعدك
علي
اي هذا الكلام الحلو ويريح البال وراح اكون الج اهل وعزوه
.................🍁🍁🍁🍁...........
بقى علي عدنا يومين وبعدها راح ورى تقريبا اسبوع اجه وگال لازم نتزوج لان خلاص بعد ما اتحمل واتفق ويه اهلي الاسبوع الجاي عرسنا
.................
اووووو لو تدرون شلون نخبصنا وتعبنا كلش ركضه ليل ونهار وماكو راحه بس بنفس الوقت فرحانه خلاص وقت الانتضار انتهى واجة ساعة الراحه والاشتياق اجت ساعة الحب والامل هذاالي جنت اضنه والي جان ابالي
لحد ما اجت يوم الحنه ولبست فستان احمر ورحت للحلاقه وحنيت ايدي وكملت شغلات الزواج المعروفه صبغ وحف وووووو بحيث تعبنا بيومها 😰😰😰
بعدها سويت حفله مالت حنه وعزمت كل اقاربي واهلي وصديقاتي
بس علي ما اجه لان ملتهي
وطكينا صور تونسنا هوايه حفله كلش حلوه ومرتبه بعدها نمت بس هلكانه من التعب قبل يومين راحت امي واختي رتبوا اغراضي بالغرفه وگالو بيتهم حلو وغرفتج حلوه طبعا راح تگولون شلون لا شفتي البيت ولا شفتي الغرفه ولا طلعتي ولا مشيتي اني اگوللكم ابوي واخواني ذبات عشاير وكلشي عدهم عيب وما يصير لا اشتريت غرفه على ذوقي مثل بنات الولايه ولا طلعت ولا مشيت ويه علي بس مجرد يجي للبيت بحضور ابوي واخواني يعني كلشي ما شفت من خطبتي عاديه بس اتذكر بعض النضرات المسروقه او الكلام الي بالبوكه او لمسه او بوسه خاطفه وعيونا تترقب الدرب هيج عدت المهم صار يوم الزواج ومثل كل البنات مخبوصين من الصبح والبيت متروس عالم من اقاربنا رحت صالون ومكياج وبدله بيضه بياضها ناصع مثل گلبي وفطارتي كملت وجهزت وصارت بالاربعه واجوي اخواني جابوني للبيت اباوع لامي ولخواتي ودموعي تصب
علياء
زهره مكياجج راح يخرب شنو سالفتج هاي مرتين نرتبه الج يمعوده راح يجون اهل العريس
امي تهلهل وعينها عليه اجتي خلت بيدي حبات ملح
امي
هاج يمه خليها بيدج من العين طالعه مثل الگمر وهذه حبات شكر خليها تحا لسانج حتى تصير حياتج حلوه مثل الشكر
زهره
ماشي يمه بس ارضي عليه يالغاليه
امي
شعندي وياج يا يمه ردتج تنسعدين گلبي وربي راضين عليج
.....................
وفتحتلي القرأن على سورة ياسين وخلته بيدي قرأن صغير خليته بيدي ويه باقة الورد الي لازمتها بيدي
...........
اجوي اهل العريس والبيت انگلب بالهوسات والدبكات بعدها دخل ابوي وسلمني بيد علي وطلعت العالم للسيارات واني محتاره بدلتي وخواتي وياي صعدت بالسياره صعدت وياي اخت علي بشرى ام حيدر الكبيره وامه گعدت ليگدام زفونا للفندق وصلنا وقت المغرب نزلت العالم تركص بالشارع وتدبج لحد ما دخلونا للفندق نزلن خواتي وامي وخواته وبنات خالاته ويانا زفونا للغرفه وودعت اهلي ودموعي تصب وامي توصيني وتفهمني وبعدها راحوا راح اخو علي جابلنا عشى وسلم علينا وراح
علي
واخيرا صرنا لوحدنا لا اهلي ولا اهلج اليوم شيخلصج مني
زهره
ههههه لا علي لا تخوفني منك
علي
هههههه انه اريدج تخافين العب بيج طوبه اليوم
غيرت ملابسي ولبست روب ابيض وفتحت شعري جان حيل طويل وبيه شگار مقبل علي اصبغه ولا اگصه ولا اهلي يقبلون لان جان كلش حلو بقيت على مكياجي تعشينا وسولفنا وضحكنا ولا تخلو من التحرش طبعا بعدها نمنا واستمتعنا كاي زوجين ثاني
.............
يوم الصبح سبحت وغيرت ملابسي وتمكيجت ولبست حجابي وطلعنا رحنا لبيت اهله استقبلونا بالهوسات والدبكات واهله وخالاته هناك وذبحوا ذبيحه من فتنا ورحت لغرفتي شفتها حلوه وكل شغلاتي مرتبه بيها كعدنا شوي بالغرفه اني وعلي وبعدها طلعنا يمهم تغدينا وسولفنا وتونسنا وياهم اهله حيل طيبين وحبابين توقعت المدينه اهلها متكبرين وشايفين نفسهم بس اهل علي كلش حبابين ونفسهم طيبه بعدها فتنا لغرفتنا بقت ايام العرس اسبوع ما اسوي شي خوات علي يجن ويساعدن امهم وزوجة اخوه لان متلحك لوحدها هي وعمتي واني بعدني عروس هيج جانوا يکولولي خطار هواي وناس تتباركلهم هوايه ومعروفين وعلي حيل طيب وحباب ونفسه حلوه كلشي يجيبلي من غير ما اگوله مو بس حبيته عشقته بس ورى الاسبوع
لحكايتي بقيه 💕💕
