#أبي_لم_يكن_إنساناً
البارت التاسع والعشرون
للكاتبة لبنى الموسوي
بـ عيني حچاية جيب اليفتهما
دمعتي بلا سبب توگع والمها
اكو بـ ذاكرتي ناس تموت وتعيش
ناس اعرفها ما اعرف شسمها
امنيتي اغمض گلبي بالليل
طلعت روحي بس مدري شلزمها
الاء.. شيلي البيض من گدامي بسررررعة
طيبة.. وليش اشيلة غير انتِ گلتي سويلي قبل شوية
الاء.. شيلي ولتجادليني يمعوووودة
حچتها وگمـزت مـن مكانها إيدهـا على حلگها وركضت للمغاسل تستفرغ
باوعت الـ همام صافن بوجهي
- والله عمو هي طلبت مني على شنو دتصيح علية بعد
رفع الصحن يشتم اذا اكو ريحة زفر بالأكل
- ما بيها شي طيبة
يمكن مستبردة وتحسست من ريحة البيض عادي تصير
الحجية.. لا همام شنو السالفة
ليش من شوكت اللي يستبرد يتحسس من الريحة ولك اخاف المرة حامل ومتدري بروحها والله شكلها هيچ
بس حچتها دفع الكرسي ونهض من مكانة
- حمل شنو يمة
گولي غيرها ماكو هيچ شي متوهمة اني متأكد ماخذة برد
- واني هم متأكدة وما اظنك تلحگ بية بـ هالسالفة
لمن شلت أختك خديجة صرت مثل الاء
اتحسس من كل الروائح خصوصاً البيض وشوف اذا ما طلعت حامل
هيچ ويسويها البخت واشيلك طفل بـ إيدي
إلا اوزع چكليت بـ اسم قاضي الحوائج بس كون ينطي مرادي وافرح بضناك گبل لا اموت
- اسم الله عليچ شنو هالحچي
وارجع واگول اني متأكد من نفسي والاء مو حامل
فـ كافي حجية
الله يطول بعمرچ سدي الموضوع ولتحچين بي گدامها
- ادري هو شنو المتأكد رجال لو مو رجال انتَ ؟!!
- كافي الخاطر ربچ مو البنات گاعدات
- مگلت شي بس مرتك حامل على شنو ضجت ما زال ظلت على ذمتك طبيعي يصير عدكم جهال
- استغفر الله ربي اااستغفر الله
حچاها وگام يفتر بالصالة رايح جاي وعيونة ع المغاسل
شوية واجت الاء
إيدها على صدرها تتنفس بالگوة ومبللة حتى ملابسها ظل همام صافن عليها ما نطق حرف
الحجية.. ها بنيتي شبيچ على ساعة شصارلچ وتعبتي
الاء.. والله ما اعرف خالة
بس نفسي حيل لعبت من ريحة البيض واستفرغت على معدة فارغة حتى صدري ظل يوجعني
الحجية.. اخاف حامل ؟!!
همام.. يوووووم هم رجعنااااا
گتلچ مو حامل
شجاچ چلبتي بالسالفة يعني گوة تردين تحبليها لا اني ولا هي نريد جاهل سدي هالموضوع عاد
الاء.. لا همام صح كلام خالة يمكن اني حامل
همام.. هاااااي شگاعد تحچين صاحية انتِ تخبلتي
الاء.. اي قابل شبيها ليش دتصير عصبي غير متزوجين
همام.. لتكفررررريني
احنة متفقين ماكو أطفال على أي اساس تتخذين هيچ قرار مهم من كيفچ وبدون مترجعيلي
YOU ARE READING
أبي لم يكن إنسانًا
General Fictionالأثار التي على جسدي هيَّ من أوصلتني إلى ما أنا عليهِ الآن أنا تلكَ الطفلة التي كبرت قبلَ أن تكبر أنا تلكَ الطفلة التي أصبحت امًا لِـ طفلين وهيَّ في السابعة من العمرِ فقط أنا من قالَ عنهُ الله في محكمِ كتابهِ العزيز ( فأما اليتيم فلا تقهر )....
