شغفها حبَّاً

شفغها حبَّاً(الجزء العشرون)

مابيعرف كيف سند حالو علأرض وترك راسو مرتكي ع سريها وغفي جنبها..

بتقرب ندى علباب وبتدق عليه بهدوء لما ماحدا بيجاوب بتفتح لتلاقيه عهلحال..مابتعرف شو شعورا،متدايقة عليه وبنفس الوقت من وجودو،وكمان عحالة بنتها..

بتقرب بهدوء وبتصحيه:يوسف..ياابني اصحا

بينأز يوسف وأول مايرفع نظرو بيلاقي شغف بعدين بينتبه أنو ندى عم تندهلو

يوسف:أيوا خالتي..بعتذر كتير
ندى:فتت لقيتك متسطح..وهيك مابترتاح

يوسف:واللهي مانتبهت،سامحيني..يلا رح امشي

ندى:رح ترجع بكرا؟
يوسف:أكيد..بتمنى مايكون هلشي بيدايقك
ندى:ابني لازم نكون صريحين..شغف ماعم تستجوب مع وضعها بنوب،ويمكن ماتصحا

يوسف:ويمكن تصحا بأي لحظة..
ندى:ورح تبقا يومياً تزورها..

بعد صمت،واحراج كبير،بس كان حبو لشغف اكبر من كلشي
يوسف:يومياً اي،مافيني ماشوفا كل يوم..ووقت رح تصحا رح كون معاها صدقيني

ندى:بس...

فجأة بيلتفتو لصوت عصام:خلص ياندى،تركي يوسف ع راحتو
يوسف:بتشكرك عمي..
عصام بيهز براسو:بس بدي حاكيك كلمتين قبل ماتمشي
يوسف:تمام

بيروحو عغرفة الجلوس

بيتطلع عصام ب ندى لتمشي،وبس يبقو لحالن بيوجه كلامو ليوسف
عصام:ابني،بدي كون قوي ومتحضر وانسى أني ابوها لشغف وانت انسى،وخبرني هلأ..شو يلي بينك وبين شغف؟

بيتطلع يوسف وبعد لحظات صمت بيقلو

يوسف:يلي بيني وبينها اكبر بكتير من كلام ينقال،الله بيشهد أنو ولا يوم عملنا شي غلط بلعكس..وقت كنا ننجمع بلمعهد أنا كنت مرتبط ياعمي

عصام:وأهملت انسانة كرمال وجودك مع شغف
يوسف:موضوع البنت التانية انتهى ومن زمان،وبسبب هي البنت وتصرفاتا الغلط..وهلشي رح يصير بوجود شغف وعدمو

عصام:طيب..وهلأ بدك تقنعني وجودك كل هلأيام بجنب بنتي بس لمجرد حاسس بتأنيب الضمير..

يوسف:أنت طلبت مني كون صريح..وأنا رح كون صريح،احساسي تعدى كل الحدود،وأنا عن نفسي مستغرب من يلي عم يصير..احساسي عم يقلي شغف بتخصني ألي..ولازم ابقى معها،بعتذر عن هلكلمة..احساسي بيجبرني أعمل اي شي مابتسمح فيه أخلاقي اذا حدا بيفكر يبعدني عنها

عصام بتعجب:طيب ليش؟؟
يوسف:بكل بساطة،روحها تواصلت مع روحي..وهلشي خلاني ارتبط فيها،لنسميه ارتباط روح

عصام:وإذا كانت شغف ماعم تحس شي تجاهك
يوسف:مستحيل..
عصام بعصبية:شو يلي عم يخليك تنفي هاد الشي؟إذا مو متأكد من شي قبل الحادثة

يوسف بقلق وتوتر مابيقدر يمسك نفسو وبيقول بعصبية:لأني بحبا...أنا بحب شغف..حبيتا بطريقة مجنونة متل ماهية بدها..أنا حبيت كلشي بتحبو شغف،والشخص يلي بتتمناه شغف هو فيني أنا

