ما وراء الأبواب

pert_14_

#ما وراء الأبواب
#الكاتبه : زهراء الهاشمي

بناتي الحلوات لا تنسون التصويت على البارت والتعليق على الفقرات حتى يصعد تفاعل القصه واستمر بالنشر

الكاطع يكول

غيمت عيني عليك وتنكط دموع
كونك تمر بالروح امطرلك اسبوع

يجاوبه فاضل كريم

امطرلك اسبوعين لو بس تمر طيف
لو من صدك مريت امطر شته وصيف

~~~~~~~~~~~~~~~~~~~
حُذام

اليوم اخر امتحان عدنا واخلص من الثالث
رجعت مشي ويا البنات وصلت للبيت لكيت رنا تبجي مفرفحه وكف كلبي ركضت الها

حُذام : يمه بنتي شبيج ليش تبجين

رنا : خاله ضربتني

حُذام : ليشش

حوراء : لان كعدت تاكل ويا جهال ايمان وهذيج من شافتها اجت سحلتها وضربتها راشدي وطردتها

حُذام: سوده عليه لا تبجين يروحي هسه اني اسويلج اكل كومي

ايمان : واخيراً شرفتي الخانم يلا البيت ينتظرج اليوم كله تعزلي وتغسلين الزوالي

عفتها واخذت خواتي وصعدت بدلت ملابسي ونزلت سويت لفات جبن الاخواتي وصعدتهن بسرعه قبل لا تجي ايمان

حُذام : هاجن اكلن هنا ولا تنزلن ابد خووش

حوراء: ماشي

عفتهن ياكلن ونزلت اغسل بالبيت للعصر خلصت ظهري نكسر رحت شفت بيبيتي نايمه عفتها وطلعت اريد اصعد عاطت ايمان

ايمان :والزوالي غسلتيهن

حُذام: عمه هواي وكبار ما اكدر الهن

ايمان : نجبي واصعدي اغسليهن يلا

صعدت بيه ما بيه فرشتهن وصرت اغسل حيلي راح واني اغسل دمعن عيوني هو هذا الما عده اهل هيج يعيش

رفعت راسي للسماء والدموع بعيني
يالله نضره من عندك على حالي

اجا بالي موقف من كعدنه بيتهم
نايمه وبحضني رنا ما احس بس الباب نركع رفعت راسي مرت خالي ايمان واكفه بالباب وايدها على خاصرتها

ايمان : يلا خانم ما شبعتي نوم كومي الماعين تنتظرج شنو فوك ظيم بيبيتجن نوب اخدمج انتي وخواتج

حُذام : صار عمه هسه انزل اغسلهن

هزت ايدها وطلعت لا هاي هيه مبين راح اعيش بالعسل وياها كمت شلت شعري رحت غسلت وجهي ونزلت البيت هدواء ايمان كاعده بالصالة رجل على رجل وتشرب جاي وتتفرج بالتلفزيون

عفتها ورحت للمطبخ كومة ماعين هذن منين اجن شلت اردان الدشداشه و وكفت اغسل بيهن هواي عبالك مجمعتهن مال اسبوع