القرار العائلي

-13-

أصبحنا و أصبح الملك لله

نهارمور نهار ، و ها هي دازت سيمانة غير فالتوجاد ..هاد النهار كاين لحمام د لعروسات و لعقد و لحنة ، و غدا عاد غيكون لعرس ..
وجدو الجردة ديال لفيلا على أحسن وجه مع لمسااحة كبيرة زادت عاوناتهم باش يزيدو و يديرو اللي بغاو ، ديكور ملكي و كايعمر لعين كلشي موجد على حقو و طريقو..

فالدخلة د لفيلا وقفات طموبيلت جاد ، و نزلو منها كوثر و ليلى مزنگات بلحمام و طايح عليهم السر ، لفيلا حاليا فيها غير النسا جاو بنات لعائلة و حتى الجيران ،أما الرجال فمشاو للفيلا د فهد اللي كاينة تقريبا غير حدا لفيلا دجدو هوما واخا عايشين مجموعين و لكن كلها داير أملاكو ،  غير نزلت كوثر بالطوموبيل بداو كيزغرتو و يصلييو على النبي ..

- صلاااااااة و سلااااام على رسووول الله ..

- لاااا جاااه إلاا جاااه سيدنااا محمد ..

- الله معاا الجاااه العاااالي ...

- يوووويويويويويووووويويويووي ..

- لولولولوي...

أصوات كثار د لبنات والزغارت تسكت و حدة و تطلق لخرى حلوقها  ، بداو كيرشو عليها لما ورد و هي داخلة و ليلى حداها فرحانة حتى هي كتعشق و تصفق ..
ما خلاوهوم حتى طلعوهم لفوق و خلاوهم كيتنهدو سخفانات...

كوثر : أويلي أشنوو گاع هاد الناس ، من التسخسيخة ديالت لحمام لهاد التسخسيخة نيشان ، ما خلاوني حتى نرتاااح ..

ليلى : ههههـ يا ختي أنا بعدا نشطت و فوجت ، فرحي واخا ماقابلاش و لكن هاد لفرح كايجي غير مرة فلعمر ، فرحييي براسك ألهبيلة ..

كوثر : كيبانلي دااكشي اللي غاندير حيث هاكة كنفقص غير فراسي و ما رابحة والو ..

ليلى : هاكاا نبغيك ... أجيي أجيي نضربو شي تصيورات من داك الشي الرفيع  ..

كوثر : هههههـ الله يعطينا وجهك ..

بداو كيتصورو و يتپوزاو حتى دخلت عليهم خديجة راسمة ابتسامة زوينة على وجهها ..

خديجة : أ دوك  الجنياات أاش كتديرو راه شوية و تجي لكوافورة باش تصايبليكوم هي و الميك اپ أرتيست ، أما اللباسي راهوم معلقين فالدريسينغ ..

كوثر : وا حتى يجيو أماما و نوضو ، راه ما لقينا مانديرو..

خديجة : صافي واخة غير بقايلي على خاطرك ألالة ، كليتو بعدا ولا واالو ..