رحت سلمت على امي وابوي گعدت يمهم ودار هالحوار بينهم
ابوي
اي والله يا أم حسن شلون أدمي هالعلي ونعم منه ومن اصله
امي
اول مره يعجبك هيج واحد مو من عوايدك ناسنا هوايه شمعنا هذا عاجبك
ابوي
اي مو انسان زين ويدخل الگلب بس ما عنده حظ بهالدنيا مشلوع گلبه المسكين
امي
يا شبيه لعد شنو قصته شصاير وياه المسكين
ابوي
متزوج بنيه جارتهم ومريضه وكلش مو زينه ويه اهله بيها حاله نفسيه مدري شبيها وعنده اثنين اولاد وبنيه والنهار كله تتعارك وياه ومراويته الويل الله يعينه
امي
لعد هو شمصبره عليها جان طلگها هو عمر واحد يخلصه بالنكد
ابوي
ما يگدر لان جهاله يتبهذلون واهلها مو خوش اوادم ويخاف عالجهال يضيعون
امي
مسكين والله ربي يصبره ان شاءالله ميخالف يحتسبه اجر وثواب لخاطر جهاله
اباوعلهم واحجي بيني وبين نفسي يااا هذا طلع متزوج وعنده جهال شلون حظ عليه ياربي ماكو يوم ارتاحيت هسه لو ما متزوج ويجي يخطبني شگد حلو بس حظ ماكو الحمدلله والشكر گعدنا وسولفنا وتعشينا وبعدها كلمن راح بحاله واني هالسالفه ما راحت من بالي صدگ انقهرت وضاعت احلامي مع الاسف مرت الايام مثل باقيها ماكو شي جديد مجرد شغل وكراب واكل ونوم لحد ما فد يوم من الايام چنا كاعدين العصر واجانا خالد صاح طريق يا نسوان عدنا ضيوف دخلنا كلنا جوه نركض رحت اباوع من شباك المطبخ شفته علي الي ماخذ عقلي باوعتله وجريت حسره بحزن لان عرفت بيه متزوج گعدت گلت خلاص ماكو فايده اجانا خالد
خالد
زهره سويلنا جاي بسرعه وحضرن عشاجن من وكت عدنا ضيوف
امي
يااا دركض روح جيبلنا دجاج وطماطه وخضره بسرعه يمه
خالد
ان شاءالله يمه بس انطيني الجاي وبعدين اروح
وفعلا سوينا جاي وتسوگنا وطبخنا عشى وجانت عدنا فره وتعب لحد ما صار الليل وابوي صاح على امي ورحت وراهم گالي رجعي بويه اريد امج بسالفه انه بصراحه صار عندي فضول اعرف شنو السالفه ما ادري ليش حسيت الموضوع خاص بعلي تسنطت على ابوي وامي سمعت هالكلام
ابوي
والله ما ادري يا هيله هذا جاي ويريد من عدنا مره
امي
شلون يريد مره وهو متزوج شبيه هذا
ابوي
انه هم گتله مترهم يگلي انتم شنو تردون انه اسويلكم حتى لو بيت لوحدها والي تريده يجرالك وتدري بيه ما مرتاح ويه مرتي وسولفلتلك شلون مريضه ومن هالحجي
امي
والله بنتي ما انطيها على مره شعايزها جمال وادب واخلاق شنو زايده عدنا خو مزايده
ابوي
انه هسه احلها واشوفلي حل يرضينا كلنا
امي
اي معود حلها
رجعت لغرفتي وانه صافنه معقوله رايدني ومعجب بيه مثل ما انه معجبه بيه يمه يمكن طلع يحبني اي لو ما يحبني ما خطبني هيج ويصير من نصيبي اله اخليه اسعد انسان بالدنيا بس مرته وجهاله شلون اووف الله كريم هسه بس خلي اتزوجه ما ادري شلون خلصت الليل بين الاشتياق والحب والفرح خلطت عليه المشاعر زين من اتزوجه شلون اتصرف وياه ويه مرته انه من هسه اغار شلون ترهم ما ادري طلع عليه الصبح واني منايمه التهينا بالغدى والخبز والشغل ورى الضهر تغدوا الخطار وياهم علي وشربوا چاي بعدها طلع علي ودع ابويه واخواني وراح واني عيني عليهم من الشباك كل ساعه اسرقلي نضره اجه ابويه وگال اريد اناملي شويه نام شويه بس انه مثل النار اريد اعرف الاخبار شنو قرر ابوي وشنو جان الحل ووافق لو لا ضليت بحيره كل دقيقه اطل عليه اشوفه گاعد لو لا تمنيت اكعده بس گلت خاف يسحلني خليني انتضره لحد ما صار الوقت قبل المغرب يلا گعد ابوي شويه صاح عليه وعلى امي
ابوي
زهره بويه تعاي هنا عندي حجايه وياج وصيحي امج وياج وگولي لعلياء تسويلي جاي لان راسي يوجعني
زهره
صار بويه
رحت صحت لامي واجيت گعدنا يمه
لحكايتي بقيه 💕💕
