هدية شيخ

البارت الثالث

كملنا شغلنا بليل ونضفنا ورحنا كل واحد بفراشه وانه بالي كله يم الرجال اوووف شگد حلو هنوب يشبه هيثم يوسف خلي اروح على كيف بدون محد يعرف واتسنط عليهم اشوفه بشنو يحجي فزيت من الفراش ورحت اتسحب مثل الحرامي على اطراف اصابعي طلعت للحوش وامشي عين عالديوان وعين عالبيت خاف احد يطلع ويشوفني جان اعثر تكرمون بنعال ابوي واطيح على وجهي بس همزين محد حس بيه بس احس الركبه مالت رجلي تفلشت عالصبابه گوه دأوصل للديوان ونفتح بابا الديوان 😲😲😲😲

بس شتردون حالي قطرة دم ما بقت بيه عبالك حلت عليه لعنه وتبسمرت بمكاني حتى شعر راسي وگف جان يطلع الزلمه من الديوان ضل واگف گبالي ويباوع عليه وانه اباوعله مصدومه من الموقف دقايق وحسيت على نفسي وطگيتها ركضه لفراشي وادگ على وجهي

عزه بعينج زهره كون ميته ولا هالموقف شيگول عني الرجال صخام يمه لو يسولف لابوي لو لخواني والله ذبحتي حلال استاهل بس لا ممعقوله شيگلهم شفت اختكم لا ميگلهم اوووف شسويت بحالي ما نمت للفجر ساعه اتخيله شلون يباوعلي واضحك وساعه اخوف روحي منا للفجر يلا نمت

ما حسيت اله علياء تگعدني

علياء

ولج زهره الساعه تسعه شجاج اليوم

گعدت گوه افتح عيوني واحس راسي يريد بنفجر اباوع الشمس طالعه وماكله نص الحوش گمت اسحب بروحي ورحت غسلت وعدلت شعري

زهره

صباح الخير يمه

امي

صباح النور شنو عروس خو ما عروس نايمه للضهاري

زهره

يمه ما ادري شلون راحت عليه نومه

امي

انه اکلج شلون يمه من ورى تبگگ عيونج عالمجلات رحمي روحج دگومي تريگي علمود تعجنين ورانا غدى

زهره

الخطار راحوا

امي

لا بعدهم يتغدون ويطلعون

بقيت اباوع من شباك المطبخ وتذكرت البارحه واحجي ويه روحي اكيد ما گاللهم لو سولفلهم چان هسه سحلوني سحل الحمدلله

امي

ولج تحركي ماكو وكت

رحت عجنت وخليت حطب بالتنور ومن بعيد شفته للرجال ديطلع من الحمام وگفت على جهه واباوعله شفته يباع عليه بالمرايه يم المغسله مالتنا واني همين اباوعله حسيت مهتملي او فد شي تحرك بداخلي جانت عيونه تسحر وشكله حيل عجبني التفت عليه وهو ديفوت للديوان وابتسم اني ختلت ورى الحايط بس مو ابتسامه رصاصه وفاتت لروحي اريد اسيطر على دگات گلبي مداگدر ياربي شجاني معقوله حبيته شنو هذا بلكت هو هم يحبني ويخطبني كملت شغلي وفتت للبيت ساعدتهم بس عيني عالديوان بلكت يطلع واشوفه بعدها تغدوا وكملنا شغلنا رحت لشباك المطبخ اتفرج عالديوان اول مره احب الديوان لهدرجه هههه شفتهم طلعوا وغسلوا وشفته للرجال الي ماخذ قلبي سلم على ابويه واخواني وشفته يباوع على البيت يمكن چان ينتضرني او يريد يشوفني بعدها طلع وراح اخذ گلبي وراح حيل ضجت من شفته طالع رجعت لغرفتي نمت واتأمل وجهه بالسگف يا ترى اشوفه مره ثانيه لو لا اليوم اگعد يم ابويه بليل بلكت يحجيلنا عنه شوي ونعرف شنو قصته نمت واني اسولف ويه روحي ما گعدت اله المغرب لگيت بسمه وعلياء گاعدات يسون. عشى

زهره

هلو حبايب شلونكم

بسمه

انتي ما تشبعين نوم شنو سالفتج

زهره

شسوي يا خيتي حضي ههههه ابوي اجه

علياء

اي گاعدين بالحوش هو وأمي

فرصه اروح يمهم بلكت اسمعهم يحجون على الرجال الي خطف گلبي

رحت سلمت عليهم وگعدت يمهم

لحكايتي بقيه 💕💕