هدية شيخ

البارت 11

البارت 11

اوووف شلون راح اواجه المشكله واهلي شنو راح يكون موقفهم وهذا الي ابطني شنو مصيره تعبت ياربي علي يا حب عمري هيج تخذلني اي صوجي اني اختياري جان غلط من الاول المفروض اطيع امي وارفض بس اخذتني العاطفه والوعود الجذابه اباوع من الجامه والله احس مداشوف شي عيوني عمت من البجي وگلبي صار نار تمنيت اموت ولا صاير بيه هالوضع اووف يا قهري ما اتحمل وحده تشاركني بيه هذا حبيبي وفتحت عيني عليه ما عندي غيره مو سهله وحده تشاركني بيه لا جربت حب ولا زواج اله وياه تمنيت باقين على عيشتنا وما ادري بسالفه مؤيد دمرني وفوگ هذا كله حجه الحجايه وختل بالغرفه لا شافني ولا سأل بس مجرد يخلق مشاكل  وصلت المغرب لبيت اهلي لان الطريق بين اهلي وعيالي طويل ودعت سجاد وگتله

زهره

روح سجاد  اني اواجه اهلي وانت ارجع ودير بالك على عمتي خطيه

سجاد

لا زهره ادخل وياج احجيلهم موقفنا

زهره

لا سجاد اني احجيلهم توكل على الله اخاف ينفعلون ويسمعونك حجايه وانت مالك ذنب 

سجاد

براحتج زهره  يلا مع السلامه وديري بالج على روحج واحنا مراح نعوفج انتي بتنا وابنا عندج

زهره

الله وياك

.....................🍁🍁🍁🍁.........

نزلت جنطتي ودگيت الباب فتحه ابن اخوي يركض اجت عمه زهره اجوي كلهم يركضون عليه باوعت لامي وبجيت مهما الانسان يكبر او يمر بضروف صعبه بحياته اول شخص يفكر بيه هو امه حتى وان كانت الام مو حنينه او قاسيه تبقى كلمة امي الملاذ الامن لكل شخص لان مستحيل الانسان يلگه شخص يحن عليه ويخاف مثل الامه هذا الشي من رب العالمين اول مشفتها حضنتها وبجيت

امي

شبيج يمه شصاير علي بي شي

زهره

لا يمه انه النار بيه مو علي

امي

ليش يمه شبيج خوفتيني شصاير يا يمه

ابوي

انطيها مجال خلي تدخل جوه وترتاح ونفتهم

دخلنا جوه وگعدنا

ابوي

سولفي بويه شخيرج منو دايسلج على طرف احجيلنا

سولفتلهم كلشي حتى الحجي الي صار

امي باوعت لابوي بعتب  وقهر

امي

هاا يا ابو حسن حلها ألنا

ابوي

انتي ما تصدگين تشمتين هسه هالحجي وكته

امي

عزه بعيني ان شاءالله انه اتشمت بنتي انه اريدلها حل

ابوي

خلاص زهره بعد ما ترجع وابنها الها وابوه لو يموت ما يشوف ضفره

امي

هذا شلون حجي مو حل هذا خلي يطلكها وننطيه ابنه

ابوي

لا ما ننطيه ولا يحلم يشوف منه شي والي يگدر عليه يسويه انه اعلمه الزلم شلون تحجي وانتي بويه هذا بيت ابوج وانتي معززه ومكرمه وابنج ابنا وراح نسجله بأسمنا بس اريد اشوف علي افندي شيسوي اله اعلمه النسوان شنو تجيب   والله اخليه يمشي ويحاجي روحه رجال ما عنده كلمه ماله مره يمنا يلا بويه گومي ارتاحي

زهره

اي بويه بكيفك سوي الي يريحك من رخصتكم اروح ارتاح

كمت دخلت غرفتي تمددت عالسرير وعيوني بالسگف اووف شنو ضامتلي هالدنيا وشنو راح تشوفيني بعد ليش علي هسه ارتاحيت من دمرتني شگول عليك وهذا ابني الجاي شراح يكون مصيره هو ميهمه عنده غيره ومداريهم بس اني هذا ابني الوحيد لو ما متزوجه احسن عشت ويه علي بس اربع اشهر وكلشي انتهى بعدها اربع اشهر بس هي هاي وخلصت عشرتنا دخلت امي بيدها صينيه

امي

هاج يمه اكليلج لگمه ما يصير تنامين جوعانه مو زين انتي حامل

زهره

ماكله الهم يمه ماكله الهم

امي

لا يمه اسم الله عليج لا تنقهرين مو زين عليج كلشي اله حل ونامي وانتي مرتاحه ربج بغمضة عين يحلها

زهره

ان شاءالله يمه تنحل

گعدت اكلت شوي ونمت من تعبي وقهري

...................

بقيت بيت اهلي وضلوا يحجون ويعيدون بالموضوع وشنو راح يسوون ويدبرون واني بس اسمع لا اكدر احجي ولا ارد ولا حتى ادافع عنه لو عن نفسي شدافع اذا هو غلطان

امي

زهره يمه كلشي اله حل اهم شي صحتج اكلي زين يمه

زهره

يمه ليش ما سمعت كلامج من رفضتي والله متندمه صار بيه هيج لان انتي مراضيه

امي

لا يمه هي قسمتج هاي لا تضوجين ما گتيلي بشنو تنسيتي مشتهيه شي يمه

زهره.

اي يمه اشتهيت رمان بلكت احد من الولد يجيبولي

امي

مو تدلللين هسه اوصيلج على رمان

المهم بقيت هيج بيت اهلي ورى اربع ايام .......

لحكايتي بقيه 💕💕 لا تنسون التعليقات فديتكم