شغفها حبَّاً

شغفها حبَّاً(الجزء الخامس عشر)

شغف بجدية:يوسف..أنا كنت بدرس انكليزي،وانت كنت ععلاقة ببنت تانية،واسمها لينا،ويوم الحادثة انا كنت بتخانق معها وهلسبب خلاني اطلع معصبة وانت تضربني بسيارتك

بيسكت يوسف
شغف:احكي شي
يوسف:خليني فكر بلموضوع،رح نسافر وهنيك رح لاقي دكتورة نفسية
شغف:يعني..يعني أنا جنيت صح
يوسف:مجنونتي،ممكن نسكر عن السيرة يلا امشي

بتمسكو بقوة من ايدو وبيمشو

بس يوصلو علبيت بلسيارة،بعد الصمت يلي دام طول الطريق
شغف بتقلو:ماعاد فكر ولا اهتم بشي،غير أنو انت ذاتك بلماضي والحاضر والمستقبل،يوسف..يلي رح يبقى معي عطول

يوسف:تماماً،،أنا الحقيقة الوحيدة بعمرك

بيمسحلا عشعرا بحب بعدها بينزل بيوصلا عباب بيتا وبيروح..

بتمرء فترة،يوسف عمل كل تحضيراتو ليسافرو ويعملا العملية

أما شغف،كانت بلبداية مستغربة من موافقة عيلتها،أنو تسافر وحدها مع شب غريب،بدون ماشخص منهن يرافقها،وقالو انهن مشغولين،قررت ماتهتم فيهن،متل ماهنن مو مهتمين وكأنها مو بنتن

بترتب كلشي لازما وبتنتظرو بلدقيقة

شغف لنفسا:الانتظار صعب،كل هلأيام كانت قصيرة مقابل هلدقايق يلي عم انتظرك فيهن..

بيوصل يوسف بتسمع الجرس،بعد لحظات بيدق باب غرفتها
شغف:تفضل

بيفتح الباب يوسف:شغفي،صباح الياسمين
بتشم ريحة ياسمين:يوسف جايبلي ياسمين
يوسف:رح بدل اسمها،ويكون اسمها زهرة الشغف،ع اسمك..لأنها من ريحتك

بتبتسم وبتتوجه لعندو،أول ماتلمس جسدو بطرف اصابعا،بيقرب منها وبيضما
يوسف:شتقتلك
شغف:وأنا..يلا نمشي

بيحمل الشنتة وبتودع عيلتها يلي كانو بلصالة وبتروح

كانو بلسيارة عطريق المطار
يوسف:جاهزة؟
شغف:لشو
يوسف:لكلشي..رح نكون مع بعض عطول
شغف:طبعاً،أنا بدي قلك شي قبل لانسافر
يوسف:قولي
شغف:أنا..بحبك يوسف،من يوم شفتك بلمعهد وقلبي ألتهف ألك مابعرف شو يلي يجذبني ألك مع أنو مو من طبعي هيك..حتى لو بعرف أنك مرتبط ببنت تانية،بعرف هلشي سيئ بس تركتو بقلبي وماحاولت فرقكن

يوسف:احلى كلمة بسمعا بحياتي،هي أول مرة بتحكيها..أنا حكيتلك ياها بس كنتي بلغيبوبة..مر أول شهر وانتي قدام عيوني يومياً،بعدها بلشت المشاعر تخلق جواتي،انتبه لتفاصيل فيكي وانتي غفيانة ومالك بلدنيا،بس كنتي بقلبي أنا،بتصدقي أوقات اسمعك بتحاكيني،بعرف أنو جنون،بس هيك يجي ببالي..

