شغفها حبَّاً

شفغها حبَّاً(الجزء السابع عشر)

،بتفوت علحمام بتغسل وجها وبتنضف اسنانها وبترفع راسها عن المغسلة لتنشف وجها وايدها،بتطلع بنفسها بلمراية،بترتب شعراتها بعدين بترجع المنشفة بشكل روتيني...ولحظتها بتوقف بصدمة

بتطلع يمين وشمال،بتطلع بأيديها وبلمراية بصدمة كانت كفيلة توقفلها قلبها..

شغف بينزلو دموعها:أنا...أنا عم شوف،أنا عم شوف ياربييي

بتركد لبرا عغرفتا يلي كانت معتمة بتفتح الستاير بيوجعوها عيونها من اضاءة الشمس القوية بتغمضهن وبتتوجه لبرا الغرفة

شغف بتنده:يوسف..يوسف..انت وين؟يوسف

بتدور عليه بلبيت مابتلاقيه

بتتصل عليه
بيرد:ألو
شغف بفرحة:يوسف انت وين؟
يوسف:أنا تحت بلكافيه يلي جنب العمارة بشرب القهوة،لأنو كنتي نايمة انتي منيحة؟
شغف بتفكر منيح بعدين بتقلو:أي أي منيحة
يوسف:بتحبي اطلع
شغف:لا بنوب ابقا مكانك ماشي
يوسف باستغراب:أوك ماشي

بيسكرو التلفون

بيتطلع يوسف بلبنت يلي قدامو
رند:شو بدها منك؟
يوسف بيتطلع فيها بقرف:ماخصك..المهم
رند:المهم..طيب

أما عند شغف بتقرر تنزل وتفاجأو،بتلبس وبتنزل بتبعد شوي عن الرصيف لتشوف وين في كافيه بلمنطقة وأول ماتلمحا بتتوجه لهنيك،بتفوت بكل فرحة حاسة رح تبكي بس بتمسك نفسا،بتدور ع وجه يوسف لتلاقيه بس مابتشوفو،بيستوقفا وجه مو غريب عليها،وجه رند،بتتخبا بعمود موجود بلكافيه لحتى مايلاحظوها وبطريقة ماتلفت الانتباه

بتحاول تتعرف ع وجه الشب،بس مابتعرفو
شغف:الحمدلله مو يوسف

بتقرب اكتر لتسمع وتعرف شو عم تعمل هون رند

رند:بس مو هيك كان اتفاقنا يوسف افندي
يوسف:بعرف..وقلتلك وضعي هيك،والعملية لسا بعد أربع أيام
رند:لتكون حبيتها عنجد لك يوسف

شغف بصدمة:اسمو يوسف،ونفس الصوت،بس شكلو..هاد مو وجه يوسف،لك شو عم يصير

بتمسك راسها بتعب

يوسف:أنا حافظ اتفاقنا منيح،ناطر اعملا العملية وبس ترجع تشوف بيرتاح ضميري،لأنو كنت السبب وهداك الوقت بتركا

رند:أنا مشيت معك،وبعدت زياد عنها،على اساس أول ماتشفا ترجعلي ونتزوج،وإذا بتخلف باتفاقنا رح...

فجأة بتسكت رند لما تلاقي بنت بدها تركد من المطعم وبتنصدم بلنادل وبتوقع الصينية بلأرض والكاسات بيتكسرو

بيتطلع يوسف بيلاقي شغف

بصدمة بيقول:شغف؟لك كيف نزلت لهون
رند بنبرة خوف:يوسف،هي عم تشوف هية اكيد شافتنا،لك عم تمشي وشايفة كلشي

بيتركا يوسف وبيلحق شغف

أول ماتطلع شغف من الكافيه بتخبط بشب،بتبعدو عنها بقوة وبتلفت نظرها لتشوفو،بصيبها قشعريرة بكل جسدها لما تشوف وجهو...يوسف،هو وجه يوسف الحقيقي يلي شافتو بلمعهد زمان...مو يوسف يلي كان معها هلفترة

لحظتها بتتلخبط كتير وماعاد تتحمل من الصدمة،وبتوقع مغمى عليها...

