هدية شيخ

البارت 17

تصوويت وتعليق حبايب

جنا نتريك اني وام حيدر محسينا اله الباب ينضرب بقوه وصياح راحت ام حيدر ورجعتلي تركض

ام حيدر

ولج زهره فوتي لغرفتج واخذي ابنج وسدي الباب هاي سلوى مرة علي جايه هاده عليج

زهره

يمه عزه ان شاءالله شكو شبيها  شنو هاي صدگ متستحي

ام حيدر

دفوتي يا عيني مو وكته هالحجي هاي شراينيه الله يستر والله اذا لزمتج كل قطعه بمحافضه اطشرج

رحت لغرفتي وقفلت الباب ووگفت ورى الباب اتسمع الكلام هي فتحتلها ام حيدر الباب وهي فاتت مثل الوحش الكاسر اول مره بحياتي اشوف هيج مره

سلوى

اطلعي ساقطه هيج منج ومن اهلج اليوم شيخلصج مني الوصخه الحثاله جايه عالحاضر تاخذينه مني ومن جهالي

ام حيدر

سلوى عيب هالحجي مو وكته شهرتينا الجيران يمعوده

سلوى

وانتي هذا الهامج الجيران انتي وحده حقيره شلون تستقبلينها بيتج هذه وحده ........و.......

ام حيدر

احترمي نفسج لج انتي صدگ ما عندج تربيه امشي طلعي من بيتي ما اريدج هنا

سلوى

وهسه بيتج القصر الجمهوري دطلعيها هاي القذره منا لا ابتلي بيكم اليوم

ام حيدر

ولج سلوى قصري الشر وروحي ترى مالنا خلگ المشاكل

سلوى

ههههه مشاكل ليش هو انتي شفتي شي بعدكم ما شفتوا والله اله اخلي المايشتري يتفرج عليكم طلعيها هالبنت الكلب لا ابتلي بيكم

...........🍁🍁🍁🍁.................

وهدت عالباب تفلش بيه وانه ادفع بالباب كل قوتي مو مره حشى بايعه ومخلصه لا اخلاق لا مستحى لا شخصيه مو بشر

المهم

ضل الصياح والغلط والعركه حدود الساعه بعدين بالگوه والف يالله يلا طلعت وراحت وكل شوي تتهجم عالغرفه وتدفر الباب تريد تضربني تردون الصدگ خفت منها اني مو من النوع العراكه او لساني طويل ولا اعرف ادافع عن نفسي بقيت بغرفتي ساكته وابجي عمري منحطيت بهيج موقف هدء البيت شوي وصار كلشي عادي ام حيدر ودت على علي ودت ابنها للشغل ورى نص ساعه اجانا علي

علي

هاا خويه شصاير موديه عليه

ام حيدر

شگلك يا خوي هاي مرتك اليوم لعبت بينا طوبه وتهجمت علينا وشهرتنا بالمنطقه ورادت تضرب زهره ياخوي وحش مو مره الله يعينك عالجاي والله التمت علينا العالم ولا استحت ولا حشمت احد شوف انت شلون تتصرف

علي

منو گالها زهره هنا اني ليش محجيت لان ادري بيها مو صاحيه وراح تتهجم عليها وتأذيها خو ما ضربت زهره لو حمودي

ام حيدر

حقك والله لا خويه ما خليناها قفلت الباب  هسه شنو راح تسوي

علي

اروح للبيت واشوف شسالفه

عافنا وطلع علي طلع وهو نار عصبي وضايج ومحتار بقينا احنا نفكر بيه وشنو راح يسوي بقينا احنا ننتضر علي ماكو صارالليل علي ماكو لا اجه ولا منه خبر رحت غرفتي نومت ابني ونمت وافكر يا ترى شنو الي صار ليش علي ما اجه بقينا يومين علي ما اجه ولا شافنا ولا سئل ياربي دخيلك شنو صاير اريد اعرف شصار وليش ما يجي شنو السالفه

ام حيدر

يعني هو غير يجي يفهمنا ليش يخلينا هيج محتارين

زهره

والله ما ادري يا ام حيدر هسه حتى ما سئل علينا اني وابنه

ام حيدر

معوده الغايب عذره وياه اكيد اكو شي اقوى منه بس هسه نريد نعرف اخباره

زهره

والله ما ادري عسى المانع خير

ام حيدر

والله يا زهره هي هاي سلوى وسوالفها عمرها ما ريحت علي تدور المشاكل دواره ولا تهتم لاحد  ولا تحترم حتى امي

زهره

لا تزعلين يا ام حيدر هسه انت طلگتها ليش رجعتها مو جنت مرتاح

ام حيدر

خاف على جهاله عباله راح يموتون من غير امهم هم ياريت ام بيها خير حتى جهالها ما سلمت منها الله كريم شوف شلون تصفى

بقينا هيج بحيره من امرنا ووحده تسأل الخ شنو الي صار ليش هيج لا اجى ولا فهمنا

يوم ثالث چنا كاعد نتغدى

لحكايتي بقيه 💕💕