القرار العائلي

-9-

خرجو للجردة ديال لمستشفى و هو يدور عندهم أحمد عاقد حواجبو ..

أحمد : كنضن راكم عارفين علاش بغيت نهضر معاكوم ، نتوما غتقبلو بقرار الواليد مباغيش نخسر لواليد بسباب حاجة بحال هادي راكم شفتو بعينيكم آش وقعلو ليوم ، و بحال داك التصرف ما نبغيهش يتعاود حيث صحة لواليد أهم ،  نبغيكم المرة الجاية تنتابهو لهضرتكم و تخممو ميات تخميمة ، صحتو غادية فتدهور و راكم كاملين سمعتو هضرة الطبيب،  ما بغيتش توقعلو شي حاجة بسبابكوم ..

خالد : خويا أحمد عندو لحق ، و اصلا مغاتلقاوش حسن من بعضياتكم ، مافهمتش علاش معاندين و ماباغيينش تقبلو.. اووف شوفو أولادي عارف هاد القرار صعيب فحقكوم ولكن دابا راه خاصكوم تفكرو بعقلكوم و ماشي بقلبكوم .. راه إلا وقعت للحاج شي حاجة بسبابكوم راه مغايعقل عليكم حد ..

فهد بقا غير كايشوف مخنزر و مزير على قبضة يدو، أما كوثر نطقت بصوت باكي ..

كوثر : و لكن أنا ..

ليلى جات كتجري قاطعت حديثهم

ليلى : سمحولي غانقاطعكم و لكن جدي راه خرجوه و منين فاق على فمو غير فهد و كوثر بغا يشوفهوم ..

أحمد : أصلًا سالينا لهدرة ، نتمنى تكونو فهمتو ..

خالد : يلاه نمشيو ..

مشاو دخلو لداخل كان الحاج نقلوه لغرفة خاصة و حتى حد ما دخل لعندو كلشي گالسين على برا بحيث عاد خاصو الراحة إيلا وقعتلو شي صدمة فهاد h24 يمشي فيها نيشان ، و لكن هو غير حل عينيه بغا يهضر مع فهد و كوثر ، لقاو الطبيب واقف حدا لباب باش يعطيهم التعليمات قبل ما يدخلو ..

الطبيب : هو حقيقة مانعين عليه الزيارات حيث مازال ماستاقرات حالتو و إلا تلقى أي صدمة فهاد 24h مغيقدرش يتحمل و غنفقدوه و لكن من تحت طلبو غندخلوكم غير باش نديروليه خاطرو و لكن قبل مادخلو لعندو بغيت نقوليكم سايسو معاه الله يخليكم و ماتضغطوش عليه ، 5 دقايق متزيدوش عليها حيث خاصو يرتاح ...

فهد : اوكي دكتور ..

دخلو عندو لقاوه حال عينيه من جيهة لباب ، كان ناعس على السرير و باين فيه لعيا ، مشات عندو كوثر كتجري و فهد موراها باستلو يدو ، و فهد باسلو راسو ..

فهد : الحمد الله على سلامتك ، خلعتينا عليك ..

الجد : كح كح شكرا أولدي ، نتوما خاصكوم توافقو على الزواج حد مغيصونكوم بحال بعضياتكم ، انا كاندير هادشي على قبل مصلاحتكم كح ..

كوثر : (باستلو يدو ) جدي الله يخليك هاد الموضوع ماشي وقتو داباا ، حتى تصح و نهضرو..