هدية شيخ

البارت الخامس

البارت 5

من صاحلنا ابوي واجينا وگعدنا گباله گال

ابوي

شوفي بويه هذا الولد علي جاي طالب ايدج على سنة الله ورسوله وهو خوش ولد وحباب وشاغول بس بيه خلل واحد

امي

اي متزوج احنا شنو اتفقنا يا ابو حسن مو گتلك انه بنتي ما انطيها على شرج مره وحده اسمع كلامي

ابوي

ومنو كالج راح تنطيها على شرج انه اتفقت وياه گتله ما انطيك مره اله تطلگ مرتك واعتبرها هديه مني الك وهو ما قصر الرجال بعد شتردين

امي

حتى لو طلگ مرته انه ما اقبل شبيها بنتي عانس لو فاتها القطار وانت تنطيها هديه  ليش اشو الف واحد يتمناها واذا رجعها تالي من ياخذ زهره شلون

ابوي

انت مالج دخل انه انطيت حجايه للزلمه وگتله هديتك زهره  وشوكت ما طلگ مرته يجي ياخذ زهره وبعد اي نقاش ما اريد وما يرجعها لان هذا شرطنا واحنا ما گعدنا ويه جهال

امي

ميصير هيج انه همين ألي رأي بناتي كلهن انطيتهن على مرامك حتى زهره تهديها هديه ليش هذه مو خوش سالفه

ابوي

گتلج كافي بناتي وبكيفي اذا انطيها هديه راح يقدرها ويخليها على راسه ويحسبلي الف حساب

امي

هذا مو حجي انه ما گتلك اشرط عليهم گتلك زهره ما تنطي على شرج

ابوي

انطيت حجايه للرجال وما اكدر اسحبها شنو يابه تالي وكتنا تگودنا نسوانا هذا شلون حجي

خلانا ابوي وكام راح للديوان لان اجوه خطار

امي

ولج زهره ديري بالج تقبلين والله يمه انه اريد مصلحتج الشرج ما ينحمل يا يمه ولج يمه انتي صغيره ما تعرفين

زهره

يمه هو مو راح يطلك مرته بعد وين اكو شرج اذا كا طلك عود نحجي بعدين الراي الاول والاخير بيد ابوي

امي

ولج جنج راضيه عالسالفه باعيلي زهره خلي يكون بعلمج انه ما راضيه ولا راح ارضى فهمتي لو لا مو باجر تجين تتبجين وتگولين خلصوني انه گتلج ما يرهملج لان ابو مره ما ينوخذ يمه طعيني لا تخربين حياتج

زهره

يمه بكيف ابوي هو اليأمر والينهي انه شنو بيدي اسوي شوف قسمتي وين يمه

امي

ان شاءالله قسمتج مو أله

راحت امي وبقيت گاعده لوحدي ما اگدر ارفض انه احبه وهو لو ما يحبني مراح يطلگ مرته علمودي اذا طلگها بعد يبقى بس ألي وراح ادلله واهنيه واخليه ينساها بقيت بمكاني حسبه تجيبني وحسبه توديني واحتاريت بين گلبي وأمي گلت خلاص راح اخليها على ابوي هو اكيد يعرف مصلحتي ويريد خاطري  بس امي مراضيه وامي شنو تگوله صحيح اخاف تخرب حياتي لان مراضيه عليه والله حيره واني بين افكاري وشارده  اجتي علياء

علياء

ولج زهره والله سمعي كلام امي لان راح تتندمين لان امي عمرها محجت شي وماصار

زهره

لا مرات امي همين تغلط هي شمدريها شنو راح يصير يمكن راح انسعد وارتاح بس اتمناها ترضى علمود تكمل فرحتي

علياء

زهره عيدي تفكيرج وصدگيني امي رايها احسن من راي ابوي لان ابوي لان منطي كلمه للرجال زهره امي ادرى بمصلحتج صدگيني وانتي شنو عايزه علمود ابوي ينطيج هديه الف واحد يتمناج لس رفضي والله ابوي يقتنع من ترفضين

زهره

ما ادري والله خليها على  الله والبيه خير الله يقدمه ما ادري ارفض لو لا احتاج افكر

علياء

الحجي ضايع وياج وراح تدمرين عمرج

...........................

ضلت امي مصره على رايها وابويه يحاول يقنعها بس مقبلت واني ليليه احلم بعلي وليلة عرسنا وحياتنا وارتب كلشي بحياتي حتى اكون مستعده لكلشي بقينا هيج شهر كامل وماكو اخبار من علي بقت حياتنا طبيعيه بس اني بغير عالم معقوله ما يريدني معقوله بطل ما نتزوج لا ليلي ليل ولا نهاري نهار تعبت من التفكير والانتضار كل ضنتي هون وبعد ميجي ورجع لمرته وجهاله كل ضني راح انخطب لغيره وانساه بس شلون انساه لو اگدر جان نسيته هيج بقيت بين التفكير والقلق والخوف وامي الي ضنيتها بيوم تشمت بأبويه لان علي ما اجه ولا رجع خبر لحد ما فد يوم العصر جنا كاعدين بالهول مالتنا اجه خالد

خالد

بويه اجه علي ودخلته للديوان

ابوي

هااا خوش ماطول اجه سون جاي وانه هسه اروحله بس ابدل دشداشتي

علياء

يابه نسوي عشى همين

ابوي

اي بويه اكيد يبقى بعد انتم احسبن حسابجن

ما اگللكم شعوري فرح ولهفه وخوف واشتياق كلهن نجمعن بلحضه وحده اريد اختلي بنفسي اريد افرح اريد افكر ما اعرف شعور حلو وكتها بس امي تباوع عليه بنضراتها توسل لا تقبلين وبخاطرها تفرحلي وتخاف عليه رحت للمطبخ واباوع من شباك المطبخ وعيني عالديوان كون يطلع واشوفه معقوله رجعلي ويريدني وطللگ مرته لخاطري اي يحبني اكيد يحبني ميحتاجلها سؤال او روحه للقاضي ارتياح بنفسي وبداخلي وحسرات بارده تنعش بروحي ما همني رأي اي شخص المهم ارضي نفسي وذاتي اي انانيه بحبي أله وما همني اي شخص ثاني  اوووف شوكت يجي ابوي واسمع منه احلى خبر ابوي دخل للديوان وانه مثل الي ينتضر حلم والحلم بعيد يتحقق كلش دخل عقلي وگلبي وتمنيت اكون أله صار الليل وسوينا عشى وصبينا چاي وانه انتضر مثل المضيعه ما صدگ باب الديوان ينفتح عبالك ينفتح باب الجنه داغسل المواعين وعيني عالباب وشفت ابوي طلع وصل يمنا بالمطبخ وصاح عليه وانه گلبي فز وروحي تترقب مصيري مثل الي ينتضر نتيجة امتحانه تطلع. كله لهفه يريد شي يرتاح بيه بس ما اعرف اكو راحه لو لا 

لحكايتي بقيه💕💕
#هدية_شيخ

.................................................