واقف عصام ومصدوم من يوسف

بيكمل:ورح كون متل مابدها..لأنو لازم تكون ألي،ومستحيل خليها لغيري

عصام:انت مجنون؟

يوسف:أي..مجنون،وبما أنو شغف هي سبب جنوني رح تكون سبب علاجي،ومابسمحلكن تبعدوني عنها..أنا بعتذر إذا غلطت بكلمة معك عمي،أنا مستعد هلأ اطلب ايدها منك

كانت ندى واقفة بطرف الباب وسمعت الكلام،وشهقت مصدومة

عصام:تطلب أيدها وهية مو موجودة؟
بيدق يوسف عقلبو بوجع:هية هون موجودة..ليش ماعم تفهموني؟بعرف مارح تقبلو لهيك..رح اتحمل وقت تصحا،وهية رح تقول موافقة..أنا ماشي هلأ ورح ارجع بكرا وبعدو وكل يوم..بترجاك ماتحرمني أنو عيش

بيلتفت علباب ليمشي بيلاقي ندى

بتقلو:وإذا ماستقبلناك بكرا؟
يوسف:باخدها وبمشي..

وبس بدو يطلع من الباب بيسمعو صوت مأشرات الاجهزة يلي عند شغف،بيتوجهو بسرعة لهنيك..بيلاقو في لخبطة بنبض القلب..

فوراً ابوها بيتصل بلدكتور،وبيقرب يوسف لعندا وبيمسك بايدها
يوسف:شغف..شغفي اصحي،بترجاكي هلأ..قومي شغفي بترجاكي أنا ناطرك

بلهفة وحب بيشد عأيدها اكتر،وبيكابر كتير وبلغصب بتنزل دمعة من طرف عينو،بعد ماحاول كتير يحبسها،بس كانت أقل شي يعبر عن وجع قلبو بهللحظة

عصام:يوسف..خليك معها أنا رح جيب الطبيب يلي هون بلمنطقة ممكن يساعدنا بشي لبين مايجي الدكتور...يوسف انت عم تسمعني؟

ندى: رح يصير شي لبنتي ياعصام
عصام:لا..الدكتور مأمن كلشي،بس بيكون صار شي بجسمها وممكن هلشي منيح بحقها اهدي وادعيلا..وجهك صار اصفر روحي شربي دواكي كمان بسرعة..

كل هلاصوات وماكان حاسس ع شي

بلحظة بقيو وحدهن،بيقرب منها كتير وبيطبع بوسة ع جبينها جمع فيها كل احساسو ومشاعرو،الخوف والقلق والحب..والشوق

نزلت دمعة جديدة من عيونو،عطرف وجه شغف..

بيبعد شوي،وبيتطلع فيها،للحظة بيمر بخيالو كل اللحظات يلي عاشوها سوا من يوم ألتقو بلمعهد لهليوم،بيحس راسو رح ينفجر من التفكير والألم،بيقرب منها وبيمسكها من كتافها بلطرفين

يوسف:شغفي..لك شغف اصحي بكفي تعبت..

بيتركها وبيلتفت علجهاز بيلاقي رجع طبيعي،بيتنهد بوجع..وكأنو الجهاز عم يخبرو بأشهر تانية من الوجع والانتظار،بلأخص بعد يلي صار اليوم مع عيلتها خايف يفرقوه عنها بعد ماصارت قطعة منو..

فجأة بدون سابق انذار،بيسمع تنهيدة..

مابيستوعب الوضع،وبينتظر..هدوء تاني وبيتكرر الصوت،تنهيدة ناعمة متل نسيم الربيع

بيلتفت عليها
ملامح شغف تغيرت،مابيصدق بيقرب اكتر ليتأكد بيركز منيح بيلاقي ملامحا بتعبر عن وجع بسيط..

بيحس نفسو بحلم،بيحضن وجها بكفوفو:شغف..ردي علي عم تسمعيني

شغف:اا...

#سارة_العلي💙 #يتبع #حكاية✒ #قصص @hekaea_tna