البارت 14
لحد ما فد يوم من الايام اجانا شيخ عشيرتنا اجه خالد
خالد
يابه اجه شيخ مضر ويريدك بالديوان
ابويه
شيخ مضر اجانا شعجب بويه شنو صاير
خالد
والله ما ادري يا بويه ينتضرك
ابوي
گومن سون جاي وخلي يجيبه خالد انه رايح اشوف الشيخ يمكن عنده طلابه
راح ابوي وكمنا حضرنا الجاي والغدى لازم غدى زين لان الشيخ اول مره يفوت بيتنا وهو شيخ عشيرتنا العام ابوي نخبص بيه لان حيل يعزه ويحب خاطره وحجايته ماشيه عالكل الجبير والصغير ضلينا ننتضر وقلقين نريد نعرف الشيخ شيريد واحد يسأل الثاني وفعلا ما طلع الشيخ اله قريب المغرب اجه ابوي شكله ما يتفسر عيونه صايره بگصته من العصبيه ويحجي بنتر وصياح
ابوي
بويه زهره حضري روحج باجر يجي الشيخ ياخذج ويوديج لرجلج
اني بقيت ساكته ومتفاجئه
امي
يااا عزه ليش ابو حسن شصاير ليش تروح زهره شنو الغيرك
ابوي
هذا علي رايح للشيخ وحاجي وياه واجاني الشيخ وگالي لازم تخليلي خاطر واعتبار وانه گتله انه ارجعها الك وابو حسن ما يردني اضطريت اسكت حاولت افهمه واگله صعبه بس هو مصمم ياخذ زهره وگتله الي تريده يجرالك وجيتك على عيني وراسي ولازم زهره ترجع باجر
امي
هذا مو حل هيج ترجع بارده مبرده لا شروط ولا شي شلون حجي هذا شلون قبلت
ابوي
اكلج انتي ليش ما تستلمين الشيخه بمكاني والله موتيني كلشي ما يعجبج حجايه ما اريد اسمع انه بروحي دمي فاير لا تخليني اطلع حرگت گلبي بيج
امي
هسه احنا شحجينا خلاص زهره حضري نفسج
..................🍁🍁🍁🍁............
خله وطلع ابوي امي گامت تحجي وتسب بعلي وتغلط وانه ساكته ما اعرف شنو احجي اباوع عليها ودموعي تصب شنو ضامتلي هالدنيا اوووف عافتني وطلعت وهي تدردم وتسولف ويه روحها بقيت على گعدتي بين الفرح والحيره بقيت اصفن واسولف ويه نفسي شلون راح تصير حياتي شلون راح اعيش ويه مرته وين راح اسكن وشلون راح اتصرف شنو الي صار مو هذه جانت امنيتي شنو الي تغير. ليش خايفه اي خايفه شلون راح اتعامل وياه اووف شنو ضامتلي هالدنيا وشنو اشوف بعد ما اتذكر نمت بهذيج الليله حضرت ملابسي وملابس حمودي ورتبت شغلاتي شنو اخذ وياي وانه ملابسي قديمه صارت وما لحگت اخيط شي هسه لو منطيني فد مهله اسبوع اجهز نفسي عبالك عروس جديده اجتي بسمه يمي
بسمه
هاا زهره واخيرا راح ترجعين والله فرحتلج
زهره
مشكوره بسومه بس تدرين خايفه
بسمه
لا تخافين معوده اهم شي انتي بيت رجلج وهو مسؤل عنج وعن ابنج معوده خلي ابنج عايش ويه ابوه وياج احسن هيج
زهره
بس ما مامتوقعه ارجع بهالسرعه ممجهزه نفسي
بسمه
لج يا سرعه صارلج فوگ السنه يااا صدك بس اوکفي خلي اجيبلي خيط وملقط خلي احفلج وجهج ميصير هيج ترحين واجيبلج شغلات تدبرين بيها نفسج
زهره
لا معوده استحي من ابوي واخواني هسه يگولون ما صدگت
بسمه
اووو معليج باحد انتي عندج شريجه لازم تصيرين حلوه وذكيه حتى تكسبين زوجج
راحت بسمه جابتلي قميص نوم زهري وشكاله وباودر مستعمل وكحل وقلمين حمره واحد سحري واحد احمر وحفتلي وجهي حسيت عبالك داعرس من جديد بس عروس مكسوره والف غصه بداخلي اي زهره مو هذا علي الي حبيتيه وعشقتي كلشي بيه تحملي واصبري اهم شي راح تكونين يمه تحملي اي شي يصير اذا تحبينه ولا تفكرين تجين لاهلج زعلانه لان اكيد ابوي يطلگني اذا اجيت لالا راح اتحمل كلشي واسكت
المهم ثاني يوم الصبح كعدت لكيت امي وابوي ديتريگون اجيت گعدت يمهم
ابوي
بويه ما اوصيج بعد اذا تردين رجلج تتحملين وتصبرين واذا شفتي شي ما عجبج بيت ابوج مفتوح مثل ما تحملج انتي وصغيره يتحملج انتي وجبيره
زهره
الله يطول عمرك بويه ولا يحرمني منك
امي
بعد انتي شوفي الوضع ومرته مالج غرض بيها شما تسمعين عوفيها ولا تحاجينها لان راح تدور وياج مشاكل
زهره
لا يمه خلي اشوف الوضع وبعدين الله يحلها
ابوي
بويه حضري روحج اخاف يجي الشيخ ياخذج گال بالعشره امر عليكم ويريد يسوي لعلي مفاجئه لان ما يدري انتي راح ترجعين وياه
زهره
ماشي يابه راح احضر نفسي
رحت سبحت وتعطرت وبدلت ولميت غراضي الباقيه وبقيت انتضر الشيخ بالعشره ونص اجانا ودعت اهلي وحضنت امي وبستها وطلبت رضاها وتشكرت من ابوي وعلى الي سواه وياي ويه ابني واخذت غراضي وصعدت بسيارة الشيخ ومشينا رحنا لعيالي مشت روحي وگلبي قبل ممشاي ودي اطير واروح اشوف عيونه لا تلوموني وتحجون احبه واحنا النسوان وحده تعرف الخ نعرف الحب شلون يذل المره گلت اتحمل لخاطر علي وابني حتى يعيش بحضن ابوه وما ينحرم منه وغصبن عنه يتكفل بيه اي جايتك يا علي ومشتاقتلك بگد رحمة الله
لحكايتي بقيه 💕💕
تشجيعكم بالتعليقات والتصويت
