البارت 15
صعدت ويه الشيخ بلسياره
شيخ مضر
بويه زهره انتي فقيره ومو صاحبة مشاكل وماكو مره تاكل مره انتي العليج تگومين بواجب زوجج وتلبين طلباته ولا تهتمين لشريجتج
زهره
ان شاءالله عمي صار لا توصي
شيخ مضر
هسه بويه انه راح اوديج لبيت اخت علي ام حيدر تبقين يمهم كم يوم لحد ما يشوفلج مكان وتنتقلون بيه لان ما يصير تكعدن اثنينجن بيت واحد
زهره
ماشي عمي الي يعجبك انت شنو تفصل احنا نلبس
شيخ مضر
عفيه عليج بنيتي ونعم من تربيتج
بس كفن للمشاكل وهمين ما تتراهمن سوى وادري بيج انتي بنت اجاويد
زهره
تأمرني عمي مراح تسمع اله الخير
مشت بينا السياره للمجهول مشت واني بغير عالم عفت روحي وعقلي وطفولتي بيت اهلي كبرت قبل اواني لازم افكر وادقق واحسب حساب كلشي شلون راح يكون لقائي بيه عگب سنه ونص فراگ شنو راح يكون شعوري وشعوره من تلتقي عيونا من يشوف ابنه شنو راح يكون شعوره وردة فعله الف حسبه وسؤال ابالي يا ترى باقي الحب الي بينا لو لا تبخر ويه الايام لو مثل ما گالو البعيد عن العين بعيد عن الگلب الطريق طويل وافكاري ابعد واطول من الطريق ما حسيت اله السياره وگفت وصاح عليه الشيخ
شيخ مضر
يلا بويه نزلي وصلنا
............🍁🍁🍁🍁..................
نزلت بخطوات ثگيله ودگات گلبي اقوى من دگت بابهم عيوني عالباب منو راح يفتح علي يفتح الباب لو منو عيني شابحه عالباب وگلبي يدگ مثل الطبل اهدئ يا گلب كافي
كبر بيه الوجع من يوم الفراگ
خضر شيب بيه وحنب وشاب
وعلى رف الظلع ظل گلبي مركون
ومن يذكر عشرتك ينبض تراب
كل دكه اعلى بابي تردني ليوين
تاخذني لوكت دكتك على الباب
هنيالك بعد ماشايف هموم
ولاضايك طعم لجمات الاحباب
وانه هموم العلي مثل العصافير
بس اذكر ضحكتك طارن اسراب
(منقول)
انفتح الباب اي انفتح هذا مو علي هذه براء بنت ام حيدر فتحته الشيخ واگف واني وراه شافتني وضحكت سلمت عليه وبوستني وشالت مني حمودي دخلنا لديوان مالتهم وشفت علي گاعد من شافني گام على حيله وعيونه تضحك عين عالشيخ وعين عليه باوعلي
علي
هلا بيك شيخنا ميت هلا تفضل تفضل شلونج ام محمد
زهره
هلا ومرحبا
اباوعله وانزل عيني گلت خلي اثگل عليه علمود لا يكول ما صدگت ترجع جابوله حمودي وخلوه بحضنه حضنه ويبوس بيه حبيبي وهو مستغرب ميريد احد اخذته وخليته بحضني
شيخ مضر
بعد هاي مريتك رجعناها وگرت عينك بشوفت ابنك بعد ما اوصيك عليهم هذول امانه عندك ولا تضلمها ترى تحملت هوايه منك بعد كافي لازم ترتاح
علي
ابطن عيني هذول عيالي لا توصيني عليهم وان شاءالله راح اعوضهم
بقوا يسولفون ويحجون ويسولف الشيخ شلون رجعني وشنو حجه ويه ابوي انه عفتهم ورحت جوه يم البنات ام حيدر ارمله وعدها اطفال بنات اربعه واولاد اثنين عدهم اسواق يعيشون منها بناتها هم الكبار واولادها بعدهم صغار مخليه عامل بالاسواق مالتهم ويوميه تروح تشرف عالشغل بيتهم بيه اربع غرف نوم وهول كبير وديوان وحمامات اثنين بناء قديم بس مرتب ونضيف
رحت يمها بالمطبخ
ام حيدر
يا حيالله من جانا واخيرا شفناج
زهره
الله يحيج مشكوره حبيبتي
ام حيدر
خطيه علي ممصدگ شايفكم دوم يفكر بيكم وباله وياكم ربي لا يفرقكم
زهره
آمين اكلج ام حيدر وزوجته
ام حيدر
معوده هي بحالها وانتي بحالج هي هناك بيت اهلي وانتي راح تگعدين عدنا شهر شهرين وبعدها تشوفولكم بيت وتنتقلون
زهره
الله كريم شوف شلون تصفى
ام حيدر صاحت على ابنها ياخذني لغرفتي ارتاح ورحت
لگيت بالغرفه سرير ابو نفرين وكنتور بابين وكبت صغير وفراش على الارض وزاويه گعدت على السرير واتفرج رضعت حمودي وغيرت ملابسه ونومته تمددت على عالسرير وسمعت دگات عالباب فزيت من مكاني
لحكايتي بقيه 💕💕