بتمسك بأيدو،طول الطريق وبس يوصلو بينزلو سوا..بعد كم ساعة

بالمطار كانت ماسكة ايدو بخوف
يوسف:أنا معك،مستحيل خون ثقتك مارح اتركك
شغف:بعرف...بس فكرة وجودي ببلد غريبة مخوفتني شوي

بيمشو سوا وبيطلعو بسيارة أجرة
شغف:وهلأ لوين؟
يوسف:ستأجرت شقة
شغف:شقة؟

شغف:شقة؟لما حكينا قبل أنو فندق،وأهلي بيعرفو أنو فندق
يوسف بجدية:شغف..أول شي هيك كان افضل لوضعك قبل العملية ولبعد العملية،صعب تكوني بفندق،ستغربت قلقك معقول خايفة من أنو تكوني بمكان واحد معي؟
شغف:لا بلعكس يوسف بعتذر كتير جد ماهيك كان قصدي،أنا مابرتاح غير معك أنت الأمان بلنسبة ألي،كل الفكرة أنو أهلي بيعرفو فندق

يوسف:فكرك أهلك كتير رح تفرق معهن!

قال هلجملة بدون ماينتبه،كان معصب لأنو شغف لهلوقت مو مأمنتلو،بس مع هيك كلمتو جرحتا كتير وأكدتلا عدم اهتمام عيلتا فيها

سكتت بدون ولا حرف
يوسف:شغف،بعتذر ماقصدت هيك
شغف بسخرية:لا تمام..تعادلنا وحدة بوحدة،ممكن نسكت هلأ...

سكتو هني التنين كل الطريق،أما جوات راسها مافي صمت،بلعكس راسها رح ينفجر من الكلام

شغف لنفسا:ياترى يلي عم اعملو صح ولا غلط،وجودي مع يوسف لوحدنا صح؟هلقد ثقتي كبيرة فيه؟طيب هلأ جرحني واعتذر ولسا بأول الطريق،بعدين شو ممكن يصير؟أنا شو اعمل بحالي بعدين؟وإذا ماقدرت ارجع وشوف

بدون قصد بتنزل دمعة من عينها بترفع ايدها لتمسحا،بلحظتا بينتبه يوسف

بيلف ايدو وراها وبياخدا لحضنو،بتحط راسها عصدرو بصمت،بينزلو دموعا بس برياحة..شعور الأمان بحضنو طاغي،رغم الجرح يلي بقلبها بسببو

بيوصلو علبيت،بيرتب يوسف الوضع بحيث ماتتأذى شغف وين ماراحت،بيدلا وين الحمام بتاخد دوش وبعدين بتلبس وبتتعرف ع غرفتها،تعثرت شوي بلتخت واثاث الغرفة وبعدين تعلمت

بتتسطح وبتنام شوي

بتصحى ع نأرات يوسف علباب
يوسف:شغف؟صاحية؟

بتأعد بتختها وبتقلو بنعس:أي صحيت
يوسف:طيب يلا ناكل؟

بتنزل من علتخت بس فجأة بتضرب بشي جنبها

بيسمع يوسف:شغف..انتي منيحة؟فيني فوت
شغف:تمام تمام أنا منيحة،وفيك تفوت

بيفتح الباب والمكان كلو عتم،بيحس بشعورا هي هلأ هيك بعتم طول الوقت،بيحزن عحالا

شغف:يوسف؟
يوسف:أي ياعمري ليكني معك
شغف:أنت..شغلت الأنارة؟
يوسف:أي..لاحظتي شي؟
شغف:مجرد لمعة بيضا
يوسف بفرحة:بتحكي جد؟

شغف:أي والله

بيسحبا لعندو وبيضما:يارب..بشارة خير انشالله عكل حال رح نحكيلو للدكتور هلشي لما نشوفو

شغف:تمام
يوسف:لسا زعلانة مني
شغف:للأسف
يوسف:شو تفضلتي ياخانم؟
شغف بضحكة بريئة:للأسف ماعم اقدر ازعل منك
يوسف:ومحلاكي تقدري يلا امشي قدامي لشوف

بيضحكو وبيطلعو سوا،بيخليها تعد الخطوات وتتعرف علطريق للصالة،وبيأعدو بياكلو ع طاولة الأكل..بيقضو اليوم سوا مابيطلعو،أصلاً مافي فايدة شغف مارح تشوف شي،بس وعدها لما تنجح العملية رح يدورها بلمدينة..

يوسف:شو بتحبي نعمل هلأ؟
شغف:بدي تقرألي رواية
يوسف:بس من وين رح جبلك رواية هلأ؟

#سارة_العلي💙 #يتبع #حكاية✒ #قصص @hekaea_tna