البارت 22 والاخير
فد يوم كنا گاعدين واجه ابن علي يركض ويدفر بالباب لحد ما وصلت للباب روحي طلعتابن علي
خاله لحگينا ابوي سوى حادث خاله لحگي
ويبجي ويصرخ
زهره
عزى العزاني ان شاءالله شلون ومنين سياره وين الحادث احجيلي خلي افتهم
ابن علي
اخذ سيارة صديقه وراد يروح بيها لفاتحه اصدقائه وسوى حادث واخذوه للمستشفى هسه وما ادري عنه هسه راح اروح بس اجيت ابلغج
زهره
وهسه شلون حاله
ابن علي
والله ما ادري راح اروح وراهم للمستشفى
زهره
انتضرني اروح وياك
ابن علي
لالاا. امي هناك وتصير مشكله جبيره والله خاله احنا مناقصين
زهره
لعد شلون اطمئن عليه
ابن علي
انه اجي وابلغج
خلاني وطلع يركض واني بقيت مثل الطير المذبوح ما اعرف شسوي كل شوي اوصل للباب وارجع ما اعرف وين اروح مرت ساعتين وانه كلشي ما اعرف بعدين اتصلت بأم حيدر اخته
زهره
لحگي عليه يمعوده راح اموت بالي ويه علي
ام حيدر
لا تخافين كلها يمه بالمستشفى وننتضر الطبيب ديري بالج تجين
زهره
شلون ما اطمئن على زوجي مثل ما هي وياه انه هم اريد اصير وياه شلون اريد اعرف اخباره مو حاله هاي كلكم تخافون منها
ام حيدر
زهره ديري بالج تجين لان سلوى تشهرنا وتخزينا مو مسألة خوف بس هسه مو وكت مشاكل وياها هي صلفه وما تستحي وعلي مو مال مشاكل هسه انه اخابرج وانطيج الاخبار اول بأول
زهره
ماشي ولو راح اتعبج بس تحمليني
شوي يمعوده اريد اشوف أخبار رجلي فدوه لعينجام حيدر
شلون حجي هذا احنا اهل وانتي اخيتي ديري بالج على الجهال وانه اخابرج اذا اخبار جديده
..............🍁🍁🍁🍁🍁...........
بقيت كل ساعه ادگ عليها واطمئن عنه عرفت ان رجله مكسوره ورضوض بصدره وبأيده وما يگدر يمشي او يتحرك خطيه بس الحمدلله ماكو شي خطير يومين ما خابرته يوم ثالث هو دگ عليه وطمني عنه لان سلوى راحت للبيت ترتاح وبعدين ترجعله ما يگدر يخابر يمها لان لو سواها وخابر يمها تكسرله رجله الثانيه اكيد والله حاله
علي
شلونج حبيبتي شخبارج
زهره
بخير يروحي طمني عنك
علي
انه بخير زهره راح اطلع من المشفى لبيتي الثاني ورجلي مكسوره ما اگدر اجيكم احاول ادزلج مصرف بيد ابني لحد ما الله يفرجها واگوم على رجليه
زهره
اتحمل اكيد ترجعلنا بالسلامه ان شاءالله
اي اتحمل لازم اتحمل مضطره اتحمل ليش يا بويه ارخصت بيه وقدمتني على طبق من ذهب وكل حقوقي مسلوبه مني صحيح انه الي ردته وتمنيته بس انه جنت صغيره وما اعرف مصلحتي لو يرجع بيه الزمن مستحيل اخذ علي لو اخذ واحد على مرته مستحيل تعبت واني اتحمل شنو الي اسويه غير الصبر والحال صعبه وصرت عبئ عليه وهم ثگيل بقينا تقريبا اسبوعين مشايفين علي ويودينا مصرف كل يومين كلش بسيط لا يكفيني ولا يكفي جهاله نجبرت اتعلم عالخياط حتى اخيط واكفي طلبات جهالي وبيتي عندي اربعه وكلهم محتاجين اكل ولبس ومصرف وما الحگ على طلباتهم لازم اوفرلهم كلشي علمود لا يمدون ايديهم ويحتاجون للناس ورى اسبوعين اجه علي ورجعت حياتي الي بشوفته وبقى يوم عدنا ويوم عدهم والمصرف الي ينطي كلشي ميكفي حجيت وتعاركت وكل فتره اتعارك وياه واحاول اخذ حق من حقوقي وماكو فايده يگلي تحملي هذا حالي من وين اجيبلكم هذا الي اگدر عليه العوز والفقر يوجع تعبت من الحرمان والحسره على كلشي بقيت هذا حالي فتره طويله لحد ما خلص السلفه وشويه تنفسنا بس همين نضلمت الاولويه لسلوى وانه اخر الاهتمامات اذا شافه احد طالع وياي ويروح يگلها تگلب الدنيا على راسه بس هو ضل ما يهتملها مثل الاول وانه لان ما احجي لا اطلع وياه ولا امشي كفن للمشاكل دائما انه الاقل بكلشي حتى بمشاعره يداري مشاعرها ويهتملها اكثر مني واني لا ومتحمله كلشي وساكته ولا تگولولي شجابرج على عالمر لان ضروف وعيشت اهلي ما اتحملها وعندي اربع اولاد لحد اليوم هذا حالي وهذه حياتي اشوفه مرات يهتملي ويريد يرضيني ويحبني ويداريني ومرات اشوفه لا كله لسلوى وبالنسبه لعيالي يحبوني وملتقاهم وجمعتهم يمي وما يقبلون مرات على علي ويحجون وياه بس مؤيد لحد الان يكرهني تعودت على حياتي واحس احسن من الاول بهوايه حياتي مستقره حاليا بس من بعد اخذت الدنيا نص عمري
مؤيد اخو علي عزل بيت لوحده من كثر المشاكل والهوسه وسجاد تزوج واخذ مرته وياه وامه وطلعو بيت وحدهم بقى لبيت بس لسلوى وجهالها
يمكن جنت مجرد غلطه او حاله وتندم عليها او مجرد كابوس وما اعرف شوكت يصحى منه اطفالي بالمدرسه الحمدلله وتعودت على حياتي اهم شي ابوهم يمهم ويهتم بيهم صح الحاله تعبانه بس الحمدلله ارحم من غيرنا
حبيت ابينلكم قصة حياتي وحبيت انبهكم على شغله مو كل قصه عن الشيوخ والفصليه
تكون صحيحه الفصليه تعيش بمذله ومهمشه الحقوق وغصبن ما عليها
ترضى وتسكت بالرغم اني مو فصليه اني هدية شيخ وعانيت الامرين كل حقوقي مهدوره لا الي كلمه ولا خاطر اربع جهال عندي واهلي وضعهم على گدهم اخواني من اروح تصير عرايك من ورى الجهال واخر مره اخوي حجاها بوجهي گلي من تجين لا تجيبينهم ولا جني اختهم بوكتنا هذا محد يتحمل احد تحملت وسكتت وصبرت والحمدلله على كل حال
ودمتم سالمين 💕💕
احب اسمع ارائكم بالقصه