بلمشفى،بتتسطح وبيعملولا صدمات كهربائية

صدمات كهربائية؟؟شو السبب..بتتشوش كل الصورة بخيالها

#عودة_للحاضر

تأزم وضع شغف بعد ماتحركت وأبوها نده للدكاترة،وفوراً عطوها ابرة بس بدون فايدة وعملولها صدمات كهربائية...لحظات الخوف بقلوب الكل،وبلأخص يوسف،يلي حس أنو نبض قلبو بلش يوقف مع نبض شغف

بس لحظات وقدرو يساعدوها...ورجع قلبها ينبض

شو يلي كان عم يصير؟

من لحظة ماتحركت شغف بهداك اليوم بعد غيبوبة تلت شهور..والكل توهمو أنها رح تصحى ويوسف فرح كتير..

بس للأسف رجعت نتكست،وشغف أبداً ماصحيت من الغيبوبة

عيلتها هنن ذاتهن يلي بيخافو ع بنتهن وبيحبوها كتير،جنبها وماتخلو عنها..

يوسف:دكتور هية كانت رح تصحى شو يلي تغير انت قلت أنها عم تتحسن

الدكتور:بصراحة مابعرف شو قلكن..شغف كانت اقوى،بس في شي غريب صار معها، وكأنو هية مابدها تصحى وبدها تبقى بغيبوبتا

عصام:أنا بنتي قوية،مستحيل تستلم للغيبوبة

الدكتور:الله اعلم بصراحة أول مرة بتمرء علي هيك حالة،متأكد كانت رح تصحا..بس هية ترددت وضعفت نفسياً

يلي صار أنو عاشت شغف غيبوبتها بخيالها بعالم خاص،عقلها الباطني شدها لعالم رواياتها،وعاشت قصة هية كانت بطلتها..وتمسكت فيها بقوة..

يوسف بيوقف ليحكي مع عصام وندى:أنا بقترح ناخدها علبيت
ندى:مابيكون في خطر عليها؟
يوسف:بنوب بلعكس هيك بتقدرو تكونو جنبها طول الوقت،وفيني احكي مع الدكتور وكمان رح نجيب ممرضة يومياً تنتبه لوضعها وتساعدك بكلشي كرمال تبقى بخير
عصام:أنا معك،إذا مابيكون خطر عليها

يوسف:بس عندي طلب،وبتمنى ماتردوني

عصام:أنت صرت ابني وحكيتلك هلشي قبل،لهيك طلوب ولا تتردد
يوسف:بعرف أنو هلشي بيخالف عاداتكن وتقاليدكن،بس بترجاكن أنا بدي ابقى أجي وزورها،يومياً لو سمحتو

عصام وندى بيتطلعو ببعض وبيسكتو لحظات

يوسف:مارح اقدر اتحمل..أنا خجلان أني بحكي هلكلام بصراحة وصدق،بس اعتبرو هلشي رح يكون علاج لانسان مريض،وبعرف قلبكن طيب ومارح تبخلو بعلاجي..

بينصدمو بكلامو،معقول شغف وهية مريضة وغايبة بعالم تاني صارت علاجو وهو واقف عرجليه،هنن متأكدين أنو ماكان شي بينهن،لأنو بيعرفو أنو يوسف كان مرتبط،وأنو بنتهن مستحيل تخرب بين تنين..

بس كمان وجودو كل هلتلت شهور معها أكدلهن أنو هو تعلق فيها

عصام:أنا موافق،ماعندي أي اعتراض..

بيفرح كتير وبيقرب بيضمو بيربت عصام عكتفو،وبيمشو لعند الدكتور

الدكتور وافق بشروط معينة لتأمين وضع صحي لشغف بلبيت،وبعد ترتيب الأمور كلها بمساعدة يوسف أكيد تم نقل شغف لبيتها..

#سارة_العلي💙 #يتبع #حكاية✒ #قصص @hekaea_tna