عاونو الشيفور حتى ركب و مشا بيه لأقرب مستشفى ، وصلو هبط دغيا ، كيزرب شويا فخطواتو ، دخل و مشا لريسيبسيون ..
الجد : الله يخليك كوثر الشافعي كاينة هناا ..
موضفة الاستقبال : (بدات تشوف فپيسي ) ملقيتهاش فلي كورضوني ديال لپيسي (بدات تقلب فالأوراق ) ايااه ها هيا عندنا هنا و عاد شوية باش جابوها ..
الجد : و وفين هيا دابا ..
الموضفة : داوها لغرفة العمليات (عيطت لواحد لفرملي ) كرييم عفاك دي السي الشافعي لغرفة العمليات بلوك c ... ها هو ألسي الشافعي غايوصلك حتى لعندها ..
الجد : واخا شكرا أبنتي ..
شد فيه هداك الفرملي و بقا غادي معاه حتى وصلو للكولوار اللي غيوصلهم للبلوك و هوما يبانولو فهد و خديجة ، غير شافو فهد جا يجري عندو ، أما خديجة فكانت حاطة راسها بين يديها ..
فهد : الحااج خليتك عيان علاش جيتي ...
الجد : (طلق من داك لفرملي ، و عطى صقلة لفهد دايزها لكلام )
هادي هي تربيتي فيك أ فهد آه ، هادي هي تربيتي فيك ، و زعما بغيت نأمنك على العائلة يا حصرى ..لفرملي نساحب ، أما فهد فسكت حيث عارف ان داك التصرف ماكانش خاصو يوقع حدا جدو ، ولكن الغالب الله اول مرة ميقدرش يضبط راسو ، هدرتها خرجاتو على طوعو ..
بغا يشد يد جدو و هو يحايدهالو ، ديك قلة الاحترام مغيدوزهالهمش بالساهل...
مشا الجد كيتمشا حتى وصل عند خديجة و وهو يجلس حداها و بدا يطبطب على ضهرها..الجد : اشنو قالوليكوم ..
خديجة : مزال أعمي ، مزال معندنا عليها حتى خبار من لي دخلوها حتى حد ما عاود خرج هئ هئ هئ ..
الجد : يكون خير أبنتي و إنشاءالله مغيوقعليها والو بنتي كوثر قوياا..
خديجة : إنشاء الله أعمي إنشاء الله
فهد غير دارلو جدو هاكك مشا رجع للقصر ، اما هما بقاو كيتسناو شي 10 دقايق عاد خرج الطبيب ، ناضو عندو و الحاج معكز على خديجة ..
الجد : كيف بقات حفيدتي أدكتوور ..
خديجة : موقعليها والو ، بنتي مزيانة ياك أسي الطبيب ...
الطبيب : غير تهدنو هي دابا مزيانة الحمدلله ، غير خيطنالها لجرح و فقدت الوعي على إثر الصدمة ، نزفات بزاف و اضطرينا نعوضوليها الدم اللي ضاع منها ، لحسن الحظ كان هنا السي فهد و هو اللي تبرعلها بالدم حيث عندهم نفس الفصيلة O- ، لوكان ماشي هو كنا غنستغرقو وقت أطول و يقدرو يوقعو للمريضة مضاعفات لا قدر الله ، حيث ديك الفصيلة ناذرة و ميقدرو يتلقاو الدم غير من الأشخاص اللي عندهوم نفس لفصيلة..
YOU ARE READING
القرار العائلي
Romanceقصة بالدارجة المغربية ، كتحكي على قرار خداه جد لعائلة ، قرار عائلي لا رجعة فيه غيفرض على البطلين يتزوجو زواج تقليدي ، اللي غايتبزز عليهوم بزوج حيث كانو مكيحملوش بعضياتهم ، و هذا اللي غيولد موجة ديال الكره و الحقد بيناتهم و لكن مع تزامن الأحداث و م...