أما كوثر فدخلت لداخل مع ليلى لقات سويت موجد لإستقبالها ، وجدو كلشي حتى من لكوافورة و لميك اپ ارتيست و المساعدات النگافات و لخياطة حتى هي ، ناضت عندها المكلفة اللي جابتهم كانت مرة شوية كبيرة و لكن زوينة و مهلية فرأسها ...
المكلفة : سلام أنا هي المكلفة بهاد لبنات ، (شيرات بيدها و هوما يقربو عندها 6 ديال لبنات ) هادي اللي غتكلف بماساجك و حمامك و الماصكات و كل ما يخص جسمك من A حتى ل Z.. و هادي غتكلفلك بلا سير و لمانيكير و لپيديكير .. و هادي غتكلف بشعرك ... و هادي غتكلفلك بالميك أپ ... و هادي هي كبيرت النگافات ... أما هادي فهي الخياطة جابتلك الطوپ فاللباسي ... أما الآنسة ليلى فغيهتمو بها لبنات لاخرين تفضلو معايا ...
كوثر : واخا شكرا متشرفة بيكم ، تقدرو تبداو بليلى انا بغيت نرتاح شوية ...
المكلفة : اه ما كاين مشكيل ألالة كوثر ، و لكن لوقت ماشي فصالحنا حيث قالولنا لعرس غيكون فلعشية و ماشي فالليل ، ها هي باهية غتدخل تديرلك ماساج و حتى تحسي براسك رتاحيتي عاد ندوزو للشي لاخور ...
كوثر ابتاسمتلها بالزز حابسة لبكية : اححم واخا حتى هذا نضر دقيقة و انا معاكم .. (ضارت عند ليلى و همستلها ) اويلي على فگايعي عرسي و معارفاش حتى ايمتا غيتدار ..
ليلى (شدتلها فيدها ) : غير تهدني اكوثر و صبري ، عارفاهم زربو عليك ، كان على الأقل يعلموك قبل واخا غير ب2 سوايع لموهيم تكون فراسك ..
كوثر (تنهدت ) : صبري تقادى ، هانتي كاتشوفي أنا وليت بحال اللعبة بين يديهم كيحركو فيا كيف بغاو ، ولكن كلشي يهون على قبل صحة جدي ..
ليلى : (غمزتها )نساي عليا هادشي و سيري مع لبنت ، ياك كيعجبك تهتمي براسك و شحال ما مشيتي لشي صونطر دو بوطي ، ها هي الفرصة جات حتى لعندك ..
كوثر (حاولات تخفي حزنها ورا ابتسامتها لمزيفة ) ههههـ عندك لحق ، هي اللولة أمپوسيبل نفلت هاد الفرصة .. (ضارت عند المكلفة ) يمكلينا نبداو انا واجدة ..
المكلفة : واخا ها هي باهية هي اللي غتكلف بيك دابا ...
باهية : تفضلي معايا ألالة للغرفة ..
تمشات باهية و تبعتها كوثر دخلو لواحد لغرفة ، فيها اضاءة خافتة و ضوء أحمر كيتوسطها سرير د لماساج فلوسط و لمعدات دلماساج ، كوثر بدات كتحايد حوايجها و تغطات غير بفوطة و نعست فالسرير على كرشها عاد حايدات لفوطة و بدات باهية تديرلها لماساج و تدهنلها ضهرها بمادة لزجة سخونة ، حتى سترخااات و بدا يجيها النعاس ، و باهية مكملة شغلها كتماصيلها بطريقة احترافية ...
أنت تقرأ
القرار العائلي
العاطفيةقصة بالدارجة المغربية ، كتحكي على قرار خداه جد لعائلة ، قرار عائلي لا رجعة فيه غيفرض على البطلين يتزوجو زواج تقليدي ، اللي غايتبزز عليهوم بزوج حيث كانو مكيحملوش بعضياتهم ، و هذا اللي غيولد موجة ديال الكره و الحقد بيناتهم و لكن مع تزامن الأحداث و م